Tv. Lalthakima
Tam tak chuan kan hre mai thei. Kristian Thalai Pawlte hian kan member boral an awm apiang hian kan ral thin a; KTP member zawng zawng aiawhin Branch committee member-te’n ralna hun an hmang thin. Mi engemaw zat ral ni tawhin chu’ng zingah chuan vanduaithlaktakin mahnia intihlumte pawh tlem a zawng an awm ve bawk. Chuti anga inralna kan neih tum chuan an chhungte hnen atangin kan sun takte chanchin ngaihthlak a ni thin a, chhiattawk chhungte’n kan then tak (kan member boral)-in harsatna a tawh hrang hrangte ral tura kal Branch Committee member-te min lo hrilh thin.
Tum khat pawh ralna hun kan hmanin a chhungte chuan harsatna hrang hrang a tawh nasat thu leh a khawhar nasat thin thu te, mal riaua a inhriat thin thute leh chu mi avanga thih hial maite pawh a duh thin thute an lo sawi a, ngaihtuahna a kal thui duh hle. Rilru lamah chuan ‘Engatinge a chhungte khan kan Kohhran hruaitute emaw, KTP hruaitute emaw, KTP-a Evangelical hruaitute emaw an hrilh loh le?’ tih te a lo awm. Kan kohhran hi kohhran lian kan ni a, KTP member-te pawh Pathian zarah kan thahnem viau mai. Aizawl khaw pawnah phei chuan Mizoram pumah a tam pawlte kan ni ve thin. Chuti ang member engemaw zat zingah chuan kan hriat angin thlarau lama chak lo leh puih ngai mi engemawzat an awm a, chuti ang pui tur ngawr ngawr chuan Mizorama Branch KTP zawng zawngah Central KTP-in din tura a tih angin, a chunga kan han sawi tak Evangelical Sub Committee hi kan Branch-ah pawh din a ni tih nu leh pate paw’n kan hriat a, tangkai taka kan hman a pawimawh hle mai.
He Evangelical Subcommittee hi Branch KTP hnuaia Sub-committee pakhat a ni a. Sawi tak ang khan kan member thlarau lama chak lo zawkte dawm kâng tur ngawr ngawra din a nih avangin he’ng mite hnena kan harsatna sawi hi a inthlahrunawm miah lo a ni. Mi tanpui ngai tam takin kovin tangkai takin an lo hmang tawh thin a; KTP member kher lo pawh anmahni kotu apiangte chu hun an hmanpui thin bawk. An hun hman dan tlangpuiah chuan anmahni sawmtute hnenah kalin an inah tawngtaina te, Pathian thu sawina leh Pathian thu hmanga ti ti honate an hmang thin. Tin, anmahni bik hian intuaihriam nan Bethel-te neiin hun an hmang bawk thin.
Tunah hian kum dang ang bawkin KTP member-te pawh 600 chuang kan ni leh tawh a, chu’ng zingah chuan member thlarau lama tanpui ngai ngawih ngawih engemaw zat an awm leh ang tih a rin theih. Evangelical sub committee tlem tê te’n chu’ng mite chu an hre kim theiin a rinawm loh a, chu’ngah chuan nu leh pate paw’n kan fate’n harsatna an tawk a niha tanpui an ngai a nih chuan, inhrilhhriat nachang hre thin ila a tha khawp mai. Tin, KTP member-te paw’n chuti ang mite chu kan tawng a nih chuan, keini chuan Pathian thute hrilhin hun kan hmang hrehte pawh a ni thei e, chu’ngah te chuan Evangelical hruaitute emaw, Branch hruaitute emaw hrilh nachang hre thin ila a duhawm hle.
Tin, kan hriat angin Evangelical Sub Committee mai ni lo hmân atang tawhin Upa engemaw zat kan nei a. Kan Pastor te, Pro. Pastor te, Upate pawh hi pulpit-a an thusawi ngaithla tur ringawta inngai lovin kan fate emaw, kan thiante emaw thlarau lama puih mamawh an awm chuan hrilhin hmang tangkai thin ila a tha khawp mai.
Kan Kohhran atanga chhuak Mizoram pum huap ang pawha kan Pastor chhuanvawr Rev. C. Chanchinmawia’n revival Speaker retreat-naah, “Kan Speaker-te pawh hi rawih nun ve deuh hi an nia,” tia a sawi ang deuhin, kan Upate pawh hi heti ang tanpui tur te, damlo tawngtai turte hian nasa zawkin ko ila chu an thlarau lam dinhmun pawh a invawrh kang viau ang a, thlarau lamah tan pawh an lak nasat phah ngei ang. Tin, thlarau sual tihbuai an awm te pawhin kan ko lo thin a, koh nachang hre bawk ila. Chuti ang tur chuan kan hruaitute pawh lo inbuatsaih ve bawk se.
Upate Pathianin a hmanna tawi tê tê pathum lo tar lang ila: Kan Kohhrana Upa nupui pakhat chuan, “Lalpa’n ‘Chu mi chu zu tawngtai rawh’ min ti a, ka zuk tawngtai a, a dam phah pawh ka hre lo a. Kan Motor chuannaah kan chuanpui pakhat a pum a na a, ho ang reng tak hian kan pa’n a zuk tawngtai a, a dam chawpchilh nghal ve mai,” tiin a sawi a. Tin, Finance committee member pakhat pawhin, “Finance campaign-a hun kan han hman ve viau ai chuan kan Upate’n an thusawi dawna campaign an hanneih pah zauh hi mipuite rilruah a tla na zawk,” a ti bawk. Mahni tawn han sawi ta ila: A rei ta viau mai, Krismas a ni a; damlovin ruai pawh theh peih lovin ka awm a. Chuti anga ka awm lai chuan kan Upa pakhatin min tawngtai se dam dawna inhriatna ka nei tlat mai a, chhungte ka kohtir ta a, min han tawngtai zawh meuh chuan ka dam chawpchilh nghal ve mai. Chu’ng zawng zawngte ngaihtuah chuan Pathianin Kohhran mipuite kaltlanga a thlante an nih avangin a hmang thin tih kan hriat a pawimawh. A chunga kan han sawi tak Evangelical Sub committee te, Pastor leh Pro. Pastor te, kan Upate hi tangkai takin i hmang thin ang u.
