GOOD FRIDAY LEH EASTER SUNDAY KELKANG-AH

--Tabitha-i Pi--

        Kelkangah hian Good Friday leh Easter Sunday hmang turin ni 2.4.2015 zing dar 5 ah Sumo-in Kolasib kan chhuahsan a, kalkawngah ruah a sur nual a, Champhaiah kan nau C. Laldingliana te nupa in mi 11 chu min lo mikkhual a, chaw kan ei zawhin kan inbualfai a, tui taka kan mut hnuin zing chaw eikhamin Kelkang lam pan chuan hlim takin kan chhuak leh ta a. Dar 9:15 am velah Kelkang kan thleng a, Pi Kawtei te chhung nena inzuichho kan nih avangin an ni lokal hmasa chuan hmundanga thlen an phal loh avangin Pastor Quarters a thleng turin kan vaiin min lo ti a, ‘Pastor Quarters-ah kan thleng duh lo’ kan ti a, ‘Kolasib atangin mi 11 an lokal anga rawn tir rawh u’ an ti a, ‘Thuawih tur’ an ti tlat a, inthlahrung takin Pastor Quarters-ah chuan kan lut ta a.

Good Friday a ni a, inkhawm turin kan insiama, kan inkhawm nghal a, inkhawm boruak a zangkhai hle mai, mikhualte an haw hnem avangin(Mahni khua theuh a Good Friday leh Easter Sunday hmang turin an haw a ni) mikhual 800 kan nih thu an puang a, tin, an Biakin chhungah chuan thuthleng a tlem hle, Khuangpu, Keyboard tumtu leh mi tlem thutna tlar 7 vel a a awm a, a bak zawng chu lamtual a ni. Lam mak tak tak pawh an awm a, an theihna zawng zawngin Pathian fak a ni ber mai. Lalpa ropui ber se.

Sermon reng reng a sei ngai lo, minute 25 atanga 30 vel an sawi a, tawi fel tak, nung takin an Upa te’n an insawi chhawk deuh ber. Pastor leh mikhual chamrei deuh, a boruak man pha chin deuhte pawh an ruat ve bawk. Hla an thlang zing a, zai anuamin hla an nawn rei a, lam an tam hle, mipui chanpual a tam thin hle. Kan cham chhungin inkhawmban zaikhawm a awm lo. Inrinni zing dar 10 ah Upa C. Lalpanliana’n Bethel min kaihruai a, Hmun thianghlimah kan kal tha hle. Hruaituin thuhma a sawi zawhin Bible a chhiar a, thuchah tawite a sawi a, tihtur leh tih loh turte a sawi hnuah Hnehna hla do kan chham a, Hmun thianghlim Bethel kan nei a, min sezawl chhuah ta a(Hmun thianghlimah hian Pheikhawk bun phal a ni lo a, Mobile Phone leh bag te pawh ken luh awih a ni lo), kan duh ang angin hun kan hmang ta a. Tumah kan inveng tawh lo, hlawk loh hlauin kan tawngtai mawlh mawlh a, a then Penniel-ah, a then Moria hmunah. Moria ah hian ‘Ka fa, i thinlung min pe rawh’ tih hi an lo tar a, ka thinlung tawp tak, chhe tak, elrelna, itsikna, duhamna a khat kha Lal Isuan min dil a, a ropui hle a ni. Ani sualna reng reng nei lo, mifel famkim hnenah kan pe tawp mai. ‘Lalpa, ka thinlung hi min siamthar sak rawh’ tiin tap zawih zawih a, Kraws vuana han tawngtai chu a nuamin, a hlawkthlak hle mai.

Gilead-ah kan kal leh a, Kraws hnuaiah tlaklei an lakna khuar kuk mai chu kan han thleng a, leite kan la ve a, kan tawngtai a, Cancer natna neiten an dampui Gilgal lam panin kan kal zel a, Vang kunga Kraws lem awm chu tleirawlte thla kan laktir ve a, Hnehna hla do kan chham a, vawi 7 Gilgal chu kan kal a, a kal zo apiangte chu a duh thinghnuaiah an ti ti a, a duh an tawngtai a, a then hnimbuk hnuaiah a falin an bethel a, a thenin Bible an chhiar a, tupawh mai hi hlawkna nei lo a hawn hi kan hlau ni berin ka hria. Thahnem kan ngai tlang hle mai. Camping zalen si, hahthlak si, nuam bawk si ni berin ka hria.

Zan lamah kan inkhawm leh a, Secretary thupuan a ropui hle mai. Mikhualte chunga that chhuah turin an infuih sauh sauh a, an inpekna a ropui hle a ni. Vanram tlafual an sawi fo hi eng nge ni ang aw..ka ti thin a, Lalpa avanga tuma sawm ni si lo, mipui sang chuang engmah pek neih bawk si lo, insengso a, nitin kal tak sung sung mai chu, a ang fu lo maw?

In itsikna leh insawiselna awm si lo in, inthlahlel takin hun kan hmang a ni ber mai. Kohhran emaw chhungkua emaw thian emaw a rem dan ang angin Kelkang khuaah Nazareth Isua a len lai hian kal ve i tum theuh ang u. Pastor, Upa, Kohhran Hmeichhia, KTP, Zaipawl member te pawh kal i tum theuh ang u.

Ni 6. 4. 2015(Thawhtan zing) dar 5 ah Kelkang kan rawn chhuahsan a,  zing dar 6 ah Champhaiah thingpui kan in zawhin Kolasib lam kan rawn pan zel a, Kawlkulhah Hotelah chawlin, chaw kan ei a(Chaw ei man hi Rs 120 a ni). Tluang takin Aizawl chu chawhnu dar 1:00 velah kan thleng a, Aizawlah kan Pa leh Ka U te kan thlahfel hnuin Upa Duhawma kan kan nghal a, tawngtai rualna te kan neih hnuin zan dar 7 velah Pathian hruainain hlim takin Kolasib kan lo thleng a ni.

Thubelh: Kelkangah hian Roman Catholic in khat an awm a, a dang zawng chu Presbyterian vek an ni a, in 137 an ni. Tin, Tourist Lodge te Rest House te a awm lo, tumah induhsak theih a ni lo a, inkulh bik phal a ni lo bawk. School, Hall, Biakin, mi in sak zawh lohah te mikhual an thleng vek a ni. Minister, Pastor, Speaker te pawh chhim a kal engemaw zat an awm tawh a ni. Tin, kal tumte tan chuan mahni mutbu leh ei leh in mahni intodelh a tha hle. Gilead-a tlaklei hi mi tam takin an dampui thu an sawi a, Bethelna ah pawh lawmthu sawina neih thin a ni.