Pro. Pastor Vanlalchhuanga
Good Friday tih tawngkam lo chhuahna leh an hman tan hun chu Jerusalem-a ‘hapta thianghlim’an hman thin lai kum zabi 4-na tawp lam a ni awm e. Khawchhak Kohhrante chuan ‘Great’ an hmanga, Khawthlang Kohhran ten ‘Good’ an hmang thung, hmun thenkhatah chuan ‘Holy’ tihte pawh an hmang bawk, a awmzia leh a sawi tum chu thuhmun niin a lang.
Good Friday chu kan Lal Isua kan tana Kraws-a a thihna ni champha, lungngaihna ni a ni. A awmzia takah chuan ‘Lal Isua tawrhna leh thihna Ni’ a ni.
Lal Isua chuan a van ropuina zawng zawng kalsanin he lei ah mihring anga lo awmin kan tan, chatuana nun kan neih nan a lo tuar a. A mi hmangaihna nasat em avangin thi khawp hiala a Pa thu zawmin a awm a. Chu mi zarah chuan keini Pathian laka bo tawhte hruaikir a awmin, chatuan nun nei a, Pathian ropuina chang phakah siamin kan lo awm leh ta a ni. Chutiang taka chanchintha hringmi tana rawn thlenna ni pawimawh tak a nih avangin ‘Zirtawpni tha’ tih pawh hi a awm reng a ni.
A zawng zawng leihbuaa, a bak awm leh tawh chuang lova min hmangaihtu, Lal Isua kan tana a inpekna hi kan chhanlet ve dawn le? Lalpa chuan a hmangaih hringfate chan tur leh kaltlang tur chu chiang takin a hmu a, taksa thihna mai bak ah chatuana thihna chu kan chan tur a ni; chu thil rapthlak tak chu ngai ngam lovin a Fapa mal neihchhun chu kan aiah a rawn tir ta a. Lal Isua chu keini mihringte tan Kraws-ah a thi a. Lal Isua chuan thihna in a thlen theih zawng zawng chu thlengin, chu thihna ngei pawh chu a Kraws-ah a hneh ta a ni.
Kraws-ah hian Pathian thiltihtheihna thuruk a awm a, chu Krawsa kan Lalpa thihna avang chuan sual phuarnate chu phelh sakin kan lo awm ta. Chu mi azarah chuan Chatuan nunna neiin chhandam kan lo ni. Kan Lalpa kan tana a nun hlana a thihna ni ah hian kan nun a tan kan hlan ve dawn lawm ni; kan thih aia thi a tho leh atan chuan kan nung ve dawn lawm ni?
‘Kei erawh chuan kan Lalpa Isua Krista kraws lo chu ka chhuan loh tur zia mai chu, chu mi zarah chuan khawvEe hi ka tan khenbehin a awm ta, kei pawh khawvel tan khenbehin ka aw a ni’ kan ti ve thei dawn em le?
No comments:
Post a Comment