VAWKHNIAHZAWN THLA LEH KRISMAS THAWHLAWM

 -V. Pazawna-

Kum khat chhunga ruahtui tlak tam vanglai, July (Vawkhniahzawn thla) kan hman mek laia Krismas thawhlawm chungchang han thlur bing chiam mai chu a inthlahrunawm deuh; mahse a tul si.

Hmun khatah : Kum engemawzat chhung kan Kohhranin veng then hrang hrangah Krismas kan hmang ta a. Kohhran khat rau rauah pawh veng hnaivaia awmte inpawh tlan nan a tha ngang mai a, mi hmantlak leh tangkai kan lo tamzia pawh a lang thin. Amaherawhchu heti renga kan kal chuan Kohhran khata lawi si hi inhmu mumal lova awm theih deuh mai a ni a. Kan Pathian Biak in berah lah eng engemaw harsatna avangin kan inhmu kim hlei thei lova, tun hma angin Kohhran hnatlang puite hi a vang tawh nasa bawk si! Mahni seh sehmual hrangah tiin kumtluanin kan tla darh sung sung a. Kumpui sul a lo vei a, lal piang lawmna ruai kilho tura lehkhabu pakhata hming ziakte Biak in leh a vela han lawiho nak nak chu thil hlu tak a ni ve alawm le. “Chaw vawi khat ei turin Biak in ka pan peih lo” ti mai lovin inpumkhatna ruaiah i ngai teh ang u. Kan chhungkaw dawhkan kila kan ei leh veng thena kan ruaitheh ang ema kan lo puar zo lo deuh a nih pawhin inhmu ngai lo leh inbe ngai loten Lal Isua avanga chawhlui kan han kilho hrim hrim hi thil hlu tak a ni phawt mai.

Bungbel ilo : Kohhran member 2500 vel lai ei tur hmun khata han buatsaih tur chuan bungraw ngah tawk a har viau ang; mahse tunah erawh Kohhran chhungkuate thahnemngaihna azarah mi ta ban buai lovin kan intodelh ta. Thu tung, ding chung leh ‘posi’ rem lo deuha chaw ei ngai tawh lovin hemi pual dawhkan kan nei ta thlap a. Thutthleng lah ni se tawkfang kan nei ta. A duh tan dawhkan chunga changel hnah phah ngata theh pawh a rem lohna tur enge awm ang?

Krismas Nang nen :    Kan chhungkuain vawksa kg khat kartlluan deuhthawa kan rin theih laia vawi hnih ruai thehna atana sang chuang fe han thawh mai chu khawvel tehna atang chuan na el awl tak a ni ang. Mahse Kohranho, chhungkua kan ni miau a. Chhandamtu piancham lawmna ruai atana tute chhungkua emaw kan han thawh kep thin hi a va remchang em! A hranpain an inah kalin vawksa ser, bawngsa ser va khai lut dawn ta ila, kan rilruin a phal thlap pawh hian zahah kan la deuh roh a.Thil tha kan hriat reng hi tih lohin a liam leh thin. He mi hre ran hian a ngaihtuahtu pawlin chhung tin dinhmun thlir ran chungin thawhlawm thawh dan tur bengsikin an han ngaihtuah ta a. A lo zik chhuah dan man fuh vek ila chuan, “Min van han tuk tlem bik ve aw..” , “Ti zat kha min tuk na a, zanga/sangkhat kan han thawh belh ang e” , “Hmun danga hman ka tum na a, mi dang ka thawh kep ni teh se” tih vel hi a ri nak nak ang maw le!
    Nikum kan thawhlawm kha thil man lo to zel nen cheng singnga velin kan daih lo va, he mi hre ran hian chhungkaw tamtak chu beisei san hret kan ni a, puitling takin lawm takin kan pawm theuh ang chu.

Krismas Bazar : Pathian hruainain ‘Ber’ thla kan han chuangkai ang a, Naupang khawmpui lo thlengin nu leh pa tamtakin fate khawmpui kawr thar kan leisak leh ngei ang. “A tul lo” titute hi a lei hmasaah kan tang zel si a le!  An khawmpui thawmhnaw pawh a la chul hman lo tihah November thla nawi lam atangin bazar leh dawrah an mit la turin dawrkai ten an pho chhuak leh ang a. Sum bawm ruah thak thlenga fate chunga hmangaihna lantir kan awm leh ngei dawn. Chuitih laia thenawm pa, Krismas thawhlawm khawna rawn lut hian kan lakah cheng sangkhat thuartham chauh rawn beisei mah se, cheng zanga note hi lian lerh lerh tawh tak a ni. Ni danga eng thama kan ngaih loh kha hetih hunah zet chuan kan mitah a lang hrawl tawh tlat! Chuvang tak chuan committee-in hetiang hian rem an han ruat a. Krismas rim a la nam hma fe, tlangsam par hma, mas tree leh naupang lawm lei a la tul hma hian lehlam hawi chungte hian lo pe zung zung ila, hriat loh karah kan ngah der mai dawn a ni.