- Rev. Rosiamliana Tochhawng
Mizoram Sorkar-in MLTP Act siamthata thlahdul a tum chu duhloin Mizoram Presbyterian Synod chuan Poster tara MLTP act hlih an duhloh zia tihlan an tum a, hemi chungchangah hian Presbyterian Kohhran demna a tam hle a, a lo do tawh leh sawisel chak zek zek tawhsa phei chuan rawl an chhuah ring hle.
1. Thenkhat chuan sorkar kalphungah sakhua/kohhran a inrawlh tur a ni lo; a inrawlh nasat lutuka ramin a chhiatpui zia chu History-ah a lang reng, tiin Taliban te entirnan an sawi a, a dikna chen a awm. Mahse hmanlaia sakhuain sorkar a thunun ang kha tuna kan dinhmunah thiltih theih a ni tawh lo tih kan hre awm e. Talibante angin Synod emaw Mizorama kohhran engmah hi an che lo tawp ang. Ram mipuite tana tha tur nia a hriatah chuan sorkar a ngenin a kar a, a duh ang te pawh a auchhuahpui ang. Chu chu kan dikna chanvo a ni. Tupawhin, eng pawl pawhin an duh ang an auchhuahpui thei alawm. South Africa-a Apartheid dan hlip tura kohhran hruaituten an nawr nasat zia te (Desmond Tutu-a chanchin chhiar ula a hriat mai); USA-a Civil Rights movement a hmahruaitu ber pawh Rev. Martin Luther King a nih kha. Philippines President Marcos-a paihthla tura lo pen chhuaka hmahruaitute kha tute nge? Catholic puithiamte an nih kha! Tunah hian Kerala-ah pawh hian zu dona beihpui an thlak a, na taka sorkar kara demonstration te siama hma la chu catholic thalai te an ni; mak ang reng tak chu Kerala sorkar hian zu chhiah a lak atanga 3% chu zu do nan hman tur, 1% chu Health Department-ah zu avanga damlote enkawl nan hman tur tiin Zu ngawlveite enkawlnan a vaibelchhe tel sorkarin de-addiction centre te a pe. Mipui tana tha tur nia a hriat a tih hian kohhran hian kuang lo nawrah a inngai lo.
2. "A nih leh Seventh Day Adventist hian vawksa ei loh nawr ve ta se kan duh dawn bik em ni?" ti pawl an awm. Synod hian a thurin chawivawn nan leh tihlar nana zu do a ni lo, mipuiin kan chhiatpui em nia a hriat avanga he thil hi ti a ni. Vawksa ei hi ram mipuiin kan chhiatpuia khap ngaia nia an hriat chuan Seventh day te pawh chuan sorkarah thlen se an zalenna a ni ve tho alawm.
3. "Corruption hi do zawk awm, kan ramin kan chhiatpui zawk daih si a," "Corruption an do ngam tak tak lo, an sumhnar a chat dawn si a" ti pawl an awm. Corruption do kawnga thahnemngaihna ai mahin Zu chungchanga mi rilru hruaikawi tumna a ni. “Zawk” a awm lo a, a pahnih hian kan do. Kohhran chuan a tir atangin hlemhletna a do a, Kristian nun kaihhruainaah pawh hetiang lak fihlim tura zirtirkan ni. Kum 1982 khan Corruption do kumah Synod-in kan puang tawh a, tunhnaiah pawh Hlemhletna that lohzia uar leh zuala inzirtir turin Synod-in a pass a, lehkhabute (booklet) te siamin nasa takin kan bei. Thuhriltuten an sawi reng a, kan chanchinbu leh Drama lamah te pawh hei hi kan tilang nasa khawp mai. Hriatna tura beng nei chuan hre rawh se! Corruption do hi thil harsa tak a ni., mahse corruption atanga sum lo lut te hi tumahin kohhranah hian rawn thawh lo mahse pawi kan ti lo, chumi avang chuan kohhran pawh hi rethei mah ila a pawi miah lo. Mahse thilpek pek hi a petu lam mawhphurhna a ni.
4. "Kohhran chuan thlarau lam thil chuah buaipui rawh se" titute tho hian Kohhran hi hlemhletna do turin an duh leh si khawp mai. Pathian hi thlarau lam Pathian chauh a ni lo a, leilung leh a chhunga thil awm zawng (awm zawng zawng ti mai ang) siama enkawltu a nih avangin chu Pathian betu leh a duhzawng tih tumte hian taksa leh thlarau nun tichhe thei zawng zawng chu kawng hrang hrangin kan do zel ang. Kan Pathian hi Pathian te tak te, taksa lam thil hlamchhiah a ni lo ve.
5. "Kohhran hian zu zuar leh zu ruite a hrem/phuar ngam tak tak si lo" an ti a, ni e, zu zuar leh zuruite hi kan thunun vek lo. Kristianna hi Juda sakhua leh Hindu sakhua anga dan sakhua (legalistic religion) ni loin khawngaihnaa innghat sakhua (religion of grace) a ni. Kohhran thununna hi sual hremna ni loin thiltisualin tisual a ni tih a inhriata an sim theihnan leh kohhran thianghlimna vawnnana tih a ni. A theih chhung chu siamthat tum phawt hi Isua min zirtir dan pawh a ni (Matt 18: 15-18).
6. "Zu kan khap hian zu chhia a tam a, chu chu kan chhiatphah a, a in duh ten zu tha an in theihnan zawrh law law mai hi a tha" tih hi tam tak ngaihdan a ni. Amaherawhchu zu tha hi zuar mah ila, zu chhia a rem dawn chuang lo a, a tam zawk hial mai thei. NIMHANS in an zirna atanga a landanin zu tha pangngai litre 10 an hralh apiangin zu chhia litre 12 hralh ziah ang a ni. Zu khap lohna leh duhtawka lei tur a awmnaah pawh zu tha lo chu a tam em em tho. Zu tha zuar ta ila, tuna zu zuar te nen hian inelna lian tak a awm nghal ang. Mipui sum dinhmun enin kan in tam zawk tur chu zu chhia a ni tho a ni ang.
7. Zu khap burna hlih hi mi vengva leh chinchang hre deuh te chuan an duh a, khapbur duh ho hi mi mawl deuh ang dawn dawna sawi te hi kan awih em? Mahatma Gandhi khan India a hmangaih khawp mai, "India ramah hian Dictator ni ila ka tih hmasak ber tur chu zangnadawmna pe hlek loin zu dawr zawng zawng ka khar nghal ang" a ti a nih kha. India rama vantlanga thatna tura thawk nasa em em Anna Hazare-a te hi zu khap tura theihtawpa beitu a ni. Mizo zinga mithiam leh hawizau tam takin zu khapbur hi an duh, vantlang rawngbawl hna thawktute hian zu khap an duh zel a ni ang, kohhranin kan duh a, YMA pawhin an duha theihtawp an chhuah. Engvanginnge Synod hian zu zawrh hi a duh loh? Engvanginnge zu khapburna dan hlip lo tura sorkar a nawr? MLTP Act avang hian Synod hian sum leh paiah hlawkna engmah a dawng lo a, hamthatna a dawn phah lo. Chuvangin kohhran hian hamthatna zawn nan emaw, intihtheih nan emaw hetiang thil hi ti a ni lo a, mipui tana tha tur ni a a ngaih vang liau liauin sawiselna tam takah karah huaisen takin a ti a ni.
