RAMTHAR NI PUAL

Vawiin August 31 hi Ramthar Ni a ni a, kan rama Presbyterian kohhran inphunna ni ah a ngaih theih awm e. August 31, 1897-ah khan Welsh Presbyterian Mission tirhin Rev. D.E. Jones(Zosaphluia) chuan rawngbawl hna thawk turin Mizoram a rawn lut a, chuta tang chuan tun thlengin kan ramah Presbyterian Kohhran hi nghet takin a ding chho ta a ni.

Min hringtu kohhran hi harhnain a nuai nasat,  ramthar rawngbawlna lama tui tak leh thlarau bo vei tak an nih avangin kan rama an rawngbawlna hian hma a sawn chak phah hle a. Tin, keini an fa hrinte pawh hian an hnung zuiin kan phak tawkah Ramthar rawngbawlna hi kan ngaihpawimawh hmasak leh kan kohhran zepui zinga pakhat  a ni chho ta zel a ni.

Pathian zarah tun dinhmunah hian keini Diakkawn kohhran bik hian missionary za chuang zet kan chawm bakah mahni ngei kal chhuak kan neih belh zel bawka, a ropui hle. Amaherawhchu, Lal Isua thupek anga la hre lote hnena chanchintha hril zel tur kan nih avangin kan thlen chinah duhtawk thei kan ni lova, hmalam pan zel tur kan ni. Chanchintha puandarh hi kan tihtur leh kan chakna hnar pakhat a ni tih hre thar leh ila, Ramthar rawngbawlna lamah hmasawn zel turin tan i la thar leh ang u.