TUNLAI HARHNA LEH KAN KOHHRAN

-- Tv. Lalthakima

        Chawlawlnain min tuam a, Pathian hnaih lote tanah han hnaih dan kawng reng reng a awm dawn tawh lo emaw tih laiin leh, \henkhatin, "Khawngaihna hun a tawp tawh" tia mahni rilru tiah lek leka Pathian thu an au chhuahpui mek laiin kan Pathian khawngaihna chu Zoramah meipui angin; kan ngaihtuah dan piah lam daihin a rawn alh leh ta hluah hluah mai le! A lawmawmin a va ropui em.

'Ngaiteh u, Pathianin he khawvel thila retheite hi rinnaa hausa tur leh, amah hmangaihtute hnena a tiam ram chu luahtu turahte a ruat lo vem ni' tih ziak ve bawk mahse; tun \um harhna hi chuan 'a hausa sa a hrut' emaw tih mai turin a ngaihlutu tam zawk nia langte hi dinhmun sang tak taka dingte an ni tlat mai! Zoram pum huap pawha 'veng hausa ber' tia han chh^l ngam tur Zarkawt Kohhrana Revival Retreat neih zawh takahte khan: an Usher-te nen lam khan an lam d^wr d^wr mai a, taksa chetnain nasa taka a han nuaite kha a ropui tak zet zet a ni.

Kan Kohhran a\anga Pastor chhuak, Zoram pum huap ang pawha kan ngaihsan em em Rev. C. Chanchinmawia'n, "Tun harhna lo thleng hi a changtute hian an chan hrilh fiahsak an duh kher lo, hrilh fiah lo tum pawh a \ul lo, kan chan \heuh tur a ni," a tih kha a dik khawp mai. Rawngbawltu tam tak chuan an zir thiamna a\angin sawi fiah an tum a, an hmu dik thei lo; an zir dan piah lamin a rawn thleng tawh si. Lal Isua'n 'Buh seng thlengin lo \o za rawh se' a tih ang deuhvin he harhna lo thleng m>k pawh hi kan ril rem a ni emaw, ni lo emaw \ha takin lo dawngsawng ila, a \hat ber a rinawm.

Pathian khawngaihna a zarah kan kohhran pawhin he Pathian khawngaihna lo thleng mek hi kan chang a ni a, a lawmawm tak meuh meuh a ni. Engti anga dawnsawn zel tur nge ni ang? A pawimawh nia hriatte i han sawi dawn teh ang.

(i) Rawngbawltute tan: Kan hruai hnaih hleihtheih loh Kohhran member, |halai member, Kohhran hmeichhe member, Pavalai member tam tak an lo hnai ta a. Pathian thu taka lo chawm zui tur leh chher puitling deuh deuh turin kan inbuatsaih a pawimawh hle niin a lang. 'Rei an daih leh tak tak chuang lo vang' tia lo ralkhat thlir mai lovin; daih rei leh lo tur anga kan hmuhte hian rei tak an daih theihna turin theihtawp kan chhuah a, inngaihtlawmna nen Pathian hnenah hruai dan tur kawng kan dil/ zawh a pawimawh hle ang.

(ii) Inlungrualna: II Korinth 13:11-ah, "A tawp berah chuan unaute u, lawm takin awm rawh u. Tih\hat famkimin awm ula; thlamuang takin awm ula; rilru hmun khat pu ula, lungrual takin awm rawh u; tichuan hmangaihna leh remna Pathian chu in hnenah a awm dawn zuk nia," tih kan hmu a. 

Kan kohhranah Thlarau Thianghlim p^wlna nasa tak a lo thlen zel theih nan rilru hmun khat kan put a, kan inlungrual a pawimawh hle. Danglam deuh leh dik lo deuh nia langte haw mai lovin leh en hrang mai lovin fuih zawk ila, insiam \hat mamawhte'n insiam \hat hreh lo bawk ila. 'A leia mi rel ngai lova' tih angin thu t>nau leh sep septe hi tihbo tum tlang ila. Chu'ng chuan kan Kohhran boruak alh zel turah \angkaina tam tak a nei ngei ang. Tin, 's^n leh lansarhnate kan chan hian kan Lalpa ram a zauh phah miah lo' a ni tih hriain Sam ziaktu'n, "Lalpa keini ni lovin, keimahni ni lovin I hming chuah chu ropuina pe zawk ang che," a lo ti ngawih ngawih ang khan, kan tih apiang Pathian ropuina turin ti ila, Lalpa ropuina tur chauh zawng ila. Lalpa ropuia a lan hunah ropuiin kan lang ve mai dawn a ni.

(iii) Kan kohhran zai a'n sak deuh \um te, l^m an han tlem deuh \umte hian 'Enge a chhan ni ang le; tihsual kan nei palh emawni le' tia rilru lo s>ng \hinte hi engzat tak awm ang imaw. Nge, engtin paw'n kan Kohhran hi awm se, kan en liam mai mai \hin zawk le... Kohhran chauhnaahte hian chau pha ve ila, a natnaahte hian i na ve pha ang u.

(iv) Tin, harhna chang zawng zawngte'n ni tina Pathian duhzawng kan tih zel a pawimawh hle. Phurna inhruaitir mai lovin Lalpa duhzawng kan zawn a pawimawh a, chutah chuan hlimna leh ham\hatna dik tak a awm a ni. Phurna awm lohna hmunah Lalpa duhzawng kan ngaih pawimawh a, a thuawihna kawng kan ngaihven tlat chuan a nawlpui phurna leh a nawlpui anga kan hlim hup hup loh hunah pawh lawmna ruk kan nei reng dawn a ni. Hlim em em lawm si lote hi a chhan ber chu Pathian duhzawng tihna kawngah an tlan taihmak tawk loh vang a ni a, inkhawm peih viau \hatnaa parchhuahpui tham khawp lawmna an thinlung lam fantu nei si lote pawh hi chutih vang tho chu a ni tlangpui \hin.

v) A tawp berah chuan phurnaah innghat lovin 'Lalpa duhzawng enge ni' tih thu-ah hian i innghat reng ang u. Kan phur leh phur loh lam chu thu dang ni se, 'Lalpa duhzawngin ka awm/nung em' tihah hian kan rilru awm reng rawh se.

SAKHAW HMASA TE LEH KRISTIAN SAKHUA

-- Charles Zualtea

    Khawvel mihring hnam hrang hrang te hian min siamtu leh kan chunga thilti thei tu awm niin kan ngai vek a tih theih awm e, chuvang chuan khawvela hnam hrang hrang te hian sakhua kan nei hrang thluah mai a, keini Mizo te ngei pawh Kristianna in kan ram alo thlen hma chuan sakhua kan nei thin a nih kha. Kristian sakhua ang bawk hian khawvelah hian sakhaw hrang hrang tam tak a awm a, chung sakhaw hrang hrang te pawh chuan pathian biak bik te neiin, innghahna Lehkhabu an nei ve a, Christian sakhua awm hma hian khawvelah sakhaw lian tak tak  a lo awm tawh  a, chung zinga thenkhat te chu an chanchin tlangpui han tar lang hmasa i la

BUDDHIST SAKHUA/BUDDHISM: He sakhua hi kum zabi 5 (BC/BCE) na hunlai tawh khan Siddhartha Gautama’n a hmuchhuak a, he sakhua hi India rama a hmuhchhuah a ni nghe nghe. He sakhua hian khawvelah zuitu vaibelchhe 35 chuang a nei a, zirtirna tha tak tak a nei ve a, Tualthah loh tur tihte, Dawtsawi loh tur tih te, Rukruk loh tur tih te, Ruihtheihthil tih loh tur tih te, Hmeichhiat mipat hmansual loh tur tih te a tel ve vek a ni. He sakhua in thihhnu lam a zirtirna emaw rindanah chuan mi zawng zawng hi he khawvelah kan kumhlun dawn lo a, khawvelah kan lo piang a, chutiang bawkin kan thi leh vek dawn tih a zirtir a, amaherawh chu thihna hi a tawpna nilo in kan thlarau te chu he khawvelah la chambang in taksa thar dang ang in kan lo piang leh ang a, mahse kan damlai hun hmasa kan hman that leh that loh dan a zirin kan piang tha in kan piang tha lo dawn a ni tih a zirtir thin a chu chu ‘Karma’ an ti a, kan damchhungin he khawvelah midang te tana hlimna leh lawmna thlen tu kan nih chuan kan nun a hlim ang a, midang te tana harsatna siam thin tu kan nih chuan kan damchhungin lungngaihna kan chungah a thleng thung ang tih a zirtir a ni. Buddhist sakhaw lehkhabu thianghlim te chu Pali Tipitika, Mahayana, Vajrayana leh Canons te anni.

HINDU SAKHUA/HINDUISM: He sakhua hi India rama tanga lo piang bawk a ni a. ‘Hindu’ tih hi Persian tawng ‘Sindhu’ (emaw Indus) lui tih atang a lo irh chhuak a ni a, Kum Zabi 14 na lai vel khan Indus lui kiang vela cheng te hi Arab ho te leh Persian ho ten hindu tiin an ko thin a chuta tang he thu mal hi, British ho in kum zabi 19 na ah India rama mitam zawk sakhua sawinan ‘Hinduism’ tawngkam hi hmang in a lo piang ta a ni. Amaherawh chu he hindu sakhua hi engtika lo piang chhuak nge? Tu hmuhchhuah nge? tih hriat chiah a ni tawh lo a, Indus Phairuam vela an chenlai daih tawh kum 2000 BCE lai vel tawh a lo piang chhuak ni a ngaih a ni ber. Hindu sakhua zirtirna hian mihring pian nawn leh zelna, kan lo thih pawn kan piang nawn leh thin a chu chu ‘Samsara’ an ti. 

Mitin an damlaia an thil tih ang zelin an lo piang nawn leh thin a, (Karma tha leh Karma thalo) piannawn chhan nei vekin an ngai a. mihring lo piang chhuak a hrisel emaw, a piang sual emaw, a hausa emaw lo ni ta se, chu mihring lo piang chu a damlai hmasa a a thiltih ang zel a a chunga lo thleng leh niin an ngai. Kristian ten ‘Tuhrah seng’ kan sawi thin ang ve deuh hi a ni thei ang. Damlai nun hman dan a zirin mihring te hi piang nawn leh zel tura ngaih an ni. Amaherawh chu an piang nawn reng chuang lo a, tawp chin a nei ve thin a, chu chu ‘Moksha’ an ti. Hindu sakhaw in nghahna lehkhabu thianghlim hrang hrang te chu Vedas, Upanishads, Bhagavad Gita leh Epic te anni.

CONFUCIANISM: He sakhua hi Kong Qiu(K’ung Ch’iu), Latin tawngin Confucius-a ti a lak chhawn a ni a, 500 BCE na lai vel khan China ah lo din tan ani tawh a, mitam tak chuan sakhua ah an ngai lem lo. Confucius a zirtirna hian Chinese khawtlang nunah hmasawnna tam tak a hmuhtir phah a, inpawhna tha zawk neih nan a hmanraw pawimawh taka lo ni a, pathian biak bik leh thihhnu lam chungchang  lam rindan inzirtirna awm lem lo mahse he zirtirna hi zawmtu /pawmtu an tam hle tho a ni. He zirtirna ah hian midangte nun zahsak te, Nu leh Pa zah te, zirtirtu thuawih te leh aia upazah te a zirtir nasa hle. He sakhaw lehkhabu te chu Lunyu, Wujing, Sishu te anni. 

DEPRESSION

-- Mapuia Pautu

Tunlai a lar em em mai, a nihphung leh a awmzia chiang faka kan hriat chian loh vanga mi Thenkhatin kan palzam mai mai, \halai tam takin an mahni Nunna ngei an lak phahna ni si chu ‘Depression’ hi a ni awm e. Chutih rual chuan a awmzia tak tak erawh chu kan la man chiang ta chuang lo fo ni in a hriat.

Depression chu ‘Nguaina emaw Pawt hniam’ emaw tihna mai a ni a, ni hnih khat lek enge maw vanga kan han nguai deuh pawh hi ‘Depress’ chu a nih rualin, kan nunphung, kan rilru hawi lam leh kan mizia ah nghawng a neih lem loh chuan ‘depression’ a chhiar a ni lem lo in, rilru lam daktawrte’n Depression an tih tak hi a phawk chhuak lo a, hei hi chu mihring nih dan phung ve reng a ni. Rilru lam daktawr te chuan depression hi Natna tlanglawn tak, enkawl a tihdam theih niin an sawi a, enkawl loh emaw, ngaihsak loh emaw chuan thihna hial thlen thei a nih avangin palzam mai mai emaw chi a ni lo.

Depression hi a thlentirtu chi tam tak awm mahse, hlawm lian tak pahnih Biological factor leh Environtmental factor ah an then a.

BIOLOGICAL FACTOR: Hei hi chu keimahni atanga lo chhuak, kan ngaihtuahna te, kan thil tih tum a kan hlawhchham vang te, kan inngaihtuah lungpuam vang te a lo thleng a ni a, a chhan ber ni a an sawi thin chu kan thluak  hnathawh kal dik loh vang a ni tlangpui.

Hmeichhia te ah chuan hei hi a thawk nasa thin a, Naupai lai leh Thi neih (menstrual period)lai in a nasa zual hle thei a, a reh zui ve mai thin rualin a thawk nasa zualah chuan Nupa inthen phah der pawh an awm fo. Chaw ei tui lo te, Mut that theih loh te, hlauh neih tlat te leh thil dang tam tak angin a lo langchhuak thin a, clinical depression ti a sawi a ni bawk.

Hmeichhhia zawng zawngah a lang chhuak vek kher lo ni a sawi a ni a, mahse a nasa zualah chuan chenpui harsa khawp pawhin a thawk ve thin a, hetih lai hi chuan chhungte leh a chenpuite tan enkawl thiam a, dimdawi an ngai lehzual hle a ni.

ENVIRONMENTAL FACTOR: Hei hi a pawimawh leh mi tam takin kan hmachhawn thiam loh a ni. Kan vela thil thleng hrang hrangin min nghawng dan te, chu chu kan lo dawnsawn dan a zir te a lo thleng a ni ber.

Ngaihzawng vanga rilru buaina te, Nupa nun a buaina te, mahni inchhungkhur harsatna vang te, \hiante leh \henawm khawvengte nena harsatna neih vanga buaina te leh thildang tam takin a thlen theih a ni. 

Tin, pawimawh em em mai chu \hiante leh hnathawhpuite, Kohhrana rawngbawlpuite’n min endan te, min dawnsawn dan te, min \awngkhum dan te avanga mahni inngaihhniamna (Inferiority Complex) hian nasa takin depression a siam thei tih hriat a tha a. Chutiang a nih avang chuan keimahni’n depression kan nei thei a ni mai lo a, keimahni avangin mite’n depression an lo nei thei reng tihna a nih chu!

Chuvang chuan, rawngbawltu chuan kan landan te, kan kawngka chhuakte hi kan fimkhur a lo ngai hle a ni tih kan hriat nawn a \ha a, kan hriat loh in kan memberte kan lo ti na viau thei a lo ni a, ngaihtuah mang lo a kan sawi liam mai hian kan rawngbawlpuite ah hliam nasa tak a siam thei tih i hria ang u.

DEPRESSION LANCHHUAH DAN: Hlim chang te, lungngaih chang te, Tah chang leh Nuih chang te kan nei hi Mihring nihphung reng a nih rualin, depression lanchhuah dan hetiang hian an sawi a.

 1. Beisei tur nei lo riau a inhriatna a lo awmin.

 2. Thiante leh an phur zawng tak te’n a tihphur zawh tawh loh in.

 3. Hah hluah hluah a inhriatna a lo awm in.

 4. Mut theih lohna (Mut hunbi mumal lo) leh Chaw ei tui lo.

 5. Tih tur awlsam tak thin pawh an huphurh hluah hluah zel in.

 6. An ngaihtuahnain a thim lam a thlir ngut ngut in.

 7. Zawldawhna tlachham leh thinrim hma riau.

 8. Ruihtheih thil chungchangah tihdan phung pangai aia tam tih mai pawisak lohna an neih in. 

Khawvel huap chu sawi loh, kan ramah ngei pawh hian thalai tam tak he natna avanga mahni pawh inngaihlu zo tawh lo, khawvel mawina te, khawvel hlimna te, Nu leh Pa leh |hiante hmangaihna te pawhin a chelhbeh zawh tawh loh, ‘Thih mai hi hahdam hliah hliahna’ ni a ngai an tam ta hle mai.

Lal Isua chhandamna hian ‘Thlarau chauh ni lo in, Taksa nen lam a chhandam’ tih pawmtute kan ni a. Thlarau bo chhandamnan kan theihtawpin kan bei reng chung hian he’ng natna khirh tak tuar mek, mahni taksa hunga thutawp siam mai tur, hruihrual nena hun hmang mekte hnenah hian Pathian chhandamna puang turin Kohhranhote hi Lalpa’n min ko a ni tih i hre thar ang u.

NILI PAW'N TLAI SE....A HUNAH A THLENG !

- Mapuia Pautu

      Damdawiinah thla thum chuang lai a awm ta, daktor te mai ni lo in amah ngei pawh chuan dam beiseina a nei chau hle tawh a. chutia natna khum bel a a awm reng lai chuan, tuk khat chu hma taka harhin, Pathian pawlna hun a hman mek lai chuan Johana 11:5,6 hmangin Pathianin a rawn pawl ta, a beiseina leh a innghahna, Doctor thiamna laka a beidawn vek hnua beiseina thar nena thuam a ni ta chu ‘Ni li paw’n tlai se, a hunah a thleng’ tih hla phuah thei tura Pathian buatsaihna alo ni reng mai! Thla thum lai liam tawh mahse, a hunah tak Pathian tihdamna a chang ta, Aron Wilburn-a chu.

“Marthi leh Mari, Isua au in,

I hmangaih a na, a dam zo lo ang.

Minpui rawh tiin.

Isua an nghah laiin, an hmangaih a liam ta,

Beiseiin an nghak, a lo thleng si lo

A va mak ngai em!

Ni li lai a liam ta, phum a nih chin,

Lusun hnemin an lo pung khawm rual duhte pawh

Isua a lo thleng, Tapin Marthi’n

Lalpa awm la chu, i tidam anga

A liam bik lo tur.”

Natna kan tuar a, thihna thlengin kan tuar. Midangin an tawrh chuan ‘Thihna leh Natna tuar vek tur mihring’ kan ni a, chu thil ngei chu kan chunga a lo tlak chuan ‘Mi vanduai chuang bik’ kan ni thung a!

Chumai a ni lo, kan tawngtaina leh Pathian kan beisei ve na zawng zawng chuan mual min liamsan thin. He Lungngaihna chirhdupah ngat hi chuan Pathian mi hman tak te pawh hian sawi tur hre lo in, an hawihai ve fo a, beisei tur reng reng hre lo in an kun ve tlawk tlawk thin zu nia!

“Ni li a liam ta, Beiseina a bo.

Lalpa a rei lua e, Kan va hrethiam lo em!

Mahse Lal remruat hian, lei mi dan a khum zo,

Ni li paw’n tlai se, a hunah a thleng,

Ava ropui em!

Isua a tap ta, thlan chu a thleng.

Thu chu pe in, Lung lum sawn r’u,

‘Lazar, lo chhuak rawh’

Thlan puana tuam chungin, a lo chhuak ta.

Phelh ula, kal tir r’u, tihdam a ni ta!

A dam! a Nung leh ta!”

Natna kan tawhin Pathian hnenah min tidam turin kan tawngtai a, min tihdam hun tur chu Pathian kuta dah mai awm kan nih laiin, kan rilruin a hun tur ruahmanna kan siam lek lek fo a, Pathian a rawn che tlai deuh ni a kan hriat chuan ring kan fan kan fan tawh mai thin.

Harsatna kan tawh hian Pathian chuan min kalsan ta emaw, auh phakah a awm ta lo emaw kan ti fo thin. Tih ve theih nei a kan inhriat chhung chu Pathian hian chet a lo tum hauh lo a lo ni a, A ropuina puannan chuan thildang a awm ve a remchang lo a ni zawk.

“I hringnun zawh laiin, harsatna tawkin,

Lalpa i au thin, a puihna nghakin

A thleng si lo maw?

Chauin zam mai lo la,

A la pangai reng, a lo thleng thuai dawn,

A tanpui ang che, a hrereng ang che.”

Daniela, Sadraka, Mesaka leh Abednego te thianho chungchang hi a ngaihnawmin, a ropui hle mai.

Daniela Sakeibaknei puk a paih an tum chhan kha Pathian laka a rinawm vang chauh a ni. Mihring hun chhiar danah chuan Sakeibaknei puk kotlang an thlen kha chuan Pathian rawn chet chu a hun ve tawh khawp mai. Mahse a hun a la thleng tlat lo!

Sadraka te, Mesaka te leh Abednego te khan rawhtuina meipui kha an hlau lo emni ang? Teh suh e, rawhtuina meipui aia hlauh zawk an nei  a ni. Mahse, a sat dan pangai aia a let sarih a tihsat rawhtuina meipui bulah pawh anmahni chhantu tur Pathian hmel reng reng a la lang lo!

Rinchhan tur leh thildang beisei tur zawng zawng a bo tawh hnuah, Sakeibaknei puk kawngkaah ni lo, a hun tak Sakeibaknei koham bulah, rawhtuina meipui bulah ni lo, a hun tak Meipui chhungah Pathian chuan a lo nghak reng a nih chu!

Nang pawh chauin zam mai lo la, i manganna chu a hria, Ni li paw’n tlai se, a hunah a lo thleng ang.

PROJECT VENG BRANCH TLAWH DAWN

Karleh Thawhtan zan khian kan Branch chuan Project Veng Branch kan tlawh dawn a, hetiang hi programme tlangpui a ni.
 A hmun : Project Veng Kohhran Biakin
 Hruaitu : Pu John Malsawmkima, Asst. Leader Project Veng  Branch
 Tantu : Nl. C. Lalparmawii, Project Veng Branch
 Reports : Branch Pahnih Secretary atangin
 Thuchah : Pu Lalhmachhuana, Leader, Diakkawn Branch

Fellowship Programme( Inkhawm ban)
 Hruaitu : Pu James Vanlalruata, Treasurer, Diakkawn Branch
&
 Pu Lallawmsanga Ngente, Treasurer, Project Branch
Special Items : Project Veng Branch atangin 2
Diakkawn Branch :
  1. Solo : Tv. Andrew Laltlankima
2. Female Voice. i/c Nl. Moreen Zonunmawii
3. Entertainment Sub-Committee a\angin
Ngaihhruina thilpek hlan:
(He huna kal tum zawng zawngte chu Thawh\an tlai dar 6:30 ah Biakin kawt a\anga chhuak thei turin kim vek tur a ni. Kan inngh^k thei dawn lo a ni.)

CHAWNGHEI TAWNGTAI HUN HMANG DAWN

Central KTP ruahmanna angin Dt. 13th July.2015 (ThawhTan zan) khian Branch KTP chuan thupui hrang hrang hmangin  chawnghei a Sual thupha chawi Tawngtai hun a hmang dawn. Kan thupui turte hi kan la inhriattir turah ngai ila. 

Chawnghei tawngtai hi zan Inkhawm tan hma dar 5:30 atanga tanin, darkar khat vel hmang tura ruahman a ni a, inkhawm dar hmasa rik hun dar 6:45 vela zo hman theih tura ruahman a ni.

KTP member a tam thei ang ber tel tum theuh ila, chutihrual chuan, chawnghei tawngtaina a tel ve remchang lo tan inkhawm inthlahrunna tur a awm chuang lo a ni tih kan inhriattir nghal bawk a ni  e.

PATHIAN FAKNA HLA: KRISTIAN HLABU A MITE

- Upa K. Thangmawia

SOLFA HLA HRUAI LEH VUAK ZAT MILA HRUAI :

Hla hruai thuah hi chuan ka Ball/Skill/tactic hi a hlui deuh tawh em ka ti a, kan inhman ve laia hla tho kha kan la sa si a, a thluk leh thute pawh a la ngai tho bawk nen, inthlahrung lovin ka han inleihbaw leh mai ang e.

Tun hma chuan, “Hlain vuak zat a ken zai ngai deuhin hla hi sak tur a ni.” tiin training naahte pawh min han hrilh ve thin a. Kan KHB-ah hian thluk chi hrang leh vuak chi hrang pali panga vel a awm a. Kan hlabuah hian vuak 3-leh vuak 4-hi a tam ber a ni. Tin, vuak 9 leh vuak 12 te hi chu vuak 3 ah leh vuak 4 ah thleh a ni deuh ber a. Tichuan a vuak zat a zira hla lak leh hruai dan kan lo hman ve thin chu hetiang hi a ni a, la hman zel tlak ni pawhin ka hria, hetiangin;-

 a) VUAK HNIH HLA : KHB No.584,543,539, leh a dang te,

Vuak hnih hla hi a tam vak lova, heng hlate hi chu tho deuh vah, harh leh perh deuh at a lak leh sak chi a ni tlangpui, ngui deuh ruaia sak a inhmeh lo.

 b) VUAK THUM HLA:

Heng hi kan hlabuah a tam hle a. A tlangpuiin vuak chanve te a awm chuan rang deuh lam ai chuan muang lam deuh, khunkhan leh urhsun deuh a sak hi a nuam tlangpui. Entirnan: KHB No.16,207,185. Heng hla kan han tarlante hi thovuka sak ai chuan muang fan reih rawiha thinlung lam fan raiha sak chi tura phuah ni awm tak a ni.

 c) VUAK LI HLA: 

Heng hlate  hi kan Hlabuah hian a tam pawl tak a ni a, a tlangpuiin muangduala sak ai chuan tho deuh vehvawha sak a nuam tlangpui a, rang deuh a sak pawh a inhmeh tlangpui. Amaherawhchu, tuarna lam emaw, thihna lam hawi a nih chuan tihdeuh vut vut chi chu a ni lem lo.

           Eng hla pawh nise, hla hruaituin a chang tawp leh thunawn tawpa thluk chungchang hi fimkhur a ngai em em tih hi hriatnawn mai ni lovin vawn reng tur a ni ringawt!! Thunawnah emaw, chang bulah emaw midangin an lakkhalh che chuan i lamah an pet goal, si i phur!!! 

A vuak zat inziak chiah chiah thluk kher  tur pawh a ni lo. A inziak aia rei pawh thluk a tul fo. Mipuiin kan lakrual theih tawk tur ngaihtuah a ngai a, mahni hmasial hun lo ber a ni ringawt mai ti ila kan uar lutuk kher lo ang. A vuak zat chu engpawh lo ni se la, kan hlabuah hian thupui chi hrang hrangin a khuhvel anih avangin a thupuiin a kawhdan a zira hla sak dan tur chu inhril chawp a ni ve tho tihte hi hriat tel a tha ang. Eng hla pawh hi Pathian biakna atana phuah a nih avangin miin Pathian a pawl theihna tur a a tha thei ang bera hruai kan tum tur a ni e.

Mipui pawhin kan aw neih zawng zawngin hla hi sa ve ila, phun sep sep hi hla sa/zai a tling em tih hi zawhna inzawhtheih tak pawh a ni awm e. Fakna hla hmanga Pathian biak leh chawimawi hi mitin mawhphurhna leh tihtur a ni e.

Branch Committee thu

Tunkar Ningani zan inkhawmban khan Kohhran Committee Room-ah Branch Committee neih a ni a, heta an thur>l kan hriat t<r \ulte kan han tarlang e.
 1. Finance Reports:
 Opening Balance          : 14,81,62.00
 Hmuh zawng zawng  :    23,355.00
 Total          : 1,71,517.00
 Hmanral                  :      2,220.00
 Closing Balance          : 1,69,297.00
 2. Diamond Jubilee hmalakna chungchang: August thla a kan Kohhranin Diamond Jubilee kan thlen turah hma kan lak tawh dan chungchang ngaihthlak a ni a, hma lakna tur a la tam hle a, ni 19 July thla hma ngeiin peihfel tur ang ang te peihfel hman ngei turin incharge hrang hrangte kan inbeisei a ni.

PATHIAN FAKNA HLA KRISTIAN HLABU A MITE

- Upa K. Thangmawia

        Presbyterian kohhranin kan hla bu hman lai mek hi vawiduailo a ennawn a, a siam tha bawk a,Baptist kohhran nen kan in hman tawm mek bawk.Kristian Hlabua hla awmte hi kohhran hla serhte an nih avangin a buchhunga a thluk dah baka thluk danga sak theih pawh hi kohhran duhdan leh phal dan ani lova, mitin ten i ngai pawimawh ang u. Mahni duh dan dana thlukkual kawi leh fawn kual pui vak chi pawh ani lo. Zaipawl te pawh hian an han thluk kikawi vel vak thin na a, a phuahtu thlarau lakah chuan a inthlahrunawm duh ngawt mai le. Kohhranin sak dan tur thluk a dah hi i zahin i zawm theuh ang u.

Kristian Hlabua Hlate hi thluk hrang hrang leh thupui chi hrang hrang keng ni mahse thil mak deuh mai awm ta  chu thluk intawma sak theih tlar khata thu awm zat inmil a tam hle mai a, a bua a thluk awm sa aia thluk danga han sak a, sak nuam zawk awm tak tak a awm thluah mai a, chung zingah chuan pakhat han thur chhuak ila; Krtistian hlabu No.209 ‘THU MAK KA SAWI NIN THEIH LOH CHU’ Tih hla hi han bihchian chuan  KHB(Kristian hlabuah) hian a thu leh tlar rempui/milpui a tam khawp mai a. Kan hlabua hlate zinga sak hlawhlo ber pawl KHB No.211-na ‘Kraws thisenin mi,chaktheilo’ tih hla te hi ‘thumak ka sawi nin theih loh’.....thlukin han sa chhin teh, mahni chauh pawh a hlim taka sak theih ani ve tlat mai. Kristian hlate pawh hi a thluk mawi leh sak nuam bik deuh chu a awm deuh zawng ani ange? 

Tichuan kan hla thlanchhuah kha han umzui leh lawk ila, heng Hla No.kan han ziahchhuahte hi mahniin lo enin he hla thluksak nuam tak hmang hian han sa ve chhin teh:KHB No.25, 28, 46, 55, 58, 62, 67, 101, 105, 125, 133, 136, 137, 139, 209, 211, 347, 363, 366, 394, 397, 398, 414, 442, 447, 459, 543, 552, 553, 563, 566, leh a dang la hmuh belh mai theih te. Tichuan Hla chi hrang 30 zet chu hla pakhat thluka sak theih a lo ni reng mai a, Kohhran Music Committee hian hetianga hla thu inzat, thluk inanga sak theihte hi chu huang han zauh deuh ta se, thluk thenkhat sak hlawh meuh lohte hi chuan Kohhran ho mualeng a hmu pha ve deuh mai lawng maw le?? A thu lawng lawng chu tha hle mahse a thlukah val kan buai thin zawng a nih hi !!

Inkhawma hla thlan chungchang: Pathian Biak Inkhawmah hian thil ngaihtuah chian ngai deuh mai chu inkhawm tan hmaa hlasak leh thlan thuah hian rilru hman ngai deuh mai pakhat a awm a. Mi zawng zawng intluk kan ni han ti thin mah ila, kan biakin ah hian tuemaw kutah innghah lutuk a awm theiin a lang a,chu chu inkhawm tan hmaa hla thlan chungchang hi a ni. Inkhawm tan hma darkar chanve chhung  hian hla pali panga te pawh sak hman a ni a; hla thlan chung changah hian mipui lam hian chanvo kan nei ani tih hi kan hre tawklo nia ka hriat avangin infuih thar ngaiin ka hria, tupawhin kan hla duh zawng thlan theihna zalenna kan nei, tih inhre thar ang u. Midang hla thlan sa sak reng mai ai chuan mahni hla thlan han sak ve te pawh hi nuam ve hranpa deuh a nia!! Kohhran Upa zingah pawh hla  thlan taima deuh deuh te hi kan awm thei a, mipui lam boruak en thiam ila,kan hla thlan tur te hi min lo hriat sak hial theih tura thlan ngun bik neih te pawh hi thil awl zate a ni ve thei a ni. Chuvangin kan fakna hla sak thin ah hian mitinin chanvo kan nei theuh, zalenna kan nei vek tih hria ila, tumah i inthlahrung lo ang u. Tupawhin kan hla duhzawng chu kan fak Pathian chawimawi nan huai takin i han thlang ve nalh nalh tawh teh ang u.

Hla hruai leh Khuang vuak chungchang: Hla hruai dan leh Khuang vuak dan Training pawh kan nei ta zauh zauh a.Hmanlaia khawchhak pa A AW B zir an sawi  hi kan ang deuh em aw tih changte ka nei ve  rum rum thin a. Tunah chuan  hla hruai nan khuang bakah Keyboard a kaihhnawih hmanrua eng eng emaw nen chhepchher nen kan ri ta bung bung a. Hla hruai dan thuah hian kawng thar pawh reh thiam a har viau maithei a, mahse Pathian Biak Inkhawm hi hun urhsun leh zahawm a nih miau avangin mahni phur dan zuia kal vak chu a tih chi lo a ni; heti hian kan rawt ve mai mai teh ang.

Khuangpu: Khuangpui pu hian thawm a nei lianin a mawhphurhna hi a sang khawp mai a, zai zawng zawng hi a thunun a ni deuh ber mai e a.  Hla a hruai a ni tih intheihnghilh palh a hlauhawm duh khawp mai, khuang vuak fung lek dan mawlh mai hi!!! A chang hi chuan kan lek thui lutuk deuh thin em aw?? A thawm na na hi tha tur chu nise a pa chak chak hi ruat ta mai ila...mahse maw, hriselna  lam ngaihtuahin kan inkhawmna rimawi leh thawm dang hian tu emaw chu Pathian fakna leh biakna rilru tibuai khawp hian hma kan lo la reng palh ang e. Tichuan Keyboard changtu hian  a hla key milin hla lak hi chang ta mai se, khuangpuin hla laksual a awm lo deuh mai angem? Solfa thluka sak tum pawhin khuangpui pu hi a TIMING vawngtuah kan la hmang lo thei si lova, hla chang tawp leh thunawn tawpa thluk sei dan chen hian mawhphurhna a nei tih hriain mipui min hruai zel rawhse. Hla key sang lutuk emaw, hniam lutuka lak palh vawikhat tihsual tawh chuan a hnulam hi a nghawng khawlo vek zel tawh thin avangin hla lak hi fimkhur a ngai tak meuh meuh a ni. He thu ziaktu hian helam kawng ah hian tawhsual a lo tawh ve tawh nual tawh avangin midangte tana tlukna awm thei hi ven saknan a duhdan fip takin a han thet a nih hi.

Tichuan Pathian kan faknaah hian thu leh hla a inchawih mawi leh pawlh tawk tur a ni a, khuang te, tawngrinna lam te pawh a zawi lutuk emaw, a ring lutuk emaw hian kan Pathian hi a tilawm em. Thlarau leh tihtak zeta kan biak na boruak hi alenbo thei mai angem tih te ngaihtuah in kan Pathian biak naah hian rilru fim taka ngaihtuah in hma in la thar leh teh ang u hmiang?

CAMPING - 2015

-Upa Lalchuangkima Tochhawng

Pathian awmpuina avangin Gospel Camping 2015 chu kan lo zo dawn ta reng mai a, a lawmawm hle. Rawngbawl tura Pathian hnena kan dil angin kum 2008 a kan kohhrana rawngbawlna nung tak nei tawh Dintharlehna Team, T.Upa C.Zairemmawia Speaker leh Counsellor mi 7 te an lo kal theia rawngbawlna hlawk tak neiin kohhranah harhna a thleng mek zela a ropui hle.

Gospel Camping atan hian Organising Committee siamin Sub Committee 6 a awma chungte chu (i) Supply & Mess (ii) Health & Sanitation (iii) Security (iv) Music, Light & Sound (v) Reception & Arrangement (vi) Prayer Cell.

Dawr siam erawhchu Kohhran Hmeichhe kutah dah a ni. Heng Sub Committee hrang hrangten a Budget an siam belhkhawm chu Rs 494,000.00 a ni.

Camping-a lut zat chu hetiang hi a ni:
CAMPING                MIPA    HMEICHHIA        TOTAL
(i) Rawngbawltu -            88 51                  139
(ii) Tleirawl/Rawlthar -     51 54                  105
(iii)  Naupang -               105 118                  223
(iv) Mipui Camp 1-na - 182 100 282
(v) Mipui Camp 2-na - 165 131 296

G..TOTAL - 591 454 1045

 
Chhan hrang hrang avanga Mipui Camp vawi hnih atanga chhuak hi mi 34(20+14) an awm a,heng mite nena Camping-a inziaklut zawng zawng chu mi 1079 kan ni.

Pathian hnathawh ropui tak a mite kaltlangin kan hmu zela a lawmawm hle. Director-in hneh taka min kaihruaiin, a tul hun apiangah Pastor leh Pro Pastor-te leh Upate’n min uap thei mai ni lovin an riahchilh hial thei a, a lawmawm hle a ni.Tin, Nuho dawrnghakte leh Sub Committee hrang hranga duty-te, thenkhat phei chu tlaivar thak thak theite leh mahni hna tul pawh thawk hman hauh lova inpete avangin malsawmna kan hmu a ni.

Heng mite hnen atang hian thilpek kan dawnga a lawmawm hle.
(i) Upa Chawngthanmawia te chhung - vawksa 20 Kg
(ii) Pu Lalchhuanmawia te chhung - Buhfai 1 Bag
(iii) Pu C.Zomuanpuia te chhung - Rs 1000