COUNSELLING TRAINING REPORTS

- Upa H. Lalremliana

Kohhran Committee-in Dt.24 July - 7 Aug chhung Aizawla Counselling Training a kal turin min ruat a. Ahun a rei ropui si, school lamah exam a lo hnai nen, chawlh lak a uihawm bawk si. Kohhranin Camping Crusade kan neih hun tur a lo ni bawk nen. Kohhran Committee in a min ruatna lah phat chi a ni bawk si lo. Kohhran Camping hmasaber chu ka hmu ve hman a, phur lo zet mai chuan July 24 ah Aizawl lam ka pan ta a. Kan Training na hmun Synod Conference Hall chu kan thleng chhova, Pastor Bial hrang hrang panga atangin member kan kal khawm a. Training tura kalte lah kum inrual lo tak tak kum 35 atanga kum 70 chuang tawhte kan ni hlawm a, kan la innel vak lo leh nghal.

Thlen kim zan chuan Conference Hall zau takah thawl takin kan thu a, Self Introduction te kan neih zawh chuan ‘Lu Koki Khup Leh Ke’ kan ti ta dial dial mai a. Kohhran Upa kum 70 chuang tawh te, Pastor pension Rev. C. Rosiama te, Pastor senior pui pui te pawh bang hek suh. Hla dang kan zir leh a, “Chungu a hram a, lui ral leh lamah, Clik, Clik, Clik tlir........ kan ti leh ta hlerh hlerh mai. Upa senior pakhat chuan kan ban hnuah kan thil zir chu a ho em mai, Kohhran Committee in hria seng chuan tumah Training an phal ka ring tawh lo a ti chhuak phawng mai a. Mahse, thuawi kan zir tlan nante, kanin pawh tawn nante a lo tangkai phian mai. A zan hnih naah pawh kan thil tawn a nuihzatthlak pathum theuh kan sawi a, kan va han nui nasa kher em. Pastor te pawhin chhim lam an bial lai a, Baptisma an chantir laiin naute lo thlek kawi avanga Nu hnute baptisma, an chan tir thu te, Naupang baptisma an chantir, Pa leh Fapa leh an tih an tih laia lo tlan chhuak daih, an um a an um phak loh thute an sawi chhuak a, kan nui nasa kher mai. Chung programme ho tak tak te chu bial hrang hrang a Upa la inhmu ngai lo leh la inpawh tawn ngai lo te inpumkhat nan a lo tha hle a, training a tel te pawh kan in ngaiin kanin phone cham chi mai a nih hi.

Training mim kotute hi Synod Family Guidance and Counsilling Center te an ni a.  An main center chu Mission Vengah a awm a, kum 1997 khan rawngbawlna an nei tan a, a din tirh atang hian pantu(clint) sangkua dawn an nei tawh a, kuminah ringawt pawh mi 600 chuangin an pan tawh a ni.Chhungkua leh mimal a harsatna hrang hrang nei te counsilling dan kan zir a, a practical pawhin kan zir nasa khawp mai.

Kan nitin nunah mitin hian counsilling kan mamawh vek mai a lo ni a. Rilru hahna hrang hrang kan nei a, kan fate an intibuai a, thenawm khaw vengah buaina a lo chhuak a, nula leh leh tlangval karah buaina a lo awm a counsilling petu kan mamawh thin a, damlo kan naah te, Kohhran Inahte an mahni thleng phak lova mahni duhzawng leh tuipui zawng lo sawi chiam mai te pawh kan tam hle a. Mite, kan ngaihdan leh duh dana thurawn kan pe zung zung te pawh hian mite tan harsatna kan siam fo a lo ni.

Mi tam tak kan harsatna ruk te mualpho kan hlauh avangin kan sawi chhuak ngam lo fo. Counsellor kan nihna a min rawn pan a nih chuan khawiah mahkan sawi chhuak thiang lo. Kan thu dawn reng reng Kohhran Committee ah emaw, midangte  hnenah emaw kan sawi chhuak thiang lova, kan nupui te pawh kan hrilh tur a ni lo. Midang pawhin inzawh leh awi a ni lo a ni. Harsatna neiin min rawn duh a nih pawhin englai pawhin pan theih leh rawn theih kan ni dawn a ni.

Kan traingin result chu a tawp zana puan tur a ni a. Kan hotu ten traingng hma lah training hnu, a lem ten min ziahtir a. Kan training naa kan thil tih hrang hrang te an chhin chhiah bawk a. Kan hotu ten kan result an puang dawn emaw kan tih laiin kan training result chu keimahni theuhin kan puang a, thenkhat chuan T.V lamah in lo hmuh tawh ka ring. Kan lem ziak chu Big Screen ah tih chhuah a ni a, a ziaktu ten kan sawi fiah zel a. Kan training hma chuan counsilling hi tute emaw tih turah ka lo dah thin a, kawngka pawh ka lo hawng ngai lo. Tunah erawh chuan counsilling hi ka mawh phurhna a ni tih hriain a mamawhtute tan kawngka ka lo hawng ve ta. Harsatna nei ten min pan duh a nih chuan ka thiam ang ang leh ka theih ang anga mite tanpui turin ka inhlan e.