In Life and Death

(Nun Krista, Thih hlawkna. Phil. 2:21-24)

- Lalremngheta Chawngthu

Nun hi Krista: "Nun hi Krista" tih hi Bible lehlin thara "Kei zawng Krista tana nung ka ni" tih hian a tifiah viau mai. Krista thisena lei tawh, mahni ta ni tawh lo, mahni tana nung thei tawh lo nun hi a ni a. A neitu Krista tana inpekpumpuhlumna hi a ni. A nun atanga Krista lakchhuah a nih chuan nun ruak ni mai tur nun leh a awm dan Krista chanchin tha nena inmawi nun hi nun Krista chu a ni. 

Tirhkoh Paula nun kan en chuan heng zawng zawng hi kan hmu a ni. Damaska daia engin a chhun thluk atang khan englai mahin Krista nen an inhransan tawh ngai lo. Jentail-te hnena tirhkohva siamtu leh a hrehawmna leh tawrhna hmuna thlamuantu leh tichaktu chu Krista a ni. A hlimna leh lawmna ber chu Krista a ni a, a lawmman hlu ber chu Krista a ni. Nun a duhchhan ber chu mi dang tana malsawmna a nih ve theih vang chauh a ni. 

Kan damchhan ber hi eng nge ni ve le? Kan damchhan nia kan hriatte hi thihchhan tlak an ni meuh em? He khawvela sum, nihna leh ropuinate hi thihchhan tlak a awm si lo. Kan hnathawh chhan hi hlawh kan duh vang a ni thin. Kan rawngbawlnaah thleng hian lawmman hmuh hi kan inbeisei sang viau thin em le? Chawplehchilha a nghawng kan hmuh loha beidawng mai thin kan nih chuan a fuh lovang. Amah Isua Krista hi kan lawmman hlu ber a ni tih hi kan theihnghilh zing viau mai thei a ni. Nun lam uluk chuang si lo, mi dang tana malsawmna ni tlem hle si, thih hreh lawi viau si hian Vanram ngaih kan tina viau em?

Ni khat tha taka hman chuan tui taka muthlih theihna a rawn thlen ang hian, tha taka nun hmanna chuan hlim taka thihna pawh a thlen a ni. I nun i vawn that chuan, Lalpan i thihna pawh a vawng tha ang. I nun Pathian kawltir la, i hman thiam aia tamin Ani'n a hmang ang che.Thih pawh hlawkna: Khawvel thila ngaihtuah chuan, thihna ber kher hi chu hlawkna a nih dan a vang khawp mai! Rokhawmtu duham takin ro a khawm tum chuan a awm ve mai thei. Tuna kan sawi tum nen hi chuan a inpersan nasa khawp mai.

Tirhkoh Paula kha Rom khaw tan inah rorelna nghakin a tang mek a. Chhuah zalen a ni mai thei a, a thihna turin ro rel a ni mai thei. A nun chuan mi dang tan malsawmna a la ni dawn tihna a ni a, a thih erawh chuan Krista nen chatuanin an changdun dawn si. Ding lam leh vei lama lung bang sang takin a karcheh, hma lam pana kal mak angin, duhthlan tur zawk a hre lo a ni. Ama lam ngaihtuaha thih a chak laiin mi dang tana nun tul a ti bawk si. Paula nun kha a awhawm ngawt mai; thih leh damah thlan tur a hre lo.

Ni tin mi 82,000 vel, second tin mi 1.05 vel an thih vang mai hian thihna hi sawi nep theih a ni chuang lo va. I thihna kha i tan chuan a pawimawh ber. I tan emaw mi dang tan emaw hlawkna a ni ang em! Mihring tan vawi 1 thih ruat a ni a, chumi hnuah chuan rorelna a awm ang.

Walter C. Wilson-a chu a thusawinaah Pathian awm ring lo pakhat hian a lo hnial a, "I thusawi ka ring lo, ‘thihna hi thil zawng zawng tawpna a ni’ tih chauh lo chu," a ti a. Wilson-a chuan, " Kei pawhin  i rin ang chuan ka ring ve tho alawm," a ti a. Chu pa chuan, "Tak tak maw?" tifuh inti zet hian a lo tihu a.  Wilson-a chuan, "Thihna hi i thilsual tihna te, i hlimna te, i thiltum te, i thiante leh chanchin lawmawm i hriat zawng zawng tawpna a ni a. Chumi zawhah chuan thimnaah i kal ang," a ti a. Tihian a sawi zui a, "Thihna hi ka vahvaihna te, ka tahna te, ka hrehawmna zawng zawngte tawpna a ni a. Chumi zawhah chuan Lalpa hnenah ka chawl ang," a ti a. Chu pa chuan, "Chuti ang chuan ka lo ngaihtuah ngai miah lo," a ti a, a pianthar phah ta a.

Thihna chu khawvelin hlimna leh lawmna a pek theih zawng zawng tawpna a ni a, khawvelin a hriat theih zawng zawng lungngaihna leh hrehawmna tawpna a ni; thil zawng zawng tawpna a nih chu!  Thihna hi chatuan hmun kawngka hawnna chahbi rangkachak a ni. Kan dam laia kan hriat fiah loh zawhna zawng zawngte hi chhanin a awm tawh ang. "Thihna hi enna leh hmangaihna a ni". Nun hi Krista tan a ni a, thih pawh hlawkna.