Kum zabi ral hial kai ve ta nafam chu Mizoram Kristianna pawhin hma a sawnin a invawrh sang ve hle a. A thawm thangva leh thu hlaah ngat phei chuan kan duai lo hlein a lang. Amaherawhchu, a hniak kan zui Nazareth Isua hniak kha kan hloh ta nge a tak man fuh a ram kan awm lawi si lo hi a ngaihthatthlak chiah lo zawng a nih hi. Mizoram Kristiante hian zui tur dik tak kan zui em tih kan chhuithiam theihnan Nazareth Isua nun leh a ze langsar tlem azawng atangin i han chhui teh ang.
(1) Nazareth Isua chu khawvel leh a ropuina hawisantu a ni : Nazareth Isua chu Judai-Thlalerah Setanan khawvel ram zawng zawng leh a hausakna te, a ropuinate chu man tlawmtea lei tura a zawrh thu kan hmu a. A itawm ngawt ang le. Mahse Nazareth Isua chuan khawvel hausakna leh ropuina hmanga a ram din chu duh lovin a hawisan ta hmiah mai a nih kha.
Keini Mizo Kristiante erawh chu khawvel ropuina, hausakna leh nawmna thlahlelin kan tlan sung sung a, mi chan ang chan ve loh hlauvin leh mi chanbak pawh chan tumin kan inpawt peh pheng phung mai zawng a nih hi. Nazareth Isua kha zawng hetiang ti mi a ni si lo a, keini hian ropuina leh nawmsakna te, hausakna leh mi ngaihsan nih chak Isua em ni kan zui tak le?
(2) Nazareth Isua chu Lu nghahna neilo Isua a ni: Lehkha ziaktu pakhat chuan Isua hnenah a kalna apianga zui a duh thu a rawn sawi tih kan hmu leh a. Isua erawh chuan kawng danga chhang ta lo chuan Mihring fapain Lu nghahna reng a neih loh thuin alo chhanga, a pian dawn zan ngei pawh khan Khualbukah a leng ve ta lo a nih kha. Nazareth Isua kha zawngin In leh Lo chu sawi loh, Mihring Society-ah hian hmun a chang ngang lo a ni.
Mizo Kristiante erawh chuan In leh Lo leh inbenbelna tur ngaihtuah reng rengin rilru leh thinlung, kan tha leh zung kan hmang ral a, mawi leh mawilo pawh hre chang lovin kan hai buan buan a, miharsa zawkte chan ai ngei pawh kan inlaksak duh hial mai zawng a nih hi. Kan zui duh zawk chu Lu nghahna In leh Lo nei tha leh nei changkang Isua dang a ni mai lo maw?
(3) Nazareth Isua chu mi tak, danglam ngailo Isua a ni : Isua ngeiin,”Keimah hi kawng leh thutak leh nunna ka ni” tiin a sawi a. Nazareth Isua chu Pathian a insiamchawp lovin Pathian tak a ni a, mihring tak tak a ni bawk. Mi takzet a nih avangin amahah chuan ‘Ni leh Ni lo’ a inpawlh ve lova,dawt leh rinhlelhawm a awm ve hek lo.
Nazareth Isua zawng danglam zung zung leh rilru thlak zung zung a ni lova, niminah nen vawiinah nen, kumkhua pawhin a pangngai reng dawn a ni. Mizo Kristiante erawh zawng kohhrana rawngbawltu tangkai tak takte pawh lehlamah thawh eng tak te, hmanni lawka kohhran mi rinawm taka lang, tuna zirtirna dik lo leh pawl nei mang lova lo awm leh ta mai mai kan kat zung bawk a. Kohhran mi tha awm tak belhchian chi lem loh, rawngbawltu fel tak, phakar si te kan ni leh tlat thin. Hetiang ringtu, takna neilote hian mi tak, Nazareth Isua hi zawng kan zui lo a nih hi.
(4) Nazareth Isua chu ‘Amen-a’ a ni : Johana hnena inlar Nazareth Isua chuan ‘Amen-a, thuhretu rinawm leh dik taka’ ti a a inhriattirna kan hmu leh a. ‘Amen’ tih hi Hebrai tawngin,”Ni rawh se” tihna angin an hmang. Amena a nih ang ngeiin a Pa Pathianin a hna tur a tuka, misualte kuta mantir a nih tur te, Vuak leh sawisak hrepa a tawpa mualpho taka tihhlum a nih tur thute chu a Amen-thlap a.Nimahsela keia thu nilo in nangma thu thu ni zawk rawhse” a ti a.Thi khawp hialin a Pa thu chu a Amen tluan chhuak thak mai a ni.
Mizo Kristiante zingah hian ‘Amen’ tih rik a har hle mai, amaherawhchu, ‘Amen’ tih kan au chhuahpui lai hi Lal Isuan kan tana a hnathawh ropui zia an sawi kan hriat loh lai leh kan chan a lo vawn deuhna lai, chanvo tha kan channa lai thuah hian a ni deuh zel. Isua tana nung tur, tuar tur, inpe tur leh insengso tur kan nihnate hi kan nun tak tak hian a Amen thei em le?
Awle, chutiang tak chu Nazareth Isua, a hniakhnung kan zui theihna tur entawn tur min sawisaktu nun a nih si chuan Mizo Kristiante hian Nazareth Isua hnung hi kan la zui zel dawn nge? Kan duhzawng leh tha ngeihzawng Mizoram Isua hnung kan zui tawh mai dawn? Vawiin hian tu rawng nge kan bawl a kan bawl zel dawn tih i inngaihtuahnawn leh thin teh ang u.
Lalpa’n a thu malsawm rawh se.
