KANANTHAR LAM AH

Nl PC. Ramfangzauvi
Missionary, Kananthar

Ka awmna Kananthar khua hi kum 1982 ah khan Aizawl Ramthar veng Presbyterian te'n Bru khua pathum ni thin kha khaw pakhat a sawikhawmin Kananthar khua a lo piang ta a ni. Kananthar khua hi in za dawn lai an tling hman tih in, kum 1997 khan an ral tlansan leh ta si a, mi tlemte in hnih (2) vel chauh an awm ta a. Tichuan hun rei tak hnu ah tihian an lo pung ve leh ta hret hret a.

Tuna kan dinhmun chu:

In zawng zawng zat           58

Kristian in zat                   50

Kristian ni lo In zat             8

In awm pawlhna                4

Sunday School Dinhmun

Ka awmthlak kum (2012) July 30 Khan Sunday school hmingziak 50 an ni a. Tun dinhmun ah chuan hming ziak zawng zawng 163 kan tling ve ta. Tin, hei mai bakah hian Kristian Thalai Pawl pawh a hma hian an lo ding tawh lova, June thla khan KTP pawh kan ding ve thei ta a, member pawh 27 zet kan awm ve mek a ni.

Hetiang dinhmun kan din theih nachhan chu Kohhran hote'n Pathian hnena min tawngtaipui vang a ni a. July 30 khan kum khat ka lo awm tling ve ta reng mai. Ka awm hnu hian Baptisma pawh mi 61 laiin an chang ve ta a, he'ng zawng zawng awm theih nachhan chu Kohhran hote tawngtaina vang chauh a ni tih ka hria a, min tawngtaipuina kha a thlawn lova, hma kan sawn ve zel a ni tih ka sawi duh a ni. Keimah lamah chuan engmah chhuan tur ka nei lova, thiamna leh finna te, remhriatna te pawh ka nei lo tih min hrechiang tute vek in ni a, tawngtaina a min hre ve reng turin ka sawm duh che u a ni.

Kan Pathian hi Pathian nung leh engkim tithei, tawngtaina chhangtu Pathian nung rintlak leh belhtlak chu a ni ngei a ni tih Kohhran hote'n hre thar leh theuh ang u. Kan Pathian hnen ah hian kan duh leh mamawh te ringhlel hauh lova kan dil chuan kan hmu zel thin a, kan mamawh leh kan duhzawng kan thlen te kan hmuh zel theih nan a duhzawng in i awm zel ang u.

(Nl PC. Ramfangzauvi, d/o Upa PC. Lalhmingthang (L) hi Synod Home Mission hnuaiah Kananthara missionary ni mek a ni a, kan ngenna ngaipawimawhin hun chep tak kar ah report ngaihnawm tak a rawn ziah theih avangin kan lawm hle a ni.)