SUNDAY SIKUL THU

Sunday School Chawimawina hrang hrang dawng thei ni a langte Kohhran Notice Board-ah leh a hnuaia tarlan ang hian Marturia-ah kan han chhuah a. Tih sual palh awm thei a nih avangin dawng thei ni a inhria, hming tarlan ve lohte chuan naktuk Pathianni thlengin Tv. Lalthakima, Asst. Secretary i/c NPSS hnenah kan dinhmun zawh leh enfiah theih a ni e.

                                           


















                                       

KUM 10 KAL KIM
Hming	Pa Hming	Department
1. Lalhruaimawii	John Lalhruaitluanga	Sakramen
2. Biakmuanawmi	Lalnunzira	Sakramen
3. Lalfamkimi	Zomuankima	Senior
4. R. Lalhriatpuii	Rodinsanga	Senior
5. Varnuntluanga	Lalmuankima Varte	Sakramen
6. Samuel Lalruatkima	H. Vanlallawma	Sakramen
KUM 5 HONOURS
1. K. Zobiaktluanga	K. Zarzoliana	Junior
2. Lalrinpuia	Joseph Lalrinawma	Junior
3. H. Lalhmangaihsangi	H.V.L Sawma	Junior
Junior
4. P.C Laltlansangi	P.C Lalthatzama	Junior
5. Jacinta Lalhmangaihzuali	David Lalnunhlima	Inter.
6. T. Lalhmangaihzuali	Lalramdina	Inter.
7. Laldanglovi	Zonunzama	Sakramen
8. Lalrohlui	Lalduhawma	Sakramen
9. Lalhruaimawii	John Lalhruaitluanga	Sakramen
10. Samuel Lalruatkima	H. Vanlallawma	Sakramen
KUM 10 HONOURS
1. Ludi Lalhruaizeli	Upa H. Lalhuapliana	Senior

PRACTICE VE TEH LE..

- Enga Ralte

Tunah khan eng dinhmunah nge i awm? Eng nge i chungah thleng mek? Chu chu nangman i hre chiang ber ang.

Hei hi han ngaihtuah teh..Eng nge i sawi hnem a, i ka atanga chhuak ngun ber? Awle, dinhmun duhawm lo takah kan dinga, harsatna, natna, buaina, manganna,te’n min chim a, vai kian tumin theihtawp chu kan han chhuah ve takna a, a kiang mai thin si lo a. Tichuan, chung kan thil tawhte chuan min hneh tial tial, kan sawi kan sawi a, engmah a sawt chuang si lo, a tawpah phei chuan a sawi pawh kan sawi peih tawh lo a, kan tuar tlawk tlawk a, mahni kan inhmangaih a, beidawnna khurah kan lut a, vanduai bik ni a inhriatna kan nei fo thin.

Mahse hei hi i  hre thar teh ang u. Thufingte 12: 14 “Miin a tawngkam chhuak rah chu a seng anga, a ma kut thiltih ngei chu a hnena hlan a ni ang.” Kan tawngkam chhuak rah hi kan seng dawn a ni tih hi thufingin min lo hrilh tlat.

I na a nih pawhin i  nat thu kha sawi suh. I harsatna tawh kha sawi suh, i kamchhuak rah i seng tur thu kha hre reng rawh. ‘Ka buaina hi a kiang dawn Lalpa vangin, a vuakna vualahte chuan tihdam ka ni tawh a, ka dam tawh’ tiin sawi fo zawk rawh, kamchhuak rah seng tur kan nih kha.

Kan thil sawi hnem hian kan nun hi a hruai thui em em a, chuvangin eng nge sawi tur tih hi ngaihtuah chian a lo ngai em em a ni.

Tunah i na a ni maithei e, tunah mangannain a tlakbuak che a ni mai thei e. Mahse ‘Lalpaah chuan tihdam ka ni tawh, ka mangannate hi Lalpa’n a hneh tawh a ni’ tiin sawi fo zawk rawh, a rah chu i tel khawp ang. 

Engtikah nge? Eng hun ah nge? tih chu chunglam thu a ni a, mahse, i ka ngei a Lalpa i tan a, i damna thu a hriattir tawh che. I sawi i sawi rah chu Lalpa ah i seng em em ang.

Hmahmawh lo la, Lalpa lamah tangtlat rawh, i thil tawn mekte hmangin hmelma pa’n i ka tih an a tum a nih pawhin, huai takin dodal la, Pathianthu in I nihna a puansak tawh che chu i ka ti angtu ni zawk fo rawh se. Kan Pathianthu hi a daw  ngai si lo a. Matthaia 12:30 ‘Tupawh ka lama tang lo chu mi do a ni, tupawh mi lakkhawmpui lo chuan a tihdarh a ni.’ I thinlung, i ka leh i thiltih hmangin Lalpa lamah chuan tang tlat rawh, sawi la, sawi leh thin rawh, a rah chu nangmah ngeiin i la dawn si a.

I nat, I mangan, I harsat thu i sawi fo khan Lalpa lamah i tang lo tihna a ni zawk a ni. ‘Ruk hmang chu ru tur leh tihlum tur leh tichhe tur lo chuan a lo kal lo’ a tih kha, i ka kha ruk hmang lamah antir phal suh la, i ka ngei khan Lalpa chu tan tlat rawh.

MIPUI CAMP

          -Tv. Lalthakima

            Kum engzah nge ral tawh ka hre chiah tawh lo a, kan \hianpa pakhat hi 'Pianthar lamte pawh hi ngaihtuah ve deuh tawh la,' tiin kan thianpa pakhat dang nen kan fuih a, ani chuan, "Piantharte chu a hmanhmawhthlak hleihnem," tiin min chhang a. Mahse a tuk tuk leh vel lawkah chuan motor accident-in a boral thut mai a, ami nghawng a nain ngaihtuah a tithui duh hle. Thihna hi kan rin ai hian a lo hnai a, pianthar hi la hmanhmawhthlak loh ni a kan hriat ai hian a lo hmanhmawhthlak a lo ni.

"Vawi tam tak camp ka lut tawh, ka tha ve thei tak tak lo, hremhmun aikaih ka ni ang," tiin hmanah kan thianpa pakhatin a sawi a, a bei a tidawng hle. Heti ang deuh hian tuna kan Camping siam mk pawh hi 'Ka sawtpui ve tak tak chuang lo ang' ti eng emaw tawk kan awmin a rinawm. Mahse beidawng mai lovin zawn dan dik leh beisei dan dika Pathian beisei chungin Camping luh i tum zawk ang u.

Eng rilru puin nge Camp kan luh ang…

Camp lut mah ila Lal Isua kan tawn ngei loh chuan 'Gospel Camping ringawt hian min siam tha zo lo a, Lal Davida angin tha rei thei lo mihringte hian kan nun min siam\hat fotu tur Lal Isua kan mamawh' tih kan hriat a tul. Chuvangin, Lal Isua nena intawnna tak tak neih tumin kan lut tur a ni. Tam tak chuan Lal Isua tawn em em pawh tum lovin 'Camp chhuah ni atanga zu in tawh loh tan, nghei tan, inkhawm tan, fel tan' ringawt tum leh ngaihtuahtein kan lut fo thin. Luh ni a kan ruih luh fo chhan pawh hi Lal Isua tawn leh zawn tumna tak tak kan neih loh vang niin a lang. Chuti ang rilru pu-a lut ta na na na chuan Lal Isua kan tawng lo ngei a, kan han tha rei thei lo ngei bawk a, kan bei kan tidawng chiam thin a lo ni.

Sam number 119:2-ah chuan 'A thu hriattir zawmtute chu an eng a th^wl e, thinlung zawng zawnga zawngtute chu' tih kan hmu. Chuti ang chuan Lal Isua zawngtu leh Amah beiseitu tak tak ni chunga kan luh chuan kan ruih luh chiam theih a rinawm loh a ni. Chuvangin, Lal Isua hmuh leh tawn tum tak zetin l<t ila, kan la tawn ngai loh thil ropui inthup chu kan hmu ngei ang.

Tin, 'Lalpa hnathawh chauh changa, a thawktu Lalpa chan si lohte hi thil awm thei a ni' tih kan hriat pawh a tha hle. Lal Isua nena inpawhna tak tak kan neih theihnan a hnathawh kan chang hmasa thin a, chu a hnathawhah chuan duhtawk mai loh tur a ni. A hnathawh lo chuan amah ngaihna leh pan duhnate kan nei thei ngawt lo a, amah vekin inneihna tak tak kan thlen theih nan a hnathawh min lo chantir \hin a ni; 'Pa mi tirtuin a hip loh chuan tumah ka hnenah an lo kal thei lo vang (Johana 6: 44)' tih ziak ang khan. Lal Isua nena innei miah loa a hnathawh changa tah te, lam te, phar te, tuite a awm theih a, chu'ng chu 'Piantharna' emaw kan ti fo bawk. Chuti ang dinhmun atanga sual bawih ata kan chhuak hleithei lo thin hi camp luh duh loh phahnana beidawn chhan tur a ni lo. Pathian thu nung tihnun ngai lo tihthih zawh rual loh, a duh ang ti zo zawk \hin leh thiltih nei lova kir leh ngai lo tawn tur kan la nei zawk tih kan hre reng tur a ni.

'Kohhranin Gospel Camping a siam dawn' tih kan han hria a; luh duhna te, Lal Isua mamawh inti-a amah zawn duhna rilru neia camp luh kan han tum tlatte hi kan fel viau vanga nei kan ni lo a, Lal Isua kan pan theih nan 'a hipna/ a hnathawh' kan chang a lo ni. Mahse a thawktu kan la chang si lo; camp lut turin kan insiam chauh a la ni si. Chuvangin, a hnathawh bakah a thawktu chang turin kan inbuatsaih a pawimawh em em a ni.

Vawi tam tak camp lut tawh chuti chunga ringtu nun kawng zawh thei ngang lo kan nih avangin kan that theih lohahte hian beidawng tawh ila. Mahni maia that tum tawh lovin, min titha theitu chunglam ata thiltihtheihna ngei chu tawn tumin bei ve tawh ila; 'In chhungah ka Thlarau ka dah ang a, ka dan siamah ka lantir ang che u a, ka thupekte chu invawng ang a, inzawm ang(Eze. 36:27)' tih ziak ang khan. Mahni hriat d^n dana pianthar tum tawh lovin, min tipiangthar theitu awmchhun Lal Isua hnenah kan buaina zawng zawng thlen tumin lut mai ila. Thlamuan tuma tan lak chiam ngai tawh lovin, min tithlamuang theitu tawng zawk ila. Chhandam nih tuma \an lak chiam ngai lovin, misual min chhandam theitu tawn tum ve tawh thung ila. Chawlhna dik tak changa chuta chawl turin rilru i'n siam teh ang u.

Pathianin ringtu nun kawng min zawhtir a tum dan leh zawh kan tum dan hi a inpersan thin em mai! Pathian thu hi hel nuai chi a ni lo. Lal Isua ringin/chhawrin/hmangin, a nghawngkawl bat chungin ringtu nun kawng i zawh theuh ang u, chutah chuan kan thlarau tan chawlhna kan hmu ang. 

KAN TIHDAN HI A THA EM?

                                                                       - C. Zothanmawia

A kum chiah ka hre ta lo, kum 5 chuang zet chu a ni tawh ngei ang, tuna kan thu ang deuh hi Marturia ah vek hian ka ziak tawh a, Tuna KTP member tam zawk hi chu a chhiar pha lo deuh vek in nih tawh ka ring. Chuvangin a tharin, Update chung zelin han ziah that leh ka tum a ni.

Mizote hi mi tihdan entawn ching tak kan ni a. Amaherawhchu, a ziktluaka entawn erawh kan nei tlem hle niin a lang. Chutianga mi tihdan kan entawn chu tam tak sawi tur a awm. A then a zar chauh lo en ila.

1. Wedding Veil: Veil hi mo thuam zinga pakhat a ni a, Lukhum a ni lo a, Lu cheina pawh a ni hek lo. Hmai khuhna a ni. A hman dan pawh hetiang hi a ni: Inneih hmain mo hmel chu puan var langtlang thei (lace) in an khuh (Veil) a, chu chu inneih thuchham leh tul dangte tih zawh a nih hnuah a pasal turin a hawng (Unveil) thin a ni. Kan ramah erawh mo lu chei nan kan hmang a ni ber.

Mithiamte sawi dan chuan khawvela veil hmang hmasa ber chu Genesis-a kan hmuh Jakoba nupui Leaii kha a ni. Chumi hnuah Rom ho khan an hmang leh a, an ni chuan Mo kha Thlarau sualin an it loh nan a hmai/hmel kha puanin an khuh thin a ni. Tunlai hun (Modern Era) ah erawh a hmang hmasa ber chu England Lalnu Queen Victoria i’n kum 1840-a prince Alberta pasala a neih khan a hmang a, chuta tang chuan veiin thlengin hman a lo ni chho ta a ni.

          Nula thianghlim pasal neihna erawh chuan Mo thuam leh Veil hi a var (white) kher an hmang thin. Rawng var hi lawmna (Joy) Remna (Peace) leh Thianghimna (Virginity) entirna a ni. Ram changkangah chuan Mo in thuamhnaw var leh veil var a rawn inbel chuan mo chu nula thianghlim (Virgin) a ni tih an lo hre mai thin. Rawng dang an hman erawh chuan mo chu nuthlawi emaw thianghlim tawh lo a ni tih an hre mai thin.

Kan ramah erawh chuan Biakin hawng lo a innei te pawhin veil kan hmang ve ta zel a, thawmhnaw pawh a var kan hmang ta deuh vek chu a nih  hi! Mi tihdan hrulah, ziktluak si lo in mi tihdan kan entawn a ni ber awm e.

Khawvel pa lar Prince Charles a’n a nupui Diana thih hnu, April 9, 2005 a nuthlawi Camilla Parker Bowles a neih leh khan veil an hmang lo a, Mo thuam pawh a var ni lo in, Grey lam rawng deuh an hmang mai chu a nih kha! Hnampui nge nge thil hi a nih dan tur ang thlapin an kalpui bik niin a lang. Heti lamah hian Kohhran hian inkaihhruaina dan mumal tak kan neih loh vang nge kan duh dan leh mawi kan tih ang angin kan inchei mai chu a ni hi!

2. Zaipawl: Kan pi leh pute hun laiin zaipawl an awm kan hre ngai lo. Chuvangin zaipawl pawh hi Sapho tihdan kan entawn/lakchhawna ni ngei ang. Kan kalpui dan erawh a inang lo leh hlein a lang.

Khawvel zaipawl lar-First Baptist Choir of America te, Heritage Singer leh a dangte pawh hi kum tam tak chhung member pawh inthlak lem lo in an lo ding tawh a, an member thenkhatte phei chu an tar bawih tawh hlawm a ni. Mahse an din rei tawh ngaihtuahin hla hi an ngah em em tlat lo. An hla  ngai hi vawi za tam an sa peih tlat!

Kan ramah chuan vawi hnih khat kan sak tawh chuan thing kan ti nghal zel a, kan sa leh zak tlat tawh thin. Kan mi hmasa te’n kum 1960 hma lama khawhar hla an lo phuah ho kha phuah belh a awm tawh lo, mahse tui takin vawiin thlengin kan lo sa tho, tuma’n thing kan ti lo. Zaipawl hla a nih avanga thing kan ti hma lutuk hi enge a chhan ni ang?

Zaipawl/Mimal zaithiam an lokal a, an larpui hla ngaihthlak chakin kan lo changa, “Ka/Kan hla thar kan han sa ang e” an han ti daihte hi a hrilhhaithlak duh ngawt nia! Hla thar neih loh avanga zai loh ai chuan kan hla thiamsa hmanga Pathian faka zai deuh reng hi a tha fe zawk lo maw?

Kan Kohhran hi kan vannei a, kan Kohhran zaipawl member-te leh hruaitutte inpekna avangin nikum  hmasa lam atang tawh khan Kohhran hunpui apiangah an zai kan ngaithla thei a, hunpui kar lakah an zai thei deuh reng bawk a, a lawmawm hle a ni. Hmunin min daih ta lo. duhtawk phawt ang.