- T. Lalhlimpuii -
keini Diakkawn Presbyterian Kohhran Sacrament Department te chu Kohhran leh Sande Sikul Committee te duhsakna in Aizawl Synod hmunpui tlawhin ni 4 khan kan kal a, kan chhuah hma hian Naupang Sande Sikul lam Superintendent Tual Upa V. Pazawna’n tawngtaina a min thlahin zing dar 6:25 vel khan kan chhuak a, Synod hmunpui tlawhna a kalte hi kan vaiin mi 65 niin, naupang 56 leh zirtirtu 9 te kan kal a, kan chuan nan Sumo paruk kan hman bakah Pi Mami(Zirtirtu)te Santro kan keng bawk a, kan motor hnung theuh ah ‘Diakkawn Presbyterian Kohhran Sacrament Department’ tih hi kan tar kalh a, VIP intive em emin, kan hawisang kher mai.
Harsatna engmah tawk lovin tluang takin kan kal a, dar 9:40 velah ATC (Aizawl Theological College) kan thleng a, anni’n kan motor te campus chhunga dah min lo phalsakin, dinning Hall ah kan chawfun te eiin kan vei harh a, zunram thiar zawh hnuah ATC kan fangkual a, an Library ah te lutin, kan enkual a, chumi zawh ah archive lamah lutin thil hlui hrang hrang te kan en leh a, Mizorama Kristian hmasate thlalak te, Pu JM Lloyd-a thutthleng te, mit titlai tham tak chu an ni. Biblical Garden lam kan pan leh a, chutah chuan Bible-a thingkung awm ang te leh Galilee dil lem te chu kan hmu hlawm a, Beth Tepillah, tawngtaina hmunah te kalin, min hruai kualtu(Guide) chuan ATC chanchinte min hrilh a, Kum 1907-a Zosaphlui(Rev. D.E Jones) in Mission venga ATC a tan dan te, kum 1924-a Durtlang a an sawn tak thute chu a sawi a, a ngaihnawm hle a ni.
ATC kan fankual zawh hnu chuan kan Motor theuha chuang lehin, Mission vengthlang lam kan pan leh ta vang vang a. SMTC( Synod MultiPurpose Trianing Centre) ah chhukin, min lo dawngsawng tha hle a, hunserh te min neihpui zawh hnuin an training na hmun te min fanpui leh zar zar a, SMTC hi kum 1996 khan tan a ni a, a hnuaiah hian puanthui zirna(Mipa leh Hmeichhia) pheikhawk siamna leh Computer lam zirna te a awm a, hmun danga zirna man aia tlawmin an zirtir thin a ni. An puanthuitute pawh an hlawk hle a, an puan thui man a tlawm avang pawhin veng chhung mipuite’n kawr an rawn order thin thute min hrilh a, a thawktute nen pawh thla kan la ho nghe nghe a ni. Kan kal lai hian an zaipawlten Music Video Shoot an tum lai vel a ni a, an lo cheimawi hle nghe nghe a, an zirlaite awmna tur hostel pawh an lo sa rup rup maia, a len hmel ngei mai.
SMTC kan tlawh zawh hian a chhak lawka awm MTC(Missionary Training Centre) ah kan kal lehnghal a, a hmun boruak a nuamin khawthlir pawh a nuam hle a. MTC hi kum 4 course niin, zirlai 44 tunah hian an nei mek a, class khatah mi 15 zelin an inthen a, pastor ni turte pawn training an la lawk thin a, class 12 pass hnuah chauh a zir theih a ni. An archive ah te kalin, khawvel Sande Sikul ni a keini naupang lamin kan zir Missionary Martar te, Nula Machhungi thlalak leh thawmhnaw thenkhatte pawh hmuh tur a awm nghe nghe a, an library ah te min hruai kual zel a, lehkhabu chhiar chakawm tak tak a tam hle a ni.
Chawhnu dar 1:45 velah thingpui in turin Synod Office Canteen lam kan pan ve thei ta hram a, kan Pastor R. Lalremruata’n min lo hmuakin, min lo buaipui nghal a, canteen chhungah hmun kan indaih loh avangin kan nghak rih a, duh angin kan che chak thei lo a ni. Chhun thingpui in zawh hnuin Synod Office chhung lamah kan lut a, kan guide chuan room hrang hrang min hmuhkual a, an devotion room te, JM Lloyd-a hall te, recording studio te, a pui hlawm hle a ni. Tunah hian hnathawktu hi mi 110 vel an awm a, biak an nuamin min lo dawngsawng tha hle a ni. Tun hmaa kan Biala Pastor a lo awm tawh, tuna kan Synod-a Senior Executive Secretary ni mek Pu Zuia pawh kan han chibai ve nghe nghe kha. Synod Printing Press lam pan lehin, khawl an neih thar laia lu tanna khawl anga an insawithaih thute chu kan zirtirtute min hrilh a, a nuizatthlak ang reng, kan ngaihdan ang ang hian kan sawi tawp tawp zel chu a ni mai si a. An chhun chawlh lai a lo ni hlauh mai a, an hnathawk lai kan nang hman lo a, mahse khawl lian leh changkang tak tak hmuh theih pawh kha a ropui ve hrim hrim. Banglapui te tlawhin, Pi Zaii in pawh kan tlawh tel a, a hmun a nuamin, a boruak a thiang bawka, kan vei tawn sek a, awmngaihna kan hre lo a ni ber mai. Centenary Khuang kan han hmu chiah phei chu, sawi tur hi a vang asin aw! Kan thlalakna pawhin a daih lo a ni ber mai. A ropui dangdai kher mai, sawi dan vak ka hre bik lo!
Kan innghahkhawm hnuin, haw lam kan tintuah tawh a, a hnuhnung ber a kan tlawh tur, a mimal tak pawha ka ngainat ber, ‘Hmangaihna in’ lam chu kan pan ta a. Compound-a kan lut chiah chu naupang ho hi inchung atang hian an lo dak thla tham hlawm a. In chhung kan han lut chu an lo tlan khawm diah diah a, a then Walker-ah an lo thu a, nuam an ti ve hle a ni. Beginer leh Primary rual vek an ni a, an te ber chu kum pawh la tlinglo a ni. Kan pawisa thawhkhawm tlem te chu kan hlan a, an hotunu in hnukulh teuh chunga lawmthu a sawi phei kha chuan mittui a kochhuak hnem kher mai. Pi Mary’n tawngtaina te neiin, hunin min daih loh avangin reilote chauh kan awm hmana, a tuapawh khan kan hun hman kha kan kham lovin ka ring. Hnathawktu tlemte-in naupang 25 an enkawl a, engtiklai pawha tawngtaipui reng an ngai nilovin an phu ngawih ngawih a ni. “Kristian ramah Home a awm a lo ngai tawh a nih hi” tih pahin kan chhuahsan ta a, rilru a kalthui duh ngei mai.
Keini department mai ni lo. Diakkawn Kohhran Naupang te hi kan nihlawhzia a lang chiang hlein ka hria. Malsawmna tam tak kan dawng a, chhungkaw tha tak, kohhran tha tak leh zirtirtu kan nei te hi, Pathian hnenah lawmthu sawi reng tur kan ni. Keini Sacrament zirlaite hian kan kohhran, zirtirtute leh nu leh pate chungah he hun tha tak min pek avang hian lawmthu kan sawi e. Damtak leh tluang taka min hruaithlengtu kan Pathian hnenah ropuina awm rawh se. Amen.
No comments:
Post a Comment