Kohhran - Pathian khawpui (Sam - 87:3)

- Pastor H. Lalhmingmawia

Kohhran tih thu hi kan hriat zin tak, kan ngaihthah fo thin a ni. A awmzia pawh kan bo lo viau awm e. “Hna thuhmun thawk tura koh chhuah, thlan bik, Lalpa chanpual, Lalpa ta” tihna te a ni. Kan Bible ah Kohhran sawina tawngkam engemaw zat a awm a, chung zinga pawimawh tak chu ‘Pathian Khawpui’ tih hi a ni.

Sam - 87 : 3-a inziak ang khian, Kohhran chu Pathian Khawpui a ni. Khawvela ram khat khawpui reng reng chu rorelna hmunpui, lalthutthleng inbunna hmun a ni deuh zel a ni. Tuipuiral tawng takin “Centre of Goverment’ a ni thin. Mizoram khawpui chu Aizawl a ni a, India ram khawpui chu New Delhi chutiang zelin USA khawpui chu Washington D.C a ni. Hengte hi rorelna hmunpui a ni zel a ni.

Kohhran hi khawvela Pathian rorelna thutphah innghahna hmun a ni a, mihring tam lamah te, pawnlam atanga a lan danah te Kohhran ropuina hi a innghat lo. A neitu leh roreltu Pathian avangin a nghet a, a chak a, a dik a, a tlo a ni. Kohhran chuan inrelbawldan hrang hrang a nei a, rorelna keng kawhtu bik pawh an awm thin. Chungte chuan Pathian duh danang zela rorelna a kal theih nan, fimkhur tak leh Pathian rawnin an rel thin. Kohhranah hian Pathian duh dan aia mihring duh dan a lal tawh chuan Kohhran chuan a nihna a hloh tawh a ni.

Sam - 46: 4 ah chuan Kohhran chungchang thu hetiang hian kan hmu, “Lui pakhat a awm a, chumi peng te chuan Pathian Khawpui chu a tilawm thin. chungnungbera awmna hmun thianghlim chu. Pathian chu a lai takah a awm a, a nghing lovanga, Pathianin khaw fing chah hunah chuan atanpui ang. Sipai hote Lalpa chu kan hnenah a awm a, Jakoba Pathian chu kan kulhbingsang a ni,” tiin.

Hmanlai khawpui te chuan hmelma laka an him theih nan kulh an nei a, ralvengtu an duty bawk thin. Kohhran ho himna kulhpui chu Lalpa a ni a, ralvengtu atan a thu thianghlim hi min pe a ni.

Ral tamna hmunah chuan khawpui pawn lama awm a him lo angin, kohhran pawn lama awm te hi hmelma pa tan hnen an awl thin. Ralvengtu chuan hlauhawm a awm leh awm loh te, inralrin a tul leh tul loh te mite hnenah a hrilh thin a, ralvengtu thu anga awm te chu an him thin.

Kohhran ho vengtu chu a inthlahdah ve ngai lova, a muhil ngai hek lo. Amah rawntu apaingte tana himna pe turin a inpeih reng a ni. Sam - 121 : 3 chuan heti hian a ti, “Nangmah vengtu chu a muthlu lovang, ngaiteh, Israel ho vengtu chu a muthluin a muhil hek lovang” tiin. Mahse, amah rawntu tur kohhran ho hian kan rawn tam thin loh avangin kal dan leh awmdan kan thian lo fo, chuvangin kan him lo thin a ni.

Kohhran chu Pathian rorelna, a lalna, a chenna leh khawpui a ni a, chu khawpuia awm te chu hlauhawmah pawh an him thin a ni.