DIAKKAWN KOHHRAN HI

-C. Zothanmawia-

       Diakkawn Kohhran hi Mizorama Kohhran lian pawl kan ni a. Dan zawhkim ringawt pawh 1700 chuang zet kan awm a, Kohhran mi zawng zawng phei chu 2500 chuang zet kan awm a ni. Mi chuti zat zingah chuan ngaihdan leh duhdan inanglo fe fe engemaw zat kan awm ngei ang. Chutiang bawkin kan nitin khawsak dinhmun pawh a inchenlo hlawm hle. Mi chuti zat ngaihdan leh duhdan inanglo tak tak, dinhmun pawh inchenlo tak tak vawiin thlenga lungrual taka kan la awm ho a, hma kan la sawn zel thei hi enge a chhan i ngaihtuah ve ngai em?

Pathianin Diakkawn Kohhran hi a hmangaih a, a chhunga chengte pawh lungrual taka kan awm ho theihna turin hruaitu (Upa) talent hrang hrang nei, kan milpui tur ang zel min pek vang niin i hre ve em? Tawite tein heti hian sawi ila a chiang mai awm e.

1. Upa RV Thansanga: Camping/Crusade tih chuan ani aia Director tha hi an awm chuang lo ang! Khawngaihna ngah tak, mi thunun thei tak a ni. Camp luh tirha zurui sahawk ri nuaih nuaih pawh thunun thei tak a  ni. Headmaster a nih lai pawha school dangin an duh loh ho lo admit thintu a ni. ‘Khawlaia an vah mai mai chuan sual bak hmabak an nei lo’ ti a a admit tak vawiin niah hian Officer leh khawtlang parawn engzat tak awm tawh ang maw?

2. Upa H. Lalrinliana: Pa inngaitlawm tak, thawm na lo tak, mahse Kohhran kalphung vawnhim tlat duh mi a ni. Kohhran sum enkawltu atana duhthusam a ni. Thil diklo ngaithei lo tak, dikna tan tlat mi a ni. Pathian Biakin ngaina tak, a dam tek tek chuan inkhawm thulh ngailo a ni.

3. Upa Ralliantawna: Diakkawn huam chhungah khawhar an awmin zingkarah han kal chhin teh. Upa Tawna’n khawhar chhungte tan thlamuanna thuchah a sawi leh a tawngtaisak lai i hmu ngei ang. Hetiang Upa hi “Veng dangah awm ve tak maw” ka ti thin. Tin, Pathianthu har deuh leh Kohhran dan leh hrai chungchanga parawn tling a ni bawk. Boruak a zira Pathian faka lam thei reng a ni bawk.

4. Upa K. Thangmawia:  A pianphung a rinawm ang bawka sum leh paia pa rinawm tlur mai, sum vawngtu atana duhthusam a ni. ‘Ni’ chu ni, ‘Ni lo’ chu ni lo ti tlat mi, Kohhran kalphung vawnhim duh tlat mi, pa taima, fel fai taka thiltih duh mi, inkhawm leh zai ngaina tak a ni.

5. Upa Chawngthanmawia: Ramthim/Ramthar sawi rik tawh chuan,”Kei heta hi ka awm, mi tir ta che” ti thei reng, a tul dan a zira lirthei pawh a tul zat zat thawhchhuahpui thei reng a ni. Thangkhat lian tehmeuh chhungte zingah pawh hmang lo a hmun khawhar zawk a Missionary te Krismas lo hmanpui tawhtu a ni. Pathian malsawmna a dawnte ui hauh lo a semchhuak thintu a ni.

6. Upa C. Lalthlamuana: Pathianthu duh tak, tawngtai mi a ni. Dawr a nghah ve pawhin an damdawi rawn zawn a hmuh mai loh pawha dawr hnung lama customer te kailuta, ‘A aia damdawi tha ka nei’ ti a tawngtai mai thei zel a ni. Tar leh upa lamte be lum lam peih tak a ni.

7. Upa H. Lalhuapliana: Secretary tur renga piang niawm tak, invawng fel thlap mai. Thu puangsual ngai lo leh zawhnawn ngai lo khawpa chianga thu puan thiam a ni. Zai ngaina tak, solfa leh lengkhawm pawh tuipui thei, khuangvuak pawh thiam tak a ni. A tul huna lam thei reng a ni bawk.

8. Upa K. Lalrema: Pa kawm nuam, thil hre tak, ‘Presence of Mind’ nei tha tak a ni. Chawpchilha thiltih leh thu sawi nghal thiam tak a ni. Pathianthu pawh hre tak, Kohhran dan leh hrai ngaipawimawh tak, tu te pawhin an pawh theih tura pa inhawng tak a ni.

9. Upa H. Lalremliana:  Pa taima, invawng fel, mawhphurhna hlenzo tak a ni. Pa thuawih thei tak, pa inngaitlawm, khualchhawn atana tha fahran mai a ni. Naupan lai atanga sual kawng zawh ngailo, kohhran bel tlat mi, Inkhawm leh zai ngaina tak, mahse zaithiam lemlo tak a ni.

10 Upa Lalhmingmawia: Napoleoan-a ang deuh a ni a, a hmel en aia rinawm tlat mai, communist ral pawh lo lian se nghing mai mai lo tur chi a ni. Pa invawng up thei tak, camp chhuak hlimte tihtlangnel vel tuma be lumlam peih tak a ni. mawhphurhna ngaipawimawh mi a ni.

11. Upa Lalrinmawia Ngente: A thatna lai ber pawh hriat theih loh khawpa pa talent ngah a ni. Eng line-ah pawh tlin taka tel thei vek, mahni pawha concert thei ngat a ni. Mawhphurhna ngaipawimawh tak, midang phut lem lo a mahni a ngawirenga thawk mawlh mawlh chi a ni.

12. Upa Lalchuangkima Tochhawng: Pa invawngfel tak, khualnekah leh khualchhawn atana duhthusam a ni. Pa inthlahrung tak, mikhual tihtlangnel thiam tak ni bawk si a ni. Pastor leh Upa senior zawkte kaihza veng atana duhthusam a ni. Nupui fanaute uap peih tak a ni bawk.

13. T. Upa V. Pazawna: Pa invawngfel tak, smart zaih reng mai, smart avanga nelawm lo chuang miah lo a ni. Zai ngaina tak, lengkhawm leh solfa zai pawh tui taka sa thei, hla hruai pawh thiam tak a ni. Khuangvuak thiam tak, nunthar nei an awm a lawm thiam tak, an zingah pawh lam peih reng a ni. Midang tawiawm peih tak a ni.

Mi sangtel tehmeuh, duh dan leh ngaihdan inang lo pui pui lungrual taka ho khawm theih tur chuan hruaitute pawh mize inang lo tak tak leh talent hrang hrang nei a lo ngai a ni reng mai. Kan hruaitute hi mize inang leh talent inang vek nise tun dinhmun hi kan thleng pha kher lo ang.

Chuvang chuan, Kohhran mipuite’n hruaitute zinga tu emaw tal kan va pawh theih tur leh harsatna kan thlen ngamna tur hruaitu min pe hi Pathian hnena lawmthu sawi mawlh mawlh tur kan lo  ni e.