- Remremi Pu
He Khawvel ram zauvah hian zirna avanga nihna ropui tak tak nei te, an thiltih leh nundanin a phu em avanga nihna ropui tak tak nei te, thlan leh mi ruatbik an nih avanga nihna neite tam tak an awm a. Thenkhat chuan nihna avanga mite ngaihsan leh zah phur tak te, thenkhatte erawhchu an nihna avanga zah phur lem lo te pawh an awm bawk a. Nihna thenkhat chu engemaw hun chhung atan bik, hunbi neite a ni a, thenkhat erawhchu dam chhunga nihna te a ni. A tlangpui thuin heng nihna hrang hrangte hi mimal chanvo, midangin an tawmpui lem lohte a ni a, nihna ropui leh zahawm tak pawh nise, an chhung leh khatte a huap fo lem lo.
Hriat a tlem a, thiamna lah a sang lem lo bawk a, nihna chi hrang hrang zinmgah a neitu mimal baka nupui leh fanau, a chhung leh khatte thleng huapa tawngkam kan hman tam pawl tak chu ‘Kohhran Upa’ nihna hi a niawm e. Nihna dawngah hetiang hi a awm ve reng reng lo tihna chu a ni lovang chu. Doctor fa Damdawi in kal peih lem lo, damlo kan leh tanpui pawh peih lem lo a awm theih a, damdawi lam chanchin pawh hre lo ve tak takte pawh a awm theih awm e, chutiang mite chu a pa nihna hmangin, ‘Doctor fa si..a chuti a khati....’ kan ti lem lo a, a pa nihna chuan kan phuar tir hran lo, mi dawizep tak pawh a pa ‘pasaltha’ nihna hmangin kan dem fo lem lo. Kohhran Upa zet erawhchu a nupui fanaute leh chhungte thleng thlengin, ‘Kohhran Upa Nupui si....fa si....Chhungte si...’ tiin a nihna neitu ni ve hawt lo te hi kan sawi kan sawi thin. A bik takin a tha lo lam leh mawi lo lamah hetianga sawi hi kan uar a, hman a remchang bik nge, a ni te hian an phu ve reng chu ka hre lo. ‘Kohhran Upa pal pin....in sak....’,sawi tur a tam awm e. Inthlannaah thlan tur bik hming tarlang lem lova inthlang tur nazawng lahin a chin chhuaka zawm chuang silo hian ‘Kohhran Upa inthlanin’... kan ti mawh hek lo.
Kohhran Upa nihna danglam tak pakhat chu a nihna pawn lam thleng pawhin a nihnain a phuar tlat hi a ni awm e. Thildang nihna nei tamtak hi chu an nihna huang pawnlamah chuan an nihna hian a phuar lutuk lem lo a, an nihna nen sawi zawm hram lah a rem vek hek lo. Ram khata nihna ropui tak pawh hian ram dangah chuan awmzia a nei lem lo. Kohhran Upa erawhchu Kohhran Upa a nihna pawn lamah pawh a nun dan leh chet dan, a thusawi leh nungchang zawng zawng teh nan a nihna chu kan hman sak a, amahin Upa a nihna ziak langa thildangah a hming aziah lan vaih erawh chuan nihna ‘chapo pui’ talhfiakin kan vaw zui lawi si thin. Nihna dangte hi chu nihna an neih hma a an nun dan leh thiltih atanga teh an nitlangpui a, an thiltih leh nundanin a phu em avanga nihna neite an ni tlangpui a, an nihna cheih zui turin thil thar dang tih a ngai tehchiam lo, nihna a neih hnuin a nihnain tihtur leh tihloh tur a phut zui thui lutuk lo a, nihna an neih hmaa an tih ngailoh tih thar ngai ta leh ti tura beisei an ni fo lem lo. Kohhran Upa nihna erawhchu an nih hma aiin an nih hnuin tihtur leh tihloh turin a phuar tam sawt a, chu nihna chuan an nundan leh awmdanah pawh phut a nei zui tlat thin a ni. An nih hmaa an tih ngailoh thil tam tak tih tharte a ngai a, an nihna chuan an nunah phut a nei zui tlat a, chu chu a tih theihloh chuan nihna nei tlak lo, nihna phu loah a siam thei thin.
He nihna danglam tak leh pakhat chu, nihna dangte chu mi bik tan a ni tlanmgpui a, mi zawng zawng tan leh a duh apiang tana nih ve ngawt remchang lo te a ni a, nih ve duh hle mah ila engtikahmah kan nih theih loh tur hrim hrim chi te pawh a awm. Mi huaisen leh tlawmngai, sa leh ral hmaa zam ngai lo tan lo chuan ‘Pasaltha’ a nih ngawt theihloh a, zir thiamna bik nei lo tan chuan ‘Doctor’ a nih ngawt theih hek lo. Kohhran Upa ni tur erawh chuan zirna in ramri a kham lo a, huaisen leh dawizepin awmzia a nei tam heklo, hmelin puak ti lo mahse kawngkhar hnan a ni chuang lo, athlangtu ten lungrual taka an thlan a nih phawt chuan ‘lawr’ pass lo pawh nise, hmelin puak tilo mahse nih theih a ni.
Kan sawi tawh ang khan Kohhran Upa chu tehna chi hrang hrang hmanga teh leh teh tlin harsa tak, tumahin an tlin lo’ng e tih tur khawp ni mahse khawtihah hian an awm miah lo na chu a awm lo ang e thi tur khawpin an awm lawi si. Nih chak leh phu nia inhria apiang an ni ringawt lo a, tling lo leh phu lo inti tam takte an ni leh lawi si.Taima tak leh thahnemngai taka thawkte chuan ‘an thitur ve reng an ti’ a ni mai a, inthlahdah deuh leh midangte tih ang leh nun dan anga nung te erawh chuan an nihna an timualpho thung si thin. Kohhran Upate tan hian awmdan thiam a har ngawt thin ang chu.
Nihna tamtak chu an nihna avanga hamthatna dawng te, sum leh pai lakluh nana hman theih te a ni a, hlawh hmuh phah nana hman theihte pawh a ni awm e. Kohhran Upa nihna erawh chuan mite rel leh sawiselna bak a hlawh chhuak tam lem lo. Engemaw hlekah an tana tawngtai tam ber niawm ang ziaziangin kamchhe tleuh nana hmang lah kan tam, nihna zawnga nih chakawm lo ber a ni hial awm e.
Tichuan, Kohhran Upa chu mite thlarau leh tisa a nun dantur tha kawhhmuhtu, amah leh a chhungte enkawl thiam mi. a nun dan leh thiltih, tawngkam leh chetzia zawng zawngte a nihna hmanga teh thin, amah atanga thiltha leh mawi chhuak tura beisei, chaklohna leh tlin lohna tamtak nei si, a nupui leh fanaute awmdan avanga a nihna mualphopui thei a ni. Chumai a la nilo, Kohhranho zawng zawngte demkai phahna tur pawh a mimal nun chuan a kengtel hiala mawi a ni bawk. Kohhran Upa nihna hi damchhung atan(thankhatah chuan hun chhung nei) a ni a, mahse a awmdan leh nun danin azir loh chuan hlihsak theih a ni.
Thlirna dang atanga thlir erawh chuan mite thlarau lam nun hawlh thleng phak rawngbawltu nihna anih avangin midang ang mai mai a nun chu a remchang lo hrim hrim a ni. Chuvangin, “Tupawh Kohhran hotu atan duh chuan hnathawh tha a duh a ni”, tih hi a dik a ni. ‘Chutichuan Kohhran hotu chu sawiselbo, nupui pakhat nei, insum thei, rilru dik tak, mi fel, mi lawm dan thiam, zirtir thiam, uain ruih hmang lo, mi velh hmang lo, mi nunnem ni zawk tur, kawhmawhbawl lo, tangka sum ngaina lo,zahawm taka fate kilkawia mahni inchhung khawsak rel fel thiam mi a ni tura ni;(miin ama inchhung khawsak mah a rel fel thiam siloh chuan Pathian Kohhranho engtinge a enkawl theih ang?) Ring thar mi a ni tur a nilo, chutilochuan chapovin a awm ang a, diabola thiamloh channa chu a chang ve dah a nge. Chunglo pawh chu pawn lama mite fakin a awm bawk tur a ni, chutilochuan sawichhiata awmin diabola thangah a awk dah ang e.(I Tim.3:1-7)
