CHANCHINTHA THLENNI

Naktuk Pathianni khi Chanchintha thlen ni a ni a, kan Kohhran pawhin Thupui siamin, heti lam hawi hian sermon pawh ngaihthlak tura ruahman a ni.

Kan hriat angin, Mizorama chanchintha thlen ni hi kum dangah chuan January ni 11 ah hman thin a ni a, amaherawhchu, nguntaka ngaihtuah a, lehkhaziak hluite hmuchhuakin, a hmaa kan lo hriat thin Pu Buanga leh Sap Upa te’n Mizorama chanchintha an hril hma hian Rev. Williams Williams-a chu Mizoramah lo lutin, thla khat dawn lai mai Aizawlah chanchintha a hril tih hriatchhuah a ni a, Serlui Presbytery-a kan awm lai khan kan Presbytery chuan Synod-ah thlen in, a hma a kan lo hman thin January 11 chu thlakin kum 2012 Synod inkhawmpui chuan March ni 15 hi chanchintha thlen ni atan a pawm ta a ni.

Rev. Williams Williams-a hian March 5, 1891 Ningani ah khan Jhalnacherra atangin Tlawng luiah lawngin a lo chho a, tichuan a karleh Nilaini ah chuan Tut chhuah Vaihoin Guturmukh an tih chu a lo thleng a, chuta tanga kal zelin, Pathianni March ni 15 ah chuan Mualvum kai, Kutbul lui chhuah an tih chu a lo thleng chho ta a, a lo thlen ni hian Mualvum naupang thenkhat hnenah Bible milemte semin, a theih ang angin thu a hril ta a  ni.