INTLANSIAK

RL. Zonunmawia

Pathian thuah hian  Isua Krista kan zuina tur kawnga kan tih tur, kan nih tur, kan mawhphurhna  lam aiin a thlawn a kan dawn; a hmangaihna leh khawngaihna lam ngaihthlak a, hriat hi a kham awm loh lehzual zawk hian ka hre thin, in ni ve em ka hre lo. Eng pawh nise pe chhuak hawt si lova a dawn lam chauh duh mi ka nih avang leh thil dang vang te pawh a ni mah na le, kum 2009-a Diakkawn Pastor bial KTP-in  Aizawl, Tuikual Pastor Bial KTP kan tlawh tuma kan Branch Leader thu sawi rilrua a la riah reng vang nge ni, sports thei ber ber te zing a mi ni lo mah i la infiamna khawvelah pawh intlansiak (Race) lam hi rilru-ah a lian thin a..

Kum 1992-a Barcelona, Spain-in XXV Olympic a thlen tum khan tum dang ang bawkin intihsiakna chi hrang hrang hmuhnawm leh ropui tak tak te awmin mipui pawhin programme an hlut leh hle a. Chutia intihsiakna a kal chhoh mup mup lai chuan Stadium pakhatah chuan 400metre race intlansiakna bei turin ram hrang hrang atangin an Aihniara te theuh pakhatna nih tumin an lo in warm-up ve mek bawk a. Chutah tlan a lo hun ta, an hmet ri ta thuai mai, khawvela tlan chak ber ber te inelna a ni bawk a, an phe nghal vawt vawt hi a ni ber mai. A hmuhnawm bawk a mipui pawh an thawm a tha hle. Tlan tan phat atangin an au nghal  dur dur a, metre za (100) an tlan thleng ta , a tlan chak zual deuh ten hma hruaitu nih an inchuh na tial tial, tha leh zung, sum leh pai, rilru leh hun zawng zawng, he intlansiaka lawmman pakhatna an lak theih nana an lo seng tawh te, Ram aiawhtu an nih anga mawhphurhna an ko a awm zawng zawng te leh training an lo lak tauh tauhna te chu hlawhchhamin, athlawn mai a chang ang tih hlau hlel tak chungin an theihna zawng zawng sawm khawmin an tang a ni tih hai chi rual a ni lo.

An tlan zel a, metre za sawmnga (150) an tlan thleng leh ta. Hetih lai tak hian thil pakhat, khawvel-in a theihnghilh ngai tawh loh tur a thleng ta tlat mai… England ram aiawh a beiseiawm taka palina (4) dinhmun a tlan mek 'Derek Redmond-a' chu kaihza (hamstring/malpuite) tha/ tihrawl chat avangin na ti tak chungin a bawksawp ta reng mai, a tlanzawm ve thei ta tlat lo. A beiseina zawng zawng tham ral mek chuan ataksa a tih nat ang bawkin a rilru pawh a tina hle a ni tih abianga mittui luang zung zung te chuan a ti chiang hle a ni. Medical team te chu damdawi leh inzawnna (Stretcher) kengin  rawn tlan lut ngal vat mahse, a lo inhliam nat em avangin enkawl dam theih nghal mai chi a ni si lova, zawn chhuah an tum ta a. Chutah, Derek Redmond-a chuan " khawngaihin min kal tir rawh u, theihtawp chhuahin tlan leh ka duh a ni," a ti a, Doctor te phal lo chung chu bai saih saih chungin a kal lui leh ta hram hram a, a hmel atang pawn a hliam chu a na hle a ni tih hai chi rual a ni lo. A intlansiakpui te chu a tan umphak  chi an ni tawh lo a ni mai lova, tlanthleng turin (finishing line) kal thleng  tur ringawt pawn a theih a rinawm tawh loh a ni ber mai.

Chutih lai tak chuan entu mipui zing atangin pa pakhat chu insumzo lovin intlansiakna (Track) ah, Security chhah tak rawn paltlang luiin a rawn zuang lut pawp a, Derek-a chu, hnung lam atang chuan a rawn pan phei ta thuai thuai a, a bul a rawn thlen chuan Derek-a banah a kai a, chupa chuan, "A tawp (Finishing line)thlen i duh em?" a ti a, Derek-a chuan "Aw duh e" a ti a, chu veleh Derek-a ban chu lain a darah a dah a, a zak lehlamah  chuan nghet takin a kuah bawk a, meter 250 la bak kal chhuak tur chuan a kalpui tan ta a.

Hetihlai hian entu mipui pungkhawm chuan an mahni lawmin kut an lo beng dur dur  der tawh a ni.Camera man leh News reporter ten an umzui nghal vat a, Tunge he intlansiakna ah hian pakhatna ni ta, tuin nge World Record siam tih lam tuman an ngaihtuah chang meuh tawh lo ni mai hian a hriat a ni. Chutiang ang boruak karah chuan 'Finishing line' chu an lo kal thleng dawn ta der mai a, an thlen dawn tepah Derek-a chu chu pa chuan a mah a kal tirin finishing line chu a thleng ve ta a ni. Official ( IOC) lam chuan Derek-a chu midang puihna avanga thleng (Finish) thei chauh a nih avangin disqualify mahse entu mipui 65000 rual chuan Derek-a tumruhna, beidawn lohna te leh a mah rawn puitu chu ngaihsan leh lawmpui avangin Finishing line a thlen rual chiah hian Standing Ovation ( Ding chunga zahna leh lawmna lan tirna) an pe hial a ni. Kum 1992 Barcelona, Spain Olympic-a mipa 400 metre race a pakhat-na (1) hauhtu chu lawman pek a niin, an record thlap ngei mai, mahse khawvelin a ngaihsan leh, vawin ni thlenga mite thinlunga riak chu, a tawp berna pawh ni pha lova disqualified tak Derek-a leh amah puitu chanchin hi alo ni ta zawk a ni.

Matthaia 7: 9 "…Nangni mi sual mahin infate thil tha pek nachang in hriat chuan, in pa vana mi chuan a diltute chu thil tha a pe zawk em em dawn lo vem ni?" He Bible chang ka han thailan na chhan chu, Derek Redmond-a, atawp thlenga rawn tanpuitu kha tudang ni lovin, ama pa ngei Jim Redmond-a a nih vang a ni e.