- R. Lalbiakkunga
A hun : 3-4 August, 2013
A hmun : Bethlehem Kohhran Biak In
Thupui : ‘Nang malsawmna ni ang che’ Gen. 12:2
Presbyterian Pavalai Pawl hi kum 2012 Synod Inkhawmpuiin a pawmpui a, tunah hian Synod Revival Committee hnuaiah awmin anni kaihhruaina hnuaiah hian Meet vawi - 1na pawh hi neih a ni. Meet inkhawm kaihhruai leh inkhawmpui thupui sawi pawh Revival Committee kutah vek hian a awm a, Meet neih leh chungchang pawh anni ngaihtuah leh tur hi a ni. Mizoram Kohhran hrang hrang zingah Pavalai Pawl din thei ni Kohhran 260 an ni. Tun Meet ah hian Palai in Report zat chu 7500 kan ni a, riak lut hi 1380 vel niin Aizawl khaw pawn kohhran 200 chuang atangin palai kan kal thei bawk. Palai zinga upa ber chu Pu Kapzinga, Kawlkulh khua a ni. Diakkawn Kohhran Pavalai Pawl atangin Meet hmang tur hian member 11 kan han kal thei a ni. A thlengtu Bethlehem kohhran hi In 638 niin, Dan zawhkim 2317 an awm a, kohhran member zawng zawng zat chu 3230 an ni.
Meet tan zan (Inrinni zan) atang hian inkhawm kan tha nghal hle a, inkhawm apiangin inkhawm zat hi chhiar thin a ni a, hemi zan hian mi 5010 kan inkhawm. Rev Lalramliana Pachuau, Synod Moderator-in Meet thupui then khatna a sawi a, inkhawm boruak a tha hle. Pathianni chawhma inkhawmah hian mi 6070 inkhawmin, thawhlawm pawh Rs 57507.00 zet a ni. Pathianni chawhma inkhawmah hian Rev Vanlalzuata, Senior Executive Secretary hnen atangin thupui then hnihna ngaihthlak leh a ni. Pathianni Chawhnuah Rev R. Lalnuntluanga, Revival Committee member hnen atangin thupui ngaihthlak leh a ni a, mi 6100 kan inkhawm. Pathianni zanah hian Rev PC Pachhunga, Executive Secretary hnen atangin thupui ngaihthlak a ni a, a tawp zana inkhawm zat hi mi 7300 niin, thawhlawm pawh Rs 71597.00 a tling.
Pavalai Meet-ah hian rorel inkhawm a awm lova, Pathian faka zai boruak a tha hle a. A thlengtu kohhran inbuatsaihna a nasain kan thathnem avangin an hmunhmain min dawl zo lo lam deuh a ni. Inkhawm apiang hian Pavalai Zaipawl ngaihthlak tur a awm ziah a, zaipawl zai zingah hian a thlengtu Bethlehem kohhran zaipawl tihloh chu Pavalai zaipawl vek an ni. Heng zingah hian Tlangnuam Vengthar Kohhran Pavalaiin ‘Pavalai Pawl hla’ an sak chuan bengkhawn a hlawh hle. Meet chhunga Pathian biak inkhawm zawng zawngah hian inkhawm Dar hmasa rik hma fe atangin Pathian faka zai tan a ni thin a, thutna tha chang tur chuan kal hma a ngai hle thin a, thutna awm thei zawng zawng chu luahkhah vek zel thin a ni. Pathianni zanah phei chuan tlai Dar 4:00 ah Biak In chhung a khat vek tawh hial a ni. Zai boruak a that bakah lam kan thahnem thei hle a, inkhawm zawng zawngte kan lam deuh vek zel niin a hriat.
Kan Synod hotute hnen atanga thupui ‘Nang malsawmna ni ang che’ tih then hrang hranga thiam taka an sawi kan ngaihthlak chuan inkhawmte min hneh hle a, malsawmna bul chu Pathian a nih thu te, ramin malsawmna a mamawh dan te leh ram tana malsawmna nih a tulzia te, Pathian lakah rinawm taka awma midangte tana malsawmna nih a pawimawh dan te leh chhungkaw tana malsawmna nih a tul zia an sawite chu an thusawi ngaithlatu, a bikin Pavalai pawl member te tan chona nasa tak a tling a ni.
Pavalai inkhawmpui hi inkhawmpui dangte aia a danglamna chu mi inchibai lai hmuh tur a vang hle a, kan thawmhnaw hak a inang tlang hle! Kan Meet chhunga zai hruaitute an fakawm hle a, inkhawm tan hmain darkar hnih dawn min zaipui hman piahlamah chhum lo chat lovin hla an la nghal zel a, lamtuala lamte pawhin thutna pan lovin an lam tlang lehnghal mai tahin. Bethlehem kohhran inpekna a ropui hle a, kohhran chhungkua zawng zawngte mikhual thleng theuh turin an lo inbuatsaih a, amaherawhchu an beisei aia palai kan thathnem loh avangin mikhual thleng tura inbuatsaih, mikhual chang ve ta lo an awm nual. Chutih rual chuan Pandal lian tha tak hnuaia inkhawmpui nei hun a nghahhlelhawm hle. Kan kohhran atanga palai kalte pawhin inkhawmpui hi kan hlawkpui hle a, mit leh beng a tlaiin hmasawn zelna kawnga min tanpuitu pawimawh tak a ni zui ngei ka beisei. Pavalai inkhawmpui lian nge nge a kal chu a zawngchhang tlak hle dawn e!!
No comments:
Post a Comment