C. Lalngaihzuala
Ka Nu leh Pa ka tet te atanga duat taka min enkawltu leh min chawm seiliantute chu kum 15 zet ka hmu tawh lo a, ka ngainat thin em em te niin an bulah ka seiliana, min hmangaih thu min hrilh mawlh mawlh thin bawk. Ka lo lei kang deuh a, ka Nu leh Pa tak an nilo tih ka hre ta a, Fahrah ka nihna leh an fa lak ka nih chu ka thinlungah an langliana, Fahrah enkawlna atanga lak ka ni tih te ka hriatbelh zel bawk a. Mahniin khawngaihnain ka khat a, ka pian hma hian ka U tak tak te anga ka lo ngaih thin pahnih chuan Ruihhlo an tih nasat avangin chatuan ram min pansan tawh a.
Hun a lo kal zel a, kha kan chenna In nuam ka tih em em thin kha, nuamlo ka ti thar a, chhuahsan mai ka rilruk ta a, thawmhnaw ka ken turte chu bithliah felin, In chu chhuahsan turin ka rilru ka siam fel ta a. Ka Pa mawlh mai kha ka mitthla ah ala cham reng a, mittui tlachungin “Bawihte khawngaihin chhuak lul suh, ka hmangaih che a sin.” a tih lai te kha aw..ka chhuikir lo theilo a, Ka Nu, min duat em em thintu hrisel lo ve tak mai kha ka chhuahdawn ni te khan damlo in khumah a mu reng kha a ni si a.
Kan chenna in ka chhuahsan ni atang khan thiltha reng reng hian min hlat ni hian ka hria a, vanneihna ka chungah hian a thleng ve theilo nite pawh hian ka hre hial a, mi in ah te awm kual in, a rem rem ka thawk a, Sual liantham ni a ka hriat lem loh ah pawh, Tanin ah khung ka ni ta fo a, khawihmunah pawh kal ila, sual rawngbawlpui tur an lo awm ve thei zel bawk a, Zu bawihah ka tanga, chu Zu bawiha ka tanna atang chuan chhuah ka tum nasa mahse ka thei tawh silo, ka hriselna paw'n a tlin ta meuh lo. Ka vanglai hun zawng zawng leh ka la hrisel lai te kha chuan he khawvel hi nuam ka lo ti thin a, thian pawh ka ngahin ka inhria a, ka sual rawngbawlpui te chuan min hmangaihin ka hre thin. Ka hriselna a lo tlahniam a, ka thin a chhia a, ka thian ni a ka lo chhal thin te pawh chuan min hlat zo vek tawh a. He khawvela min hmangaihtu ka neih ve chhun ka hransan tak, ka Nu leh Pa te kha hriatchhuah chang leh ngaih thin chang ka nei ta fo a, an mi hmangaihna ka haidersak chung pawha min hmangaih tlat thin zia te ka ngaihtuah kir hnuhnawh a.
Tunah chuan pawisa ka neih theihna a nih phawt chuan eng pawh ka thawk hreh ta lo, Zu siamna hmunah te inhlawhin, chumi hmun atanga man ka ni leh a, ka ta vek anga chhal turin ka inhlawhna ten min ngen avangin, ka chungthu Court a rel a nih hnuah Tanin lama dah luh ka ni leh ta a, A ngaite bawkin 'Men Enclosure' lamah chuan Tanin vengtu pahnih chuan min hruai phei a, he lai hmunah hian hun engchen nge ka hman leh dawn chiah ka hre lo.. ka awmna hmasa bawk '1 ward B' ah awm leh tur a tih ka ni. Helai hmun hi hman atang tawh khan, ka lut fo a, Lungin tangte hi tan chhan in ang lo tak tak kan ni hlawm a, thiltha zirchhuah kan neih em em ka hre ngailo, thilsual ti leh tura kan taksa a lo hrisel chhoh leh hun kan nghak ni berin ka hre thin a, Zilhhauna haw mi te leh chhungkaw mumal neilo hi a tam zawk kanni a, Keini aia tang rei tawh te thu awih chu thil finthlak tak a ni tih kan hre tlang a. Dan zawm tur leh tihtur an siam a, chung zawng zawng chu sawisel lova zawm chu kan tih tur ani.
Ka taksa chaklo lutuk pawh a ziaawm chho tan hle tawh a. Good Friday ni a ni a, ka piancham ni tak a lo ni leh nghal a, ka la naupan deuh lai a chhungkua nei ve ni a ka inhriat lai hun te chu ka chhuikir niap niap a. Tanin chhung pindan thim taka ka awmlai chuan tlawhtu ka neih thu min rawn hrilh a, mak ka ti hle a, he khawvelah hian thian min tlawhtu tur ka neih awm ka hre si lo a, min rawn tlawhtu tur awm ka ngaihtuah pawhin han chhui dawn ngaihna ka hre hlawl si lo. Min rawn tlawhtu hmu tur chuan ka pen phei hnak hnak a, inhmuhna pindanah chuan ka lut phei a.
Dawhkan bula lo thu chu ka hmuh ngai awm pawh ka hre lo a, Coat dum suit a ha a, a sam chu veilam zawngin a khuih pial then a, a la upa lutuk lo tih a hriat theih, a tarmit kuang dum bun chu muang chang in a phelh a, a darthlalangte chu an hru pah thuak thuak a. "Ukil i ni maw?" ka han ti ringawt a, uluk takin min en a. Hmel hlimtak puin "Ni mai ang chu, helai hmun atang hian ka la chhuak dawn che nia" a ti a.
A hma dawhkan a thilfun chu ka lamah chuan a rawn nawr tawlh phei a, zaizirin hawng turin min han ti a, chu a thil khai chu ka riltam tawh avang chuan ka hawng phur hle a, a intuamna kawr chu ka han hai hawng rawk rawk a, a chhunga awm chu eitur lam reng reng a ni hauh si lo, mahse ka thil hmuh chuan ka thinlung a deng chiang hle mai a, Ka Pa in a ngainat em em, engtiklaimaha a thlahthlam ngailoh leh a duat em em ‘A Bible' kha a ni tih ka zuk hre thei nghal a, a kawm chhunglama ka tet deuh lai a, kan chhungkaw lem nalh lo tak a pentui sena ka lo ziah pawh chu a ngai ngaiin hmuh turin a lo la awm a, nikhua ka hriat ve tan tirh atangin 'Bible' hi lehkhabu thaber a nih zia leh engtiklai maha thlahthlam lo tura min duhthu kha min chah mawlh mawlh thin kha a ni a.
Ka piancham kum 16 ka tlin hunah chu a Bible chu min pek a tiam nghe nghe a, mahse kha mi ni kha nghak thleng loin kan in kha ka chhuahsan ta kha a ni a, tunah kum 15 lai a liam leh ta reng mai. Chu Lehkhabu chu dim tein ka la kang a, ka pawm a, ka mittui a tla a, nuntharin ka nung tawh ang ka ti mawlh mawlh a.
No comments:
Post a Comment