KOHHRAN INCHHIARNA

    Kohhran dinhmun dik tak hre tur hian kum tin August 31 apiangin  inchhiarna neih thin a ni a, chu inchhiarna atang chuan hetiang hi kumin 2014 Diakkawn Presbyterian Kohhran  dinhmun mek a ni.
    Diakkawn Kohhran ah hian dan zawhkim, dan chhungah awm zat chu 1787 kan ni a, tin, puitling dan zawhkim, mahse dan zawhkim lo mi 5 kan nei mek. Chutihrual chuan, naupang kum 14 hnuai lam Baptisma chang tawh 654 an awm mek a ni. Tun ah hian kan kohhran chhungah hian thunun lai mi 72 an awm mek a,  tin, naupang Baptisma la chang lo 22 kan nei mek bawk.
    Kohhran chhungah hian Mipa zawng zawng hi 1228 kan ni a, tin hmeichhia zawng zawng hi 1312 kan ni a, a vai a belhkhawm in 2540 kan ni. Kumin chhung hian kan Kohhran huang chhungah naupiang 41 awmin, thi zat chu 14 an ni. Hetihrual hian, Kum 6 chin hnuai lam zawng zawng zat chu 262 an ni a, tin, Kum 6 chin chung lam 2278 kan awm mek. Kum 6 chin chung lam ziak leh chhiar thiam hi 2274 kan ni a, chutihlai in, he mi chin ziak leh chhiar thiam lo 4 kan awm mek bawk. Mipa ziak leh chhiar thiam 1098 kan nih laiin Hmeichhia ziak leh chhiar thiam 1176 kan awm bawk.
    Diakkawn Kohhran huam chhungah hian chhungkua, kan kohhran mi hlang awmna chu chhungkua 528 niin, in awm pawlhna chhungkua 24 kan awm mek bawk a ni.

1	Dan zawhkim thar zat	49
2	Thunun lakluh zat	24
3	Puitling Baptisma chang thar zat	13
4	Naupang Baptisma chang thar zat	63
5	Pawl dang atanga lo pakai zat	18
6	Ringlo hming pe thar zat	4
7	Kan Kohhran chhuahsan zat	9
8	Thunun zat	29

NAUPANG SANDE SIKUL INKHAWMPUI

       Naupang Sunday School Beginner Department atanga Intermediate Department ten Bial chhung Kohhran hrang hrangah Naupang Sunday School Inkhawmpui an neih dawn avangin Sunday School an nei lo vang. Hetiang hi Department hrang hrang ten inkhawmpui an neihna hmun tur leh kal dan tur zirtirtu tena ruahmanna an siam dan a ni.
    Beginner Department - Diakkawn Kohhran
    Primary Department - Khuangpuilam Kohhran
    Primary Department te hi zing dar 9-ah Biak Inah kim vek tur a ni a, a huhova Bus a kal tur a nih avangin tumah tlai loh tur a ni. Inkhawmpui thlengtu ten chhun thingpui an buatsaih dawn avangin haw lo va chawhnu inkhawm nghal turin awm tlang vek tur a ni bawk.
    Junior Department - College Veng Kohhran
    Intermediate Department - Vengthar Kohhran
    Intermediate Department Zirlaite a hranpa a kalna tur ruahman a ni lova, mahni remchan dan ang a kal mai tur a ni a, zing dar 9:30 aia tlai lovah inkhawmpuina hmun thlen hman vek tur a ni. Inkhawmpui thlengtu ten chhun thingpui an buatsaih dawn avangin haw lova chawhnu inkhawm tlang nghal tur a ni.

    Zanin atanga tan hian Diakkawn Pastor Bial Naupang Sande Sikul Inkhawmpui chu Diakkawn Pastor Bial Kohhran hrang hrangah tan a ni dawn a, he inkhawmpui a kan Kohhran atanga chanvo nei tur te

    1. Endiktu :
     (a) Tv. Lalremngheta Chawngthu (Beginner Department)
     (b) Pu James Vanlalruata (Primary Department)
     (c) Tv. Lallawmzuala (Junior Department)
     (d) Pu R.L Zonunmawia (Intermediate Department)
     2. Zirlaibu chhung zawttu leh zawhna siamtu :
     (a) Pi H. Lalmuanpuii (Beginner Department zawhna siamtu)
     (b) Pi Lalbiakchami ( Primary Department zawhna zawttu)

DIAKKAWN KRISTIAN THALAI PAWL LEH GOSPEL CAMPING

    - Upa K. Thangmawia -

 

Kristian Thalai Pawl thiltum pali zinga a hnuhnung ber “Krista Chanchin |ha Puan Darh” tih hi a pawimawh em mai a. Kum 28 vel lai kal ta - 1986 June thlaa Diakkawn Branch K|P in he thuvawn a bawhzui dan hi i lo thlirkir leh thuak thuak teh ang u hmiang. Kha’ng hun laia Diakkawn K|P hruaitute pawh an nihna chiah pawh ka hre tawh lo va, an hming pawh kalte zing atangin a remchang chang ka han sawi mai dawn a ni.
    Diakkawn Branch K|P hi Cachar District chhunga ringtu awm ve thalaite nen kan inhmelhriatin kan thawkho tha thei hle a, Cachar-a thalaite hi K.J.S(Kristo Jubo Songho) an invuah a. Annual Meeting an neih pah hian Gospel Campaign an nei tel thin a, chumiah chuan keini Branch hi min sawm ve thin a, Gospel Tract sem te, mipui kohkhawm nan kan zaithiam te rawih turin min han sawm ve thin a, Fellowship hlimawm tak tak te neih thin a ni a,  hlawktakin hun hman thin a ni. Pu C. Zothanmawia te, Pu F. Lalrimawia te, Pu H. Vanlalpeka te an han chet tak tak chuan vai ho chuan vanram tlafual an chen hi a ni ringawt mai thin, an Annual Meeting hi an nghakhlelin, \in hun an huphurh thei hle thin a ni. Kristian inpawlkhawmna hlawkzia an temin an chhawr thin hle a ni. Hetiang hian Diakkawn KTP hming hian vawi duai lo zin chhuah a ni a, zin chanchin ngaihnawm tak tak sawi tur a awm zel mai a, Pu C. Zothanmawia ten kim leh ngaihnawm zawka min la ziahsak hlan a nghahhlelhawm khawp mai!
    Tichuan heti hi a lo ni ta a; kum 1986 June thla tawp lam chuan KTP Committee thurel bawhzuiin Cachar District chhunga Kalahore hmuna Gospel Campaign tur chuan Diakkawn KTP member engemawzat chu Kalahore panin kan chhuak a. Bagha Bazaar-ah chhukin Kalahore-a kalna tur motor kan ngaihtuah a. Kalna tur remchang kan hmuh hnuin kan chhuak a, tluang takin kan thleng a. Kalahore hi Baga Bazaar atanga chhimchhak lam kilometer 8 vela hlaa awm a ni a. Khua a tha a, lum lamah chuan duhthusam a ni!! Keini chhuak hi zaithiam leh an thuam famkim nena chhuak kan ni a, Drum Set leh a kaihhnawih chhepchher te nen kan rirup mai a, chutihlaia tlangval, Pu Lalrimawia leh Pu CT. Mawia te chu zai lama a hmatawng te an ni a, an neu lo hle.
    KALAHORE CHU LE : Kalahore chu khawlian tak a ni lem lo chungin Cachar lamin Evangelist/Tirhkoh an lo dah ve a, Mizo hnahthlak chu ani ve in ka hre ta? Kan han thleng chu kan han inphihfai a, chawhnu lamah Campaign-na tur thlenin atanga Kilometer khat vela hla Primary School Building chu kan han phiatfai a, remthat ngai te tihfel hnuah kan hawng leh a. Silchar atangin Rev. R. Lalengkima a lo kal bawk a, ani hian Mizo takin vawksa kan hmeh turin vawk sum 4 vela lian, min leisak a, Silchar-ah hian vawksa a ei khat deuh ni tur a ni, a lei huai em mai! Chawhmeh chu a tha khawp mai, ei tawk kan thiam ange maw?
    CAMPAIGN BORUAK CHU LE! : Karimganj atangin tawng thiam an lo kal bawk a, annin thu an sawi a, keini KTP zaithiam ten mipui hip nan hla an rem tlut tlut bawk a. Khua a lum thin bawka, silhfen inbel thuah chuan kan duh chhah lo hle. Tawnzau hak pawh kan phal, kekawr lam erawh chu a tlawn a tawk! Zaithiamte pawhin tawnzau chauh hain muk takin Pathian fakin hla an sa thei, ropui danglam tak chu a ni e. Campaign Speaker-in thu tha tak tak sawi mahse ngaithlatu beisei angin an tam lem lo thin a, thahnemngaih ang huin a hlawk vak lo emaw tih a awl.
    Zirtawp zan leh Inrinni nileng leh zan chu P/S-ah hian Campaign hun hman a ni a, Pathianni-ah erawh chuan tirhkoh In bulah Tarpauline zarin kan inkhawm a, Ringthar awmsa ten Baptisma chan an duh mamawh bawk a, Rev. Lalengkima’n a chantir a. Pathianni chawhnu leh zan lam pawh hemi hmunah hian hlim takin kan inkhawm zui ta a.
    HAW TAWH MAI ILA : Campaign hi nuam viau mah se a lum a, a hun ruat a lo tawp tawh bawk nen Thawhtanni tuk chuan haw zai kan rel ta a. Kal lam anga motor hman haw tur a awm tawh si lo, kan zaithiam ho chhepchher te chu engti chuan kan ti dawn ni ang maw le? Pathianin rem min ruatsak a, kan tlangvalho te remhriatin Sakawr nupa/rual chhawr tur a lo remchang hlauh mai a. A tam zawk chu mahni mutbu puin kan kal a, Pu R. Laldinliana leh Pu R. Lalthianghlima(L) te erawh chu sakawr pute nen Drum Set leh bungrua rit zual phurin an kal ve thung a. Vawksa te a tui bawk a, mi thenkhatte kha chuan kan lo hleuh deuh nge ni, kalkawngah chawlh zeuh zeuh, hmun biru zawn te a tur thin ta niin a hriat a. Chubakah, kan sakawr chhawr pakhat chu a nu lo niin a ‘vanglai’ a lo ni hlauh mai chu niin, kan unaute pawh an buai ve thin hle nita in a hriat a(Pu Din, sawi vek lo mai ang aw!) Tichuan, buaidan inchen lo takin Bagha Bazaar-ah chuan kan inhlang fel ve leh ta a. Bagha Bazaar-ah hian haw na tur motor ngaihtuah lehin kan tlangval tlawmngai ten motor an han zawng hmu leh ta mai a, tichuan chawhnu her bawih ah Kolasib Diakkawn chu kan thleng ve leh ta a. In lamah Branch member ten min lo hmuak bawk a, hlim taka inchibaiin mahni in lam kan pan ta sang sang a. (Han sawihawn takah chuan Silchar Campaign tuma thlipui tleh te, Karimganj Campaign tuma Bandh hlaua Easter Sunday chawhnu lama kan tlanchhe haw te kha a ngaihawm ve ang reng!)

KTP HUN RUAT

INKHAWM PROGRAMME (08/09/2014)

Male Voice & Female Voice Competition
A hmun        : Diamond Judilee Hall
Hruaitu         : Pu K. Lalrosanga, Secy.
Tantu            : ‘Chapona’
Hawngtu       :Pu R. Lallawmkima,Comt
F. Promise    : Tv. Joseph Lalnunzira,Comt

Competition Programme
MC’S            : Tv. H.F Laltanpuia &
                        Nl. Angela Zorintluangi
Endiktute      : Upa H. Lalhuapliana,
                        T. Upa. V. Pazawna
                        Pu. C. Lalrochhara

FELLOWSHIP PROGRAMME
A hmun       : Centenary Hall
Hruaitu        : Nl. Jenny Hmingthanfawni
Tantu           : Tv. Lalsiamkima(J)
Thupui         : Thurin 10-na
Hawngtu      : Pu K. Lalrosanga, Secy.     Sound Hlan : Pu RL. Zonunmawia, Secretary Property

MEDAL DAWNG DAWN

   Kumin Naupang Sunday School inkhawmpuia kan Kohhran atanga Medal hrang hrang dawng tur te:
Pi Zaii Medal(SS kum 10 kaikim)
  Hming              Pa hming
Lalrinhlui                 John Lalhruaitluanga
Vanlalruati               Lalrotluanga
Laltluangliana          R. Lalnuntluanga
David Lalrinkima    Sangmawia
Lalrinhlua               Rokima
Zorinmawia            H. Zoliankhuma

Zalawra Medal(Kum 5 honour)
Hming                          Pa hming
Rebek Lalrinfeli            Upa H. Lalhuapliana
Rinmalsawmi Ralte       Lalremruata
Isak Malsawmkima      Upa H. Lalremliana
H. Lallianmawii            H. Lalremsanga
Jeremy Lalsangliana     Jerry Zoremsanga

Diploma Award(Kum 25 SS Zirtirtu)
Hming                               Pa hming
T. Upa V. Pazawna         Upa Thangkunga(L)
H. Lalremmawii               HL. Zamliana

MUSIC - ZAIPAWL LEH A KAIHHNAWIH

  - LR Pachuau -

     Awmze neia ‘Ri’ (sound) chhuak tawh phawt chu ‘music’ (rimawi) a ni, tiin hrilhfiah a ni thin a. A huang a zau khawp mai. Khuang kan vua a, kan zai a, tingtang kan tum a, kan vaw ri bwk a, tin, thil engpawhin awmze nei leh kalhmang fel tak neia ‘ri’ a chhuah tawh phawt chu ‘music’ chuan a huam thei ta vek mai a ni. Chuti a nih chuan mihring nunah hian music chuan a tha zawng emaw, a chhe zawngin emaw hna a thawk thei dawn tihna a lo ni! Music huangchhung atangin kristiante tan Rock Music hi luhchilh a rem lo e, setana hmanrua a ni tih thu-ah ngaihdan a phir thin hle a nih kha! Hnamtin hian hnambil music hi kan lo nei theuh awm a sin. Khawvel mihringte hian hma kan sawn zel angin rimawi pawh chuan hma a sawn ve zel tih erawh a lang reng a ni.
    Kohhran huangchhung atanga rimawi kan hmelhriat tlanglawn te han bihkual thuak thuak ila a tha awm e. Kohhran mipuite kan tel vek theihna chu Pathian biak inkhawma kan zaiho hi a ni phawt mai a. Chutah chuan khuangpu pahnih, hla hriltu pakhat, tin keyboard kan hmang tangkai hle tawh bawk a. Heng kan sawite hi nuam ti taka kan zaiho theihna tura dinhmun pawimawh taka awm te an ni....
    Zaipawl (Choir/Chorus) han tih chuan zaia rawngbawltute ti ila a chiang ber awm e. Kohhran hunruat pawimawhah zaipawl zai ngaihthlak tur a awmloh chuan a kimlo riauin kan hre tawh a nih hi. Conductor, Convener/Director leh member-te infinkhawm chuan ‘Zaipawl’ a siam ti mai ila a fiah tho awm e. Chutah member te chu Soprano (S), Alto (A), Tenor (T), Bass (B) ti tein thliarhran an ni leh a. SATB tiin an sawi mai. SA hi hmeichhe sak niin TB hi mipa sak tur a ni ve thung.
    Soprano (S) chu hmeichhe aw in music note a sak theih sangber hi a ni mai a. Music composer te chuan chi hrang hrangin an thensawm leh teuh mai. Alto (A) hi contralto tiin kan hre bawk a. Hmeichhe aw laihawl bass part nena inzul tak a ni a, a thum tur erawh a ni hauh lo a, a rik dan tur hi man fuh a ngai khawp mai. Tenor (T) hi mipa sak tur niin mipa aw tlin theih sangber a ni. Bass (B) hi mipa sak tur niin mipa aw in a tlin theih hniam ber a ni. Soprano hi leading part ti ta i la, a dang te hi a pawlhmawitu an ni a tih theih ang. Amaherawhchu, zaipawl ni tur chuan SATB hi a awm kim vek a ngai a ni.
    Zaipawl ti-zaipawl-tu ber chu sol-fa a ni ti mai i la a sual tam lovang, sol-fa note hmanga zai thin a nih avangin. Conductor te an hah thinna em em pakhat chu memberten sol-fa kan nello leh kan thiam tha tawklo hi a ni fo! Memberten zaipawl conductor chu music instructor a nilo tih hria i la, chutih rual chuan sol-fa chungchanga memberte harsatna sutkianpui chu a tihtur a ni thung ang. Memberten sol-fa kan manfuh tawk loh avanga tihsual hlau reng renga kan zai hi a tam awm a sin.
    Double Chorus hi zaipawl sak mi tho memberte pawh tam tham deuh ngai a ni a. Music composer thiam tak chuan SSAATTBB tia then hrangin hla an siam thin a ni. Tichuan, zaipawl hlawm hnih hlawm thum awmin a rualin hla pakhat chu music/note hrang siin sak theih a ni dawn tihna a ni.
    Solo - Solo chu mi pakhat (mipa/hmeichhia) sak tura music remkhawm hi a ni mai a, chung hmanga hla satute chu soloist an ni. Music kalphung a zirin hei pawh hi thensawm a ni leh nual mai. Duet - Hei hi mi pahnih inkawpa sak tura music duan a ni. SATB form a awm ve tawh lo. Trio - Hei hi mi pathum inkawp sak theih tura music remkhawm a ni. Quartet -Mi pali sak theih tura music remkhawm a ni.
    Group Singing - A hmasaberin member pali chauh awmna zai chu group singing a tling lo a ni tih hriattur, quartet tih mai zawk tur a ni. Member 5-8 awmna zai hi group singing ti ila a fiah mai awm e. Tunlaiah zaipawl leh group singing hi kan sawipawlh ta nawk nawk mai. Member 10 pawh tlinglo te hi zaipawl kan ti ta zel mai!
    Music zirmite tih dan ah chuan male voice (group singing) ah chuan SATB form hmang tawh lovin TTBB - Counter Tenor, Tenor, Baritone leh Bass angin an sawi thin a. Mipa aw a nih dawn avangin tenor aia sanga music an siam chu counter tenor an ti mai a, tenor part pahnih a awm tihna a ni. Mipa aw tlanglawn ber bass leh tenor inkara awm turin music an siam a, chu chu Baritone a ni.
    Female voice (group singing) Hmeichhe aw hi hlawm lian tak chi thumah then hran an ni a - Soprano, Mezzo-soprano, Contralto tiin. Mipa angin bass a awm ve tawh lo. Heng chi thum hmang hian hmeichhe sak tur music remkhawm a ni thin a ni. Music-ah chuan hmeichhe aw bika a sangber chu soprano a ni tih kan hria a, contralto pawh hmeichhe aw bika a hniam theih ber a ni tih kan hre bawk a. Soprano leh contralto inkarah hian hmeichhe awin a sak tur music note an siam leh a, chu chu Mezzo-soprano an ti a ni.
    Hengte hi a tlangpui an ni mai a. Zaipawl a ni emaw, music term ah chuan thensawm a la tam em em a ni. A tawp berah chuan music lama hma kan sawnna tur rahbi pawimawh tak pakhat chu sol-fa kan thiam hi a ni e!