RAMPUM HUAP KOHHRAN PAVALAI MEET VAWI 2 NA AH KA KAL VE A

- Lalrinliana

     Synod Revival Committee buatsaihin ram pum huap kohhran pavalai Meet vawi 2na chu ni 15-17.05.2015 chhungin Aizawl Khatla Kohhran Biakinah neih a ni a. Hetah hian Diakkawn atangin member 11 kan kal ve a ni. 

Ni 16. 05. 2015 ah kalin, tlai lam ah Aizawl kan thleng a. Khatla kawnah Banner mawi tak leh Reception counter duty te’n fel tak leh hneh takin min lo dawngsawnga, thingpui leh a hmeh tui tak min lo hlui bawk a. Tichuan, kan thlenin turte tifelin Junior Department zirlai tleirawl rual fel tak tak te’n kan thlenin tur theuhah thatho takin a hmun thlengin min dah thlap a, a nuamin a hahdamthlak hle mai. Tin, kan thlenin theuhte pawh mikhualte chungah duhthusamin an fel a, min an ngaihtuah em em a, ei leh in thlengin, kawng engkimah sawiselbo an ni ringawt mai. An chungah lawmthu sawi tur kan ngah em em a ni.

He meet thlenna tur hian thlengtu Kohhrante chu tisa leh thlarauah an lo inbuatsaih nasa hle a. He meet denchhen hian Kohhranin Gospel Camping chhawng 4 neiin, Kelkangah mi engemaw zat an lo han kal bawk a. Inkhawm boruak pawh a thain, Thlarau Thianghlim hnathawh a lang nasa hle a. Pathian hmangaihna avanga patling thiau, rampum huapa Pathian fak tura kalkhawm tih takah lamtual pariat zetah pawh leng mang lo khawpa Lalpa faka kan han lam mup mup mai te, keini thian zaho bik zingah pawh lam hleithei ngailo, Pathian fak leh chawimawia ban phar meuh a lamchhuak han hmuh te hian  a lawmawmin a ropui hle a ni. Kan fak Lalpa chu a lawmin ka va ring em!!

Meet thupui hi Philippi 1:21na “Krista tana Nun” a ni a, thupui hi hlawm 4ah thenin; ‘Krista tana Nun-Nitin nunah’tihte, ‘Ram leh Khawtlangah’ tihte, ‘Chhungkuaah’tihte leh ‘Kohhran leh rawngbawlna ah’ tihte a then a ni a, thupui awmsa hmang hian Rev. Lalrinmawia, Synod Moderator te, Upa H. Zoliana, Ramhlun veng te,  Rev. Lalsangbera, Vaivakawn te, Rev. R. Lalchangliana, Synod Revival Director te, Upa Vanlalngaia, Khatla East te leh Rev. Lalzuithanga, Senior Executive Secretary i/c Revival ten Pathian thuchah an sawi thin a, an sawi thiamin ngaihthlak a manhla thei thin hle, a hlawkthlak thin khawp mai. Tin, inkhawm chhung zawng hian Pavalai zaipawl vawi 21 an zai a, a thlengtu Khatla kohhran zaipawlin hla pakhat an rem bawk. Meet chhung hian Pathian biak inkhawm vawi 7 awmin, inkhawm zat chawhrualin 3300 ang vel a chhut a ni bawk. Pathian biak inkhawm neih bakah zaikhawm tum 3 neih a ni bawk. Tin, tun tum meet hi Synod Information & Publication Department (Synfo) ten Vedio Coverage buaipuiin, Local Cable 2, LPS leh Zonet ah Live a pekchhuah thin a ni bawk.

A tawpna atan chuan Kohhran Pavalai Meet neih thin hi thil tha tak leh zawngchhangthlak tak niin a langa. Tun tum Meet pawh hi sawi tak ang khan thlengtute inbuatsaihna a thain a ropui a, min thleng zo hle a, an fakawm hle. Lamtual induhthawhna erawh a na hle. Duhthusam ah chuan hun lokal lehzel turah chuan Biakin ni lo in, Pandal Structure pangaiah hmun zau zawk. field-ah te ni ta sela, a that zawk hmel khawp mai.