KTP HUNRUAT

A hun : Dt.02.03.2015
A hmun : Biak in
Hruaitu : Nl. PC Lalrinngheti, Br. Com
Tantu : Nl.R. Zonunsiami (J)
Thupui : ‘A lo kal leh dawn’
Hawngtu : Pu Richard Lalchhanchhuaha Br. Com.

FELLOWSHIP PROGRAMME
A hmun : Centenary Hall
Hruaitu : Tv. Michael VL Sangliana (A)
Tantu : Tv. R. Lalramenga (A)

A HUN A THLENG TA!!

- C ZONUNTLUANGA

Kum 1993 January alo thlen meuh chuan Diakkawn Branch KTP Member ka lo ni ve ta reng mai. Kan hruaitu tha tak takte hnung zuiin member rinawm tak chu ka lo ni ve ta reng mai. Khang hunlai te kha ngaihtuah kir chang hian lungte pawh a lengin hmuh pawh kan hmu phak leh tawh dawn silo.

Hun hmasa lam: 

KTP Member han nih takah chuan Thalai Inkhawm/Fellowship a ngai a, member thar han nih chuan inthlahrun a na duh thin khawp mai. Fellowship han kal changte hian tawngtai rual a nuam lo thin khawp mai. Zahzum nen, a ri a tawngtai ngai vak bawk silo(h)nen, tawngtai loh ahte ka tlak ve leh thin. Mahse alo rei deuh a, a ri a tawngtai chu ngaiah ka neih ve ta thuai a. Zai mawlh mai kha nuam ka tiin ka kham lo thin hle mai. Thalai Inkhawm/Fellowship ka kal hma chak chhan ber pawh kha hla tamtak lo sak hman kha zuk ni tlat pek a.

Hnatlang:

Thil nuam ve tak chu alo ni. Eng chu maw? Ele, KTP Group hnatlanga hna han thawh kha maw le, nuam ve thei tak chu alo ni. Hruaituten Thinglak, Blanket suk, Leilaih, Huansam etc. hnatlang neih tur tih min han hrilhkual a, kal loh hlau takin a hmasa pawl ah ka chhuak ve vat thin. Pu..eh nilo, Tual Upa Pza hova Tuitun a Blanket suk hnatlang kan neihte kha mitthla ah a la cham reng thin. Khatih hunlai a Group Member mai nilo KTP Member zawng zawngte inpawhtlanziate kha aw, a nawmzia hre velo tan chuan sawi mai pawhin awihawm loh zawk a ni. E....chumi hma Pu.Rochharate ho nena thing kan lak tum kha, Nula U Lungi-te kawtah Motor trip khat zet mai kan han chhung vum hnawk mai a. Nl.U Lungi chhungte lo fel thinziate kha aw! Thing eh zawh hma loh kha chu tlaitin deuh thaw 4/5 vel thing eh paha Dal leh Sangha tin chhumpawlh tui ti tak maia kan ei khawm leh ringawt thin te kha aw. Nuam ve thin tak chu alo ni.

Group Competition:

Group competition chi hrang hrang Solo, Zaipawl, Elocution, Extempore, Debate, Bible Quize, Sports etc.te hi nuam ve tak chu alo ni. “Extempore leh Debate te hi nuam ka tih zawng tak a ni” ti ila awih in awm kher lovang, kei pawhin ka awih bik chiah lo. Mahse, Zai leh Sports lam hi chu nuam ka ti ve hrim hrim. Duh tawk leh phawt ang, thenkhat tan ho si, ninawm an lo ti palh ang.

Thunawi:

Kum 2003 KTP Gen. Conf. Champhaia kan kal tum kha nuam ve tho mai. Inkhawmte a nuamin thleninte an fel bawk si. Conference zawha Rihdil kan han kal mawlh mai kha. Burma ram atang chuan chho ngar ngar in kan thleng a ni mai. A then vanneih deuh Burma Motorah an chuang bawk, Chutah Rihdil kan han thleng ta, Rihdila cheng chak hrim hrim vanga vawt pawh pawisa lova khur dar dar chunga cheng ta te pawh kan awm. Nuam khawp mai. E.Lungdarah ve thung kha chuan tui vang bawk si, tui pump awmna bulah kan thleng, zan khuaa tui pump ri hriat tur awmte kha. Tin, Zemabawkah ve thung kha chuan Thlenin nu Tawngtai thu chhamte kha, Migdash te kha chuan kan theihnghilh ka ring lo.

Tin, Bial KTP Conference te pawh nuam ve thin khawp mai. General Conference Hlabu rin tak tak hma a Conference Hlabu siamte kha ava nuam thin em. Type Writter a kan han chhu ve kauh kauh thin te kha a ni a. Tin,Marturia/thildang C.Nest-a zanrei deuh hlek thlenga buaipui ngai, kuhva lei mai tur awm tawh loh hun vela kuhva chakin panhnah chauh lo chuang leh thinte thinrim si, a rah chauh eitu hriat si, sawingam chiah silohte kha, sawitur tamtak pawh a la awm. Pakhat leh chu College veng indan hmaa Stensil a Marturia print thin lai khan, College veng tlangval pakhatin(a hming sawilo mai ang)Cyclostyle-a Stensil paper nilo zawk a lo pawhthlak te kha, siamrem leh kha buaithlak duh thin khawp mai.

Awle, kei leh kei lovin kan tlak tak duah chu. A then tan ninawm alo nih takin duhtawk dawn tawh mai ila, tu tih dan takah, tunah chuan KTP hi thlahlelin ngai viau mahila, Over lo chungin Over alo ngai ta si, Diakkawn Branch KTP hi ngaiin thlahlel viau mahila, BYE BYE tih alo tul ta si. In rawngbawl zelnaah mite tana malsawmna thlentu ni zel turin duhsakna sangber ka hlan a che u. BYE BYE VEK ULE...

(Article tha tak ziaktu Pu C. Zonuntluanga chungah kan lawm e.  Ed.)