BRANCH COMMITTEE THU

    Dt.28.08.2014(Ningazan) khan Kohhran Committe Room-ah Kristian Thalai Pawl ten Committee an nei a, chuta an thurel tlangpui chu hetiang hi a ni.
1. Treasurer Reports :
            Opening Balance         - Rs 96,362.00
            Hmuh zawng zawng     - Rs 1,22,588.00
            Total                            - Rs 2,18,950.00
            Hman zawng zawng     - Rs 46,130.00
            Balance                       - Rs 1,72,820.00
2. Faith Promise : August thla chhunga Faith Promise lut zat Rs 25,210.00 a ni a, bial 4 atangin a lut lo a ni.
3. Retreat : Committee hmasain ruahmanna siam tura atih angin Branch O.B tena Committee Retreat neih hun tur ruahmanna an rawn siam chu thlir ho a ni a, hetiang hian pawm a ni.
    A hun         : 23rd Sept, 2014(Inrinni)
    Speaker     : Pastor R. Lalremruata
    Shift thumah hun hi then tur a ni a, kohhran representative te pahnih Upa Lalhmingmawia, T. Upa V. Pazawna leh Pro. Pastor Vanlalchhuanga ten hruaina hna an thawk ang.
4. Saiha Branch kan tlawh tura pawimawh leh hriat tur tulte sawi ho a ni a, Branch zaipawl min kaihruai turin Pu David C. Lalremsiama ruat a ni.
5. Bial KTP Conference 2015 kan hman tura kan Branch atanga special Items turin heng te hi ruat an ni.
    Female Voice     - i/c Pu David C. Lalremsiama,
    Duet                  - Tv. Robin Lalsangkima leh Nl. Norris VL. Thathangi
    Live Band          - i/c Pu RL. Zonunmawia
6. Bial KTP Sport : Dt. 23rd Oct,2014(Ningani) a bial KTP Sport kan neih tur atan tul leh pawimawh zawng zawng lo ngaihtuah turin Sub-Committe hetiang hian siam a ni -     Chairman     : Tv. Lalremngheta Chawngthu
    Secretary     : Tv. R. Lallenmawia
    Members     :  Pu David C. Lalremsiama, Tv. Ramngaihzuala,     Tv. K. Zonunmawia, Tv. R. Laltanpuia, Tv. C. Lalngaihzuala, Tv. Joseph Lalnunzira, Nl. K. Zorampari leh Nl. PC. Lalrinngheti.
7. Male Voice leh Female Voice Competetion kan neih hun atan 8th Sept,2014 ruahman a ni a, hei hi Kohhran Committee in Beihrual programme a siam dan a zira tih danglam leh tur a ni. He inithsiakah hian Male Voice leh Female Voice hi intihsiakna hrang ve ve tur a ni.
8. 17th.Nov,2014 ah Hosea Group Night leh 1st.Dec,2014 ah Mika Group Night hman tura rel a ni.     

SUNDAY SCHOOL RAWNGBAWLNA A PAWIMAWH

   -  C. Zomuanpuia -

Thla kal liamta July 29 zan khan Centenary Hall ah Sunday School, naupang lam department zirtirtu te chuan kum danga kan tih thin ang bawkin 'Meet' kan hmang leh a. Hemi tum zirtirtu meet ah hian, a hranpaa zan lama hun hman a ni a, 'Meet' kan lo hma tawhte ngaihtuahin zirtirtuten kan ngai pawimawh tlang tih a lang, kallote kal theihloh chhan pawh chiang takin department leader ten an sawi theih vek kha hmasawnna lawmawm tak a ni.
    Tin, seminar type-a meet kalpui a ni kha a hlawkthlak. Upa Ralliantawna'n, 'Sunday School Zirtirtu Rawngbawlna Pawimawhna Leh Mawhphurhna,' tih thupui hmangin paper a buatsaih zir hi ho a ni a, group hrang hrangah inthenin sawihona neih kha a hlawk a, paper buatsaihtu in buatsaihna tha tak a thlawn lovang tih a rin theih.
    Hetianga Sunday School rawngbawlna kan sawi lai mek hian tu emaw tawngkam takin, 'duhthu samah sam luat a awm nem maw,' an tih ang mai khan he rawngbawlna bika duhthu sam tawk lohna thenkhat rilru ah a lo lang ve nghal zut zut a, sawizawm a chakawm tlatin ka hria.
    Naupangte thinlungah Biakin inkhawm pawimawhna tuh hi thil tul leh tan lakna tur tak ni pawhin a lang. Amaherawhchu naupang lam enkawl thiam, zirtirtutha deuh nia langte hi puitling zirtirtu atan kan sawn hma thin mah mah em aw? A nihna takah chuan puitling chinah chuan chhia leh tha hre vek tawh kan ni a, Sunday School pawh kum tir lamah buk viau thin mahse kum laihawl a thlen hma atangin nuihzatthlak khawpin a thawl hman ziah bawk. Hei hi kumtin kan 'buaina-mo' a ni. Zirtirtu tha tak tak te pawhin zirtir thin mahse puitling chinah chuan, kan duhna in mi urthluk miau chuan kan in au ding zo lo tih a chiang hle. Hei vang hian naupang lam zirtirtu atana tha deuh, kum lamah pawh la valai tak takte puitling zirtirtu atan dah thuai thuai duhna awm thin lak kian a hunin ka hria.
    Sunday School Secretary ruat chungchangah hian rilru sen a tul hle. Tuna kan kalphungah hi chuan experience la nei tlem deuh, a pa/nu tuai deuhte chanvo ah kan dah nghet emaw ni tih awl tak a ni. Chuvang chuan zirtirtu, class la thei tura training-na ang deuh ni maiin a lang a, hei hi enchian a tul hle mai. Khawi pawl leh Association pawh nise Secretary te hmangchang hria leh hre lo kar, mawng zang deuh leh rit deuh kar a hla hle thin. Hetiang thil kan ziah avang hian, 'Tuna Sunday School Secretary te hi an tha tawk love,' tihna lam a ni lova, 'kan iai' tihna a ni hek lo. Kumin bikah chuan Secretary te an ruat fuh tum ber a ni hial mai thei. Amaherawhchu, kan sawi chhan berah Secretary 'chi' deuh bik erawh mihringah an awm in a lang. Heng mite hi kum dangah pawh dapchhuah hram hram ni thei sela a tha hle. Sunday School ka awm ve tawhna chinah Secretary ten hmangchang an hriat tawklohna avanga tu-khaw-kha hriatpui hleihlohva Leader te buai châk châk tum hi ka nang ve ta nual. Hei pawh thahnem ngaihna thil a ni.
    Tin, Asst. Leader dinhmun chungchang hi a ngaimawhawm hlein ka hre bawk. Pawl leh Association dangah chuan Vice emaw Assistant te reng reng hi a puitling zawk ni tura inzirna 'rahka' pakhat a ni ve thin. Sunday School-a Assistant Leader dinhmun hi chutianga khawvel pawl leh Association dang ang chu a ni hauh lo, khawvel thil angin 'protocol' zawng pawhin thlir theih a ni chuang lova, tehkhin theih lah a ni hek lo. Mahse nakin atan Sunday School Department Leader tha tak, tha tho tak, naupangte leh zirtirtu dangte kaihruai thiam tak ni thei tura mi kan chherchhuahna pakhat ni ve se, chutiang tura her rem chu a tha, a hun viau tawhin a hriat. Tuna Leader te awmloh chang apianga hruaitu dinhmun luahtir ngawt lo deuh hian kalphung felfai zawk leh an chanvo chen tur pawh mumal takin a siam theih ngei ang. Chutiang mi tur pawh chu kan Kohhranah hian mi fel tak tak, inpe tak tak an awm nual a ni.
    A tawp berah chuan Kohhran in Sunday School a ngaih pawimawh em em lai hian a ziaktupa ngei pawh telin zirtirtute kan induhkhawplo tih chu 'Meet' kan neih zan hian kan sawi nasa hlawm hle. Hetiang karah hian zirtirtu inpe tak tak an awm teuh a, anni rawngbawlna zarah kan lang mawi thin. Sunday School piah lamah mahni zirlai naupang, an chenna in lama tlawh zat zat theite hi an va chhuanawm thin em! Mihring tak pawhin heng mite rawngbawlna hi Pathian pawhin mal a sawm tam deuh bik ngeiin ka ring tlat thin. Chutih laiin zirtirtute zingah khawsak leh incheina lama 'inthlahdah' kan tam hle bawk. Midang khawihpui ngam loh Mobile phone kan nei em? Lang lo chinah Kohhran duhloh 'ZU NO' lo dawm mai thei kan awm em? Mahni in enlet a tha. Pathianni zing inkhawm dar hmasa a rik rualin naupang thahnem fe in Sunday School an thleng tawh thin, Biakin leh a vela zirtirtute awmdan leh nungchang an entawn avangin zirlai piah lamah tan lakna tur a tam hle. Inkhawm kal hma chungchang pawh sawi fe tham a ni. 'Kaltlai hi a contract ta emaw ni le?' tih hial theih khawpa kaltlai 'regu,' zirtirtute zingah kan awm fo mai pawh hi hmasawnna tur lian tak a ni.
    Sunday School zirtirtu atan educational qualification a ngai lova, a dil a dil chi a ni hek lo. 'Khawngaih Rawngbawl Hna' a nih ang ngeiin thahnemngai taka mahni theih tawkah rawngbawl mai hi kan tih tur a ni.