KOHHRAN COMMITTEE THU

    Karhmasa Inrinni khan Kohhran committee neih a ni a, heta an thurel kan hriattur awm te kan han tarlang e
    1. September thla inkhawm hruaitu atan Upa Lalhmingmawia ruat a ni.
    2. Presbytery chhunga inkhawm hruaitu atan Pu R. Lalramchhhana ruat a ni a, Puitling Sunday School zirlai khaikhawm turin Pu Jerry Zoremsanga ruat a ni bawk. Tin, Presbytery inkhawmpui report pe turin Pu Lalthanmawia Ralte ruat a ni.
    3. Presbytery palai kalna tur leh Pathianni a Kohhran mipui inkhawm duhte kalna tur motor lo ngaihtuah turin Secretary ruat a ni.
    4. PYF youth camp-a mikhual lo thleng tlai te tana zanriah siam remtih a ni a, tin, Inrinni a palaite puala zanriah buatsaih pawh remtih a ni.
    Tin, PYF Youth Camp kan thlen turah Greeting sawi turin Pastor R. Lalremruata ruat a ni a, mikhual thlahna thu sawi turin Pu James Vanlalruata, Leader KTP ruat a ni bawk.
    PYF Youth Camp pual hian tawngtaina hman thin tur niin, Inrinni zanah chuan thupui ngheta neiin, Pathianni zan inkhawm banah inkhawm te chhuak lova tawngtaina hi hman zawm nghal thin tur a ni.
    5. Kohhran hmeichhia atanga rawtna lut ‘Kristian chhungkaw campaign dilna’ chu remtih a ni a, a hun atan ni 26. 10. 2014 (Pathianni) zan inkhawm ah a ni anga, campaign Speaker atan Upa H. Lalhuapliana a ni ang.
    6. Diakkawn branch KTP in saiha branch an tlawh huna Kohhran Committee aiawh a kal turin Upa Lalhmingmawia leh T. Upa V. Pazawna, Kohhran representative te ruat a ni a, an pahniha kal man atan hian Rs 500 ve ve tumsak a ni.
    7. Kan Kohhran Missionary Jibon Kumar, Lalhunthari, Lalnunthari, Rebek Lalnunsiami leh Samuel Lalroberta te Cycle leina atan Rs 25000 pek a ni.
    8. Burburia biala Lalnunpuii thawhna khua ah Diamond jubili puala biakin hmun leina an rawn dil chu remtih a ni.
    9. Diamond Jubili puala Ganganagar Pastor biala Tero Mail khua Biakin sakna tur an dil pawh remtih a ni. Tin, November thla a work camp neih rawtna pawh remtih a ni. Tin, Kohhran mi Work camp a kal ve remchang lote tan pawha theih ang tawk thawh ve theihna hun remchang siam tum a ni.
    10. Kum 1955-1986 chhunga Kolasib Pastor bial inkhawmpui rorel minute chu a duh apiang lei theih tura siam a ni a, lei duh kan awm chuan  Dt. 5. oct. 2014 hma in Secretary hnen ah inhriattir tur a ni ang.
    11. Dt 19. 10. 2014( Pathianni) chu NEICC puala tawngtai rual leh thil pek lakkawm hun tura ruat nimahse, PYF Youth Camp nen a inrual avangin  NEICC puala thilpek lakkkawm hun atan Ni 26. 10. 2014(Pathiani) zan inkhawm ruat a ni.

TLEIRAWL NUNKAWNG

 -T. Lalhlimpuii(Sacramen Dept) -    

Thangkhat lian zet chu he khawvel ah hian kan lo awm ve ta, chutih rual chuan tet laia engkim tha veka kan ngaihna kha a bo tawh a, famkim lohna ram a ni tih kan hre chho ve ta zel a ni. Keini tleirawl ho hi min sawi danah chuan intifing, mahni thu duh leh khuahkhirh har mi ti thin. A dik lohna em em ka hre lova, a dikna em em ka hre chuang lo. Ka ngaihdanah chuan tha kan tih zawng hi kan kalpui ve maiin ka hria, kan duhdan erawh chu a dik vek reng bik lova, kawngsual daina laka min veng turin chhungte kan nei a, mahse kan thla a muang chuang lo a nih hi maw! Rilru hah vanga mahni nunna la duh maite lah bo chuang lo, changkanna in min chimbuai zo tawh a, inchhungkhurah hian sual hi eng angin nge a lo luh dawn tuman an hre lo.
    Tleirawl tam tak chu an buainate inbunruahna tur an hre lova, chhungte bulah engmah sawingam lovin khawi khawi emaw a an thiante bulah an tuan nge nge thin. An thiante hi eng ang mi nge tih hi chhungte hian in lo chik ngai em? Hei hi tleirawl tam tak ten an nunkawng an bona chu a ni reng a ni. A tir berah let leh ta ila, engvangin nge chhungte bulah engmah ansawi ngam loh? Chhungte inhawn tawk loh vang nge, inchhungah zalen tawk lovin an inhria hi a ni thei mai lo’ng maw? Zalen chakin an vei an vei a, a tawpah sual bawihah bawk an tang leh thin. Tleirawl tam takin “Ka chhungten min hrethiam lo” an ti a, engvangin nge an hriatthiam loh? Tleirawl nun hmang vek tawh anni awm si a, mahse an hunlai nun leh tunlai hun chu khaikhin chi pawh a ni hek lo, hriatthiam tur pawn an awm lo pawh a ni ve thei tho bawk.
    Changkanna hi kan sawihmaih thei lo a ni e, ‘FB’(lam tawi mai ila, kan hre vek tho a) a khawih lo pawh an awm lo, a khawih zawng zawng hi an sual ka tihna a ni lo, tleirawlte min tiderthawngtu pakhat a ni, ‘Cyber abuse’ te hi a la lar dawn chauh. Engkim hian thatna leh chhiatna a nei kawp vek, a hmangtu a zir a ni thin, fimkhur luat hi a awm thin lo. Kan tan chuan thiante aia hlu hi an awm lo. Chuvangin, nu leh pa te pawh hian in fate buaina hre turin inkawmngeih tawk em? Thian dik tak angin an kawm thei che u em? Mahni fate tan pawha hun neih loh lutuk hi chu a ni lo deuh lo maw? Tumah ka tanna lam a ni lova, tumah ka demna lam pawh a ni hek lo. A dik zawk leh dik lo zawk an awm lova, mawhphurtu kan ni vek.
    Nu leh Pa te pawh hian an hmanlai tleirawl hun leh tunlai hun hi khaikhin tawh lo sela, hmanlaia an  awm ang khan kan awm ve thei tawh si lova, an bula thil kan sawiin, an ngaihdan a  nih loh deuh pawn min lo hau nghal mai lo sela, dawhthei taka kan thusawi an lo ngaihthla ringawt pawh hi kan tan a  hlu a ni. Min lo hauh nghal mai chuan, entikahmah thu kan sawipui ngam tawh lovanga, inchhungkhur nuam kan tihna a bo vek thei a ni. Tunlai thalaite zingah ‘depression’ nei an tam ta hle a, a then chu an inthah phah reng a ni. He natna hi tihdam theih a ni a, chhungkaw tinte kan tanrual chuan inchhung nuam mai nilo, khawtlang nuam tak kan siam thei a ni. Kristian chhungkawni te kan hmanga, chhungkaw kima biakina inkhawm te kha a nuamin, kan hmuhnawm hlein ka hria, khami zan ang khan chhungkaw kim hian vanram hi kan thleng thei angem? Hetah hi chuan nu leh pa te chauh ni lo, keini tleirawlte mawhphurhna pawh a ni ve tawh a ni. Nu leh Pa te min zilhna hi engmah chhan awmlo a awm ngai lo, min zilhnate hi belhchian dawl vek, kan tana tha tur vek hi a lo ni ziah thin tih hi keipawhin ka thil tawn, ka chian em em a ni. Kan nu leh pa te theuh hi kan tan an tha tawk vek a ni, tha tawk lo se, Pathianin an fa ni turin min pe lovang. He khawvelah hian engmah hi tha famkim a awm lo a ni tih hi hriatreng a tha. Chuvangchuan mahni chantawka lungawi thiam hi Kristian ze mawi tak pawh a ni reng a ni. Nun hi a eng lama thlir thiam hi a tha ber a ni, beidawng mai lova bei tute chu an hlawhtling leh nge nge thin.
    Pawh lamah chuan engkim hria leh luhlul nimah ila, hriat loh tam tak kan la nei a, harsatna hmachhawn dan kan la thiam lova, nun a kan harsatnate mahnia hmachhawn thiam turin finna leh hriatna engmah kan nei lo. Puitlinna kawng kan zawhnaah hian kaihhruaina kan mamawh a ni. Keini hi kan ram timawitu leh tichhe thei tute kan ni si a. Kristiante chu mahni thu thu angin kan awm thei lova, nitin mahni inphata, inthununa, inkhuahkhirh tur kan ni.

BRANCH KTP COMMITTEE THU

    Sept 27^th 2014 (Inrinni) zan inkhawm ban khan Kohhran Committee Room ah Committee a ni a, heta an thurel kan hriat tulte kan han tarlang ange.
    Opening balance               - 1,73,201
    Hmuh zawng zawng         - 26,261
    Total                                  - 1,99,462
    Hmanral zawng zawng     - 37,885
    Balance                             - 1,61,577

 1. PYF CHUNGCHANG: Kan hma lawk 17th-19th.10.2014 chhunga kan thlen tur PYF Youth Camp-ah Kohhranin min beisei angin KTP zaipawlpui neih tur a ni a, ‘Lalpa Kohhran ho’ tih hla sak tur a ni, he huna conductor atan kohhran zaipawl conductor Tv. R. Lallenmawia ruat a ni.
    Hei bakah hian PYP  Youth Camp-a special item nei turin PYF Organising Committee atangin  Tv. Andrew Laltlankima (Solo),  male Voice i/c Pu Lalrinchhana leh Silent Angel i/c Nl. Babie Vanlalruati te ruat an nih tuh kan dawng a, Nl. Babie Vanlalruati lo tawiawm tur hian Documentation and Entertainment sub-committee te Branch Committee chuan a ruat.
    PYF Youth Camp pual hian KTP hnatlangpui neih tur a ni a, a hun atan Oct 10 zan leh Oct 11 (inrinni) nileng hun ruat a ni.
 2. KTP BIAL MINUTE: Bial KTP minute kan zawrhchhuah tawh chu hmun hrang hranga a zuartu ten September thla chhung hian a man te tihfel tur a ni.
 3. COMMITTEE MEMBER ACTIVITY: Branch Committee member te activity chu recorder Tv. Lalremngheta Chawngthu hnen atangin May- Aug thla chhung fellowship, thawhtan zan inkhawm leh Nilaizan inkhawm record ngaihthlak a ni a, sawifiah ngaite sawifiah a ni a, Tin, Upa Lalhmingmawia’n fuihna thu a sawi bawk.
 4. October 20, 2014 zanah hian Bial hruaitute’n Vengthar branch an tlawh dawn a, he huna kan branch atanga Items nei turin Tv. Lalnunfela ruat a ni.
 5. Diakkawn Pastor Bial Masihi Sanghati Secy. Pu David Tinky hnen atangin Calendar zawrhsak tura min ngenna chu tihhlawhtlin dan kawng zawn a, Branch Secy. in Committee member te hnenah remchan dan anga lo semdarh mai tura tih a ni.
 6. Kum 2015 Bial KTP Conference a zaihruaitu turin Pu RL. Zonunmawia Bial Committeein an ruat thu kan dawng a, Musicians tur ruat tura min tih angin Programme committee kut ah dah a ni.
7. Bial KTP Sports Oct 23rd a kan neih turah Football leh Volley ball line marking kan branch kuta dah a nih angin hemi zing karah hian hnatlang neih tur a ni.

PRESBYTERY HMANG MEK

   Kan Kohhran(Presbyterian) chuan nizan atang khan mizoram hmun hrang hrangah Presbytery an hmang mek. Keini Presbytery pawh Thingdawl Vengthar Kohhranah he Inkhawmpui hi nghah a ni.
    

Heng mite hi kan Kohhran atanga Palai ruatte an ni.
    1) T. Upa. V. Pazawna
    2) Pu R. Lalmuana
    3) Pu Pazawna Ralte
    4) Dr. C. Lalmuankima
    5) Pu VL. Hlua
    6) Pi Lalruati
    7) Pi Sapdengi
    8) Pi C. Rohlupuii
    9) Pi Rodingluaii
    10) Pu K. Lalrosanga
    11) Pu Lalthanmawia Ralte

KRISTIAN CHHUNGKUA

   - Zothansanga-

 Pathianin ama anpuiin mihring a siam a, mipaah leh hmeichhiaah a siam a ni. Chu mipa leh hmeichhia chu lo inhmangaiha ‘Kristian Chhungkaw’ din turin. Eng nge ‘Kristian Chhungkua’ chu? Kristian Chhungkua chu krista ringtu, a thihna leh thawhlehna tawmpuitu chhungkua, Pathian tih tak tiin kan khaikhawm tlangpui. Mahse, chumi phenah chuan thil tam tak a awm a, a hmasain eng nge ‘Kristian’ tih hi han chhui zau deuh ila. Kristiante chu Isua Krista ringtu tihah hian kan tawp mai thin em? Hnai love Kristiante chu Isua Krista thisena lei kan ni a, a tlan tawhte kan ni. Isua Krista zara chhandamna changtute kan ni.
    A nih leh ‘Kristian Chhungkua’ chu Pathian din a ni a, an chhungkaw Lu ber chu ‘Pa’ a nih angin chhungkaw Lu chu Krista a ni tur a ni. Kristain Chhungkua chuan chhungkuaa Pathian biakho Eg - chhung inkhawmte an thlahthlam tur a ni lova, an fate Pathian hnenah hruai leh zirtir chu Kristian Chhungkua a Nu leh Pate tih makmawh leh an din chhan a ni. Hnamdangte hian tleirawl sual nei miah lovin an tleirawl hun an hmang zo thin a. Mahse, kristian za a za inti te hian tleirawl sual kan nei thin? A then ngaihsam deuhte chuan Mizo zia a lawm kan ti mai a. Mahse Mizo zingah pawh tleirawl sual nei lo tam tak an awm. Heng sualna te hi chhungkuaah inzirtirna a awm loh vang a ni.
    A nih leh engtin nge bul kan tan ang? E!! a kailawn hniamber atangin kan tan dawn alawm. A hmasaber chu naupangte an ni. Rual U zawkte chuan naupangte chuan engmah an hre thiam lo kan ti liam mai mai thin a. Mahse a ni lo naupang te hian tette atanga thu tha hrilhtu, kawng dik kawhhmuhtu an neih chuan sual kawng an zawh hauh lovang. Kristian chhungkua atanga rawn seilian nauupang te chuan Pathian thu te, inkhawm te, Pathian thusawi leh ngaihthlak te a ngaina a, a lo than len hnu pawhin rinna kawngah mi ngaihtuahawm a ni lovang. Mahse nu leh Pa mahni fate ngaihsak lo, zu leh ruihtheihthil ti thin te u, in fate hma hun in dawn tawi lua e, naupangin heng sualte hi an hmuh reng chuan an lo thanlenpui anga ngawlvei leh addict-ah te an chhuak mai dawn a ni. Chuvangin naupangte chungah pawh Kristian chhungkua pawimawhzia te, an hriatthiam dan tawk a kan hrilhfiah chuan zawi zawiin chi angin a lo in tuhin alo thanglian zel dawn a ni.
    Pahnihna ah chuan keini tleirawlte hi kan ni a. Tleirawl/Rawlthar te hian nun zalen neih kan duh hunlai a ni a, mahse heng nun zalennate hi a tha ber angem? Zalen takin kan hunte hmang chho ila, kan hma lam hun kan ngaihtuah ngai em? Ngaihzawng duh rual kan ni a, heng kan ngaihzawngte nen hian lo innei ta pawh ni ila, Kristian chhungkua kan din ngam angem? Kan tleirawl chhoh lai hi mahni tawkah ‘Ka ni’ kan intih hunnlai a ni a, mahse kawhhmuhtu, ngaihsaktu kan mamawh hun lai tak a ni. Kristian Chhungkua tha din tur chuan keimahni hunlai hi a pawimawh ber chu ka ti ngam lova, mahse rahbi hmasa a ni a, ken tleirawl nun kan hman khawloh a, kan hringnun kawng a petek palh a, thihna kawng zawh palh a awl hle a ni. Thu tha hrilhtu, nun hman uluk a, Kristian chhungkua pawimawh ziate inzirtir hun lai tak a ni.
    A dawt leh ah chuan Nula leh Tlangval a ni.. He mi hun hi duhthlanna Pathianin min pek chu fim taka hmangin, hman hmawh lovin duh kan thlang tur a ni. Kan kawppuite hian kan hmalam hun a hril thui hle a. Kan dam chhung kawppui kan thlan fuh chuan Kristian Chhungkua tha, hlim tak kan din ang. Mahse kan thlansual chuan nun a zalen lo ang, Pathian hnaih duh mahse thlei lovin kan awm anga, Kristian chhungkua chu banphak mai si hlatakah a awm dawn a ni. Nula leh  tlangval chinah chuan khawtlang leh Kohhran pawhin mipuitlinga a dah tawh kan ni  si a. Duhthlanna pawh zalen taka hmang thei tura ngaih kan ni. Kristian Chhungkua kan din dawn a Nupui Pasal kan inzawng a nih chuan Biak Ina zawn hi a fuhin a him ber a, Nu pakhat chuan, “Nupui Pasal inzawn dawn chuan Biak In tluk a awm lo.” tiin min hrilh a. Kan kawppui atana kan thlante chu kan damchhung kawppui tur an ni. Chuvangin kan kawppuite nen chuan kristian chhungkua hlim tak kan din thei ang em? Kan kawppuite hi thihna laka min chhanchhuaktu an ni thei a, chutiang bawkin thihna khura min hnukluttu an ni thei bwk. Chuvangin kan kawppui turte chu engang mi pawh nise a tha vek e, mahse chona lian tak chu Kristian Chhungkua dinpui theih tur a ni em tih hi?
    A tawp ber ah chuan, nu leh pate hi kan ni. Mizo chhungkuaah chuan mipa hi chhungkua lu a ni a, engkima hmalatu hmasaber chu mipa(Pa ber a ni tur a ni). He khawvel hi mi chi hrang hrang fuan khawmna hmun a ni a, ringtu tha tak, piangthar tha tak an awm laia pathian pawh la hre lo tam tak kan awm bawk. A hmasa berah chuan nu leh paten bul tan se, nu leh pate chu thingzung lo nise, a rah chhuahtu tur chu an fate nise, a rah dan tur leh a than len dan tur  chu a zungah a innghat nasa em em a ni. A zung a chhiat chuan rah pawh  nei lovin  a thi thei a, mahse a zung a that chuan thing tha tak niin rah duhawm tak a chhuah dawn a ni. ‘Pathianin a zawm tawh chu mihring in then suhse’, tiin keini nu leh paten pumkhata kan insiam dawnin thu tiam a, buaina karah pawh, bawrhsawm ni leh hrisel ni te pawhin nupa an nihna angin an paltlang tur a ni a, pumkhat an nih avangin pathian leh a kohhran hmaah thutiam kan lak chiah khan kan kovah nghahin a awm ta a, chu chu kan kawppuite leh kan fanaute nena kristian chhungkua din a ni. Keini nu leh pate zawng inang lo ve tak kan ni a. Thenkhat ten fate an ngaihtuah em em laiin a thenin an ngaihsak miah lo, eng nge an tih pawh hre lo tam tak kan awm a. Chhungkaw thenkhat chu sualin thununin, zu hmangin pa ber chu a ei chhia a, hei hian nasa takin chhungkaw boruak a tichhia a, an fate awmna pawh ngaihsak lovin an duh dan danin an awm a, pawn an awm tam chuan sual an zir nge nge a, keini lah chuan kan hriatpui lohin sual dum chu an lo dai a, an pil tep tawh chhantu ngaiin an tap a. Engtikah tak keini nu leh pate bengah hian an mangang au thawm chu ri ang maw? Chhungkaw thenkhat chu sum ringawt ngaihtuaha an fate nun ngaihtuah hman meuh lo te kan ni a. Kristian chhungkua chu kan inti si a, kan faten Biak Inah inkhawm thin mahse chhandamtu hnen an thleng em? sum kan duh luatah leia kan rohlu tur kan chan a, an fate chu khawvel thilah nasa takin an tlan a, a tawpah keini nu leh pate bawk kan buai leh a, an pianthar theihnan tiin theihtawp chhuahin zah pawh dawn lovin, chaw ngei ten kan tawngtai a, a tha vek e. Mahse pumpelh dan tha tak chu nu leh pa  ten an tette atangin uap a, an buainate ngaihthlak saka, krista nun kawng dik zawh tir chu a ni lawm ni. Keini nu leh paten kan nun kan uluk loh chuan kan fate kan zilhin thutha kan hrilh ngam dawn em ni? zu ngawlvei khan a fate hnenah zuin lo  turin hrilh ta se, a faten an awih a ngem? Teuh lo mai, an  entawn tur ber khatiang a nih chuan khawvar hun chu a nghahhlelh awm viau ang. Heng mi tam tak karah hian kristian tha tak nu leh pa an la awm tih i theihnghilh lo ila. An ni ang hi kei chuan ka ngaisanga kristian chhungkua a sulsutu pawimawh tak an ni. An nun a thianghlimin an entawn  tlak a, an fate zilh turin an nun an uluk a, kei chuan hetiang nu leh pate hi ka dahsangin an fate chu kawng dik mai nilovin Pathian hnen an thlen ngei ka ring. An chhungkaw nun a zalen a, an hlima, pathian biak ho nuam an ti a, kei chuan hei hi a ni kristian chhungkua ka tih chu.
    Kristian chhungkua tih hian tihvak ngaihna ka hrelo, mahni kan pawimawha, chhungkaw sual tak atang pawn lo seilian mah ila, Kristian chhungkua din nan khua a la tlai lo. Mahnin bul kan tan chuan tihtheihloh a awm lo va. Pathian hian a mite tap thawm  chu chhangin, I tawngtaina nghakin Kristian Chhungkua din turin mahniin bul tan ila tichuan kan lama tang, engkim tithei kan pathian chuan a bak chu a lo ti mai ang. Kristian Chhungkua hlim tak leh belhchiandawl tak din turin keini Diakkawn Presbyterian Kohhran member tinte I tang tlang ang u.