Mapuia Pautu
Mizote hi Pathian thu sawi nasa ber kan ni ang tih hi an sawi thin a, chumai bakah, Sermon aw phawi nei tha ber pawh kan ni hial awm e. Kan hnamdang unau te phei chuan hei hi hrethiam chiah lovin 'Thinrim' emaw te an lo ti mai mai a, a ni hauh si lo! Kum za nufa zet kan lo Kristian ve tak hnu hian Nun lama lantir ai chuan Sawi lama lantir kan lo duh ta zawk pawh a ni fahmiang.
Mahse hei hian nasa takin Kristian nun hi a ti hmaimawk thung si a, kan sawi ‘ring’ tura kan duh ten min ring lova, kan tawngtaisak fo te’n min ngaisang ta lo a nih tak ber hi! Bible kan en chuan Pathian thu hi Nun nen a inzawm tlat tih kan hmu. Chu tak chu kan hmuh hmaih niin a hriat a, Sawi kan uluk a, kan uar a, kan thusawi pawh a ril khawp mai, mahse Nun kan uluk si lo, changsang leh changril nih kan duh lutuk vangin midang mitmei kan veng hman lova, Mizotawng ngei a kan sawi thenkhat phei chu Mizotawng bawk a lehlin a ngai hial tawh nia!
Pathian thu sawitu tur hi ramdang atanga chahluh ngai hauh lova kan intodelh ve na zawng tak a ni. Tuna kan neih ho zawng pawh hi he ram zimte atan chuan an tawk el awl viau, Nun hmanga Pathian thu sawitu tur erawh khawvar lam arsi ang pharh kan ni a ni mai lo maw? Pathianthu sawi hi a pawimawh, kan sawi zel ang, Sermon pawh kan la ngaihthla zel ang, chumi piah lamah chuan a takin i lantir ang u. "Keimahah chuan hmuh tur a awm lova" tih stage kan pel ve ta erawh hi chu a lawmawm thlawt. Mi famkim lo kan nih avanga kan rah dik loh chang awm fo mahse, theihtawp kan chhuahna erawh chu Malsawmin a awm khawp ang.
Mi thenkhat hi chu khawiah mah kalchhuak thei lo tura Biakina kalhhnan reng chakawm an awm thin a ni awm e, Pa pakhatin an nu chanchin a sawi hi a ngaihnawm viau lo, "Biakin ah Thlarau Thianghlim a changa, khuang a rik hlekin a bai chhuak hmasa ber ziah a, inkhawm banah in a rawn haw chiah hi Ramhuai thlarau a chang chhunzawm nghal thin" a ti! Hetiang deuh hi a lo awm theih dawn hle mai a lo ni a. Lam hi Pathian kan faknan a hmanrawh pawimawh tak a ni a, mahse kan 'Lam zo der ang' tih erawh a hlauhawm hle mai. Inkhawm hi Pathian kan fakna leh a thu leh hla hmanga kan intihchakna pawimawh tak anih avangin 'Thenkhat tihdan anga kan inkhawmte bansan mai lovin' nasa lehzuala tan la sauh sauh tur kan ni a, Tawngtai pawh hi Pathian kan biakna kawng pawimawh tak anih avangin kan hlamchhiah hauh tur a ni lo, mahse he'ng thil pawimawh tak tak te hi kan Nunin thiltih a a chawm zui loh chuan bengchheng mai emaw, ninawm mai emaw ah a chang thei.
Nu pakhat chanchin a Monu in a sawi ve thung erawh hi chu a ngaihnawm khawp mai, "Ka nu chu Pathian thu sawi a thiam vak lova, mi zingah pawh sawi tur a hre tehchiam lo, mahse a inngaitlawm em em mai te, amaha Isua hnuhma zawng zawng te hi ka hmuhhmai thei lo." tiin a sawi. I Nupui/pasal leh i fate emaw, i Monu emaw khan i chanchin engtinnge a sawi ve le? Inti Thlarau mi em em ila, tawngtairual khar ziah thei khawpin chham tur hre mahila, zankhatmah inkhawm pelh lovin hunbi chhiarkim thei mahila, kan chenpui ten keimahniah engmah an hmuh si loh chuan, Bible tawngkam takin 'Thlarau lam A AW B' kan zir that leh a ngai a ni mai lo maw?
'Mi piangthar tha tak i hriat duh chuan a thenawmah awm rawh' tih hi fiamthu a ni mai lo, kan ramah hian ramri thangthei hmun tam takah a awm thin a, tuihawkluankawr chesawnthei nen, hetiang ti thin te hi hmun thenkhatah chuan Pulpit chang phak hial te pawh zu ni thin a! Kan Kristian dan hi hmanlai Upa in 'Tang' an tih ang chauh kan ni ta, a tak hmuh tur awm si lo, a thawm chauh a lian ta mai a nih hi. Kohhran hruaitu atana thenawmte thlan duh loh hlir kan awmkhawm ang tih a hlauhawm.
'Thlarau Mi' tih hi kan hrethiamsual deuh emni a tihtheih a, Tawngtai zo hleithei lo te, Hla sak zawh tawh hnu pawh a lamtuala la vir la vir ho te chauh hi thlarau mi ah kan dah deuh em? Hla siamtu chuan 'Pathian Thlarau hruaia awm apiangte chu Pathian fate an ni' a ti mai. Thalai kohhrana inhmang em em, fel tak leh inpe tak, thiante bulah chuan 'A ka pawh zen ila min seh lovang' tih khawpa zaidam thenkhat pawh hi mahni in lamah chuan Tum tlat, biak huphurhawm khawpa vin zuk awm theih tlat a! Nu leh Pa leh Unau te pawhin an kaihthawh that ngam mang loh thalai, an tihdik loh ah pawh nu leh pa te hauh ngam loh thalai hi mi piangthar tha tak a awm theih angem le?
Kum 120 tehmeuh kristian nun kawng kan zawh tawh chung hian chawm ngai (Spoon Feeding Kristian) kan la tam in, kan kristianna hian Principle nghet a nei mawh khawp mai. Hei vang hian kan ram chhunga min chenchilhtu hnamdang leh Sakhaw dang bia ten kan nun an hmuh hian 'Milem be sakhua' aiin 'Kristianna' hi a thatzawkna an hmu tlat lo reng a ni. Eiruknan leh Sum thianghlim lo khawihnana kan tihbawrhban hnu kan kut te pawh Chawlhni chuan Coat suit nalh tak takin kan khuhbo hmak mai zel a, mahse Pathianin a hmukar si a.
